КИИКЧІН ОСХАС ЧІТІГ СӦӦКТІҢ ТӦЛІ ЧЫЫЛЫСТЫ
13.07.2022
Хабарлар
ТОКОЯКОВТАР тоғасханнар
Род тоғазии. От айының пастағы кӱннерінде Пии аймаандағы Сос пилтірі аалда Киикчін сӧӧктең сыххан Токояковтар роды тоғасхан
Род пазы чиит оол Сергей Токояков полча. Тоғазығ хайди ирткеннеңер ол чарыт пирген. Аның искіриинең, Токояковтар Таштып аймаандағы Палых тас аалдаң сыхханнар. Амғы туста ол аал чоғыл. Соонаң олар сыххан орыннаң кӧскеннер: кем Асхыс аймаандағы Сарығлар аалынзар, хайзы Пии аймаандағы Сос пилтірінзер. Аннаңар амғы тоғазығны хайда иртірерін Токояковтар азынада чӧптескеннер.
- Сос пилтірінде родтың сарчыны турча. Паза пу аалда ӱр тоғаспаабыс. Аннаңар сарчыныбыс турчатхан орында кибір-чозахтар иртірерге чарат салғабыс, - тіпче Сергей Аркадьевич.
Ағаа хоза, Сос пилтірі аалның старостазы Токояков фамилиялығ кізі полча. Дмитрий Михайлович ӧткін кізі, аалдағы ағырсымнығ сурығларны пӧгерге кӱстенче.
Ӧткін чиит оол Сергей Аркадьевич род пазына алты чыл мының алнында турғызылған. Алнындағы тоғазығда прайзы аны таллап алған. Токояковтар полған на ікі чыл пазынаң чыылысчалар. Че коронавирус ӱчӱн оларға тоғазарға киліспеен.
Иң пастағы Токояковтарның род чыылиин Ис пилтірі аал чуртағӌызы Михей Михайлович иртірген, ікінӌі тоғазығны - Паза Пиизі аал чуртағӌызы Геннадий Алексеевич.
- Род тоғазии алнында мин «Аскизский труженик» аймахтағы газетаа чарлағ пирібіскем. Ідӧк «ВКонтакте» социальнай сетьтегі страницамда ол чарлағны сығар салғам. Интернет пастыра 5600 кізі Токояковтар чыылысчатханын кӧрген, 47 кізі ол искірігнең ӱлескен. Амғы технологиялар полызиинаң хабарлар чапчаң тарадылча, анзы чахсы, - чоохтапча род пазы.
Род чыылии от айының ікінӌі кӱнінде 12.00 часта пасталған. Пастап улуғлар От инені азырааннар. Хам кибір хоостыра Ӧӧркі чайааннарзар айланған. Анаң чыылысхан чон Сос пилтірінде пайрамнар иртірӌең орынзар парғаннар. Анда чоох тударға сағынған кізілер чылығ сӧстерін читіргеннер. «Чахсы киректер ӱчӱн» паза «Род поғдархазы» орденнерге кандидаттар таллағ ирткеннер. Амды оларның аттары хакас чонның Улуғлар чӧбінзер ызылар. Ідӧк, протокол апарып, род пазын тапханнар. Ӱн пиріс хоостыра род пазына Сергей Аркадьевич табылған.
Анаң ипчілер, ізіг чіӌең ниме тимнеп, пай стол салып, маң чохха тӱс сыхханнар. Оларға постаң пол парған хыстары ас-тамах аразында хайынарға полысханнар. Хазанда хой идінең татхыннығ чарба ӱгре хайнадылған.
Ӱлӱкӱн тузында иң кічіг паза иң улуғ частығ Токояковтар табылғаннар. Иң кічіг частығ Аделина хызыӌах полыбысхан, иң улуғ - ууӌа Раиса Евдокимовна. Оларға сыйыхха кружкалар читіргеннер. Анда сӧӧк хузы - киикчін - хоосталых паза «Токояковтар» пазылых. Ідӧк ӱр чыл хада чуртап салған Токояковтар сӧбірелеріне сыйыхтар читірілген. 50 чыл азыра ынағ чуртап салған ирепчілер чииттерге чахсы кӧзідім полчалар.
- Аймах ойыннар иртіргебіс, - кӧңнінең ӱлесче Сергей Токояков. - Хомзынысха, тобитті ойнирға киліспеен, чил харығ пол парған. Олғаннар волейбол паза футбол ойнааннар, дартс тастааннар. Чиңісчілер улуғ нимес сыйығастарнаң таныхтатханнар. Мин ағастаң Токояковғар родының таңмаларын тимнеп салғам. Оларны ідӧк сыйых чіли пирглебіскем. Композитор Олег Афанасьевич Токояков баяннаң ойнаан. Сарнирға хынчатханнар ырлааннар.
Тоғазыға 70 азыра кізі килген. Олар прайзы регистрация журналында пазынғаннар, анда чуртапчатхан адрестерін паза палғалысчаң телефон номерлерін артыс салғаннар. Токояковтарның род ағазы пар, че ол толдыразынаң нимес. Аны Калининдегі школаның ӱгретчізі, «Аскизский труженик» газетаның хабарӌызы Галина Васильевна Боргоякова (хыс фамилиязы Токоякова) тимнеен. Сергей Аркадьевич килген чонға позының ағазын хоостап саларға чахығ пирген. Прайзы хоостап салған. Амды род пазы аны компьютерзер кирер. Андада Токояковтарның род ағазы толдыразынаң пӱт парар.
Род пазы Сергей Аркадьевич Сос пилтірі музейінің тоғынӌыларына, полысхан ӱчӱн, улуғ алғызын читірче. Ідӧк олар Токояковтар родының сарчынын хайраллапчалар.
Пазағы тоғазығны улам алғым иртірерге сағынча род пазы. Ол ікі чыл пазынаң полар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде