ТУРИСТТЕРГЕ НАА ЧОЛ АЗЫЛДЫ
13.07.2022
Хабарлар
Зарина ДОГУЗОВА хакас чонның кибіріерінең танысчатхан туста
Танығлығ кирек. Ростуризмнің устағҷызы Зарина Догузова 8-9 июльда тоғыс чорығынаң Хакасияда полған
Россияның ӱлгӱлері ӱзінҷі чылы істіндегі туризмні улуғ хайығда тутчалар. 2020 чылда Сибирьзер, ол санда Хакасиязар, пастағызын на чартер рейстері азылғаннар. Пӱӱл, тізең, национальнай маршруттар чуртасха кирілділер. Оларның презентациязы Санкт-Петербургтағы чоннар аразындағы экономика форумы тузында ирткен. Амғы туста маршруттар саны писке читче, полғаны ла пос оңдайлығ. Кӧзідімге, «Хан чолы» Москва, Тверь, Новгород паза Ленинград областьтарын піріктірче. Ол I Пётрның чахиинаң пӱдірілген чолда салылған. «Сибирьдегі каникуллар» - Хакасияның проекті. Аны «Дискавери» региондағы туроператор тимнеен. Пу чорыхха сыххан улус пістің республиканың, Хызылчар крайының паза Туваның чапсых орыннарында пол килер.
Таныхтирға кирек, маршруттар тӧстирінде тоғыс Ростуризмнің устаанынаң ирткен. Ол чарым чыл артиинаң парған. Пу кӱннерде турист ведомствозының тоғындылары маршрутнаң танызар пӧгіннең Хакасияда пол килгеннер. Ӧменең Зарина Догузова устаан.
Ӱс регион аразында - Хакасия, Тува паза Хызылчар крайы - хада-пірге тоғынардаңар чӧптезіг 8 июльда Сойан-Сус ГЭС-тың хыринда иділген. Ростуризмнің адынаң Зарина Валерьевна пічікте хол салған. «Сибирьдегі каникуллар» маршрутты азып, аарлығ аалды теен:
- Сибирьнің ӧӧн турист танығлары Алтай паза Байкал полча. Оларны чон чахсы пілче, анда тынанып аларға кӱстенче. Піс Россия чуртағҷыларын Ӱстӱнзархы Сибирьнең таныстырарға пӧгінчебіс. Ӧӧн хайығ экология паза этнография туризміне саларбыс. Инвесторларға тынағның аймах кӧрімнерін тилідерге полызарбыс.
Олох кӱн Зарина Догузова Россия правительствозының чыылиинда араласхан. Зарина Валерьевна, президент Владимир Путиннің алнында чоох тудып, істіндегі туризмнің тилізінеңер искірген. Ідӧк ол Владимир Владимировичті хысхаҷахти маршрутнаң таныстырған. Ростуризмнің устағҷызы, Сойан-Сус ГЭС-таң видеоконференцияа сығып, Хакасияның сіліг чирлеріне чахсы реклама ит пирген тиирге чарир.
9 июльда аарлығ аалҷылар Л.Р.Кызласовтың адынаң Хакас чир-суғ ӱгренҷең музейде, Оғлах тағда, «Салбых чазызының пурунғы кӱргеннері» музейде пол килгеннер. Прай объекттер «Сибирьдегі каникуллар» маршрутсар кірчелер. Экскурсиялар соонда правительствоның туразында Туризмҷе координационнай чӧптің чыылии ирткен. Аны Хакасия пазы Валентин Коновалов паза Ростуризмнің устағҷызы Зарина Догузова иртіргеннер. В.О.Коновалов таныхтаан:
- Хакасияда туризм экономиканың ӧӧн отрасльларының санына кірче. Ол республикаа парыстанып аларға паза экологияны хайраллирға оңдай пирче. Халғанҷы ӱс чыл аразына туризм сферазына республика бюджедінең ахча пис хати кӧп позыдылча. Чахсы салтарлар пар: чорыхчылар саны даа, тӧлелчеткен налогтарның сині дее пілдірте ӧс парған.
Чыылығ тузында аймах сурығлар ӱзӱрілген, олардаң иң ағырсымнығ инфраструктура сурии полтыр. Ростуризм хабазарға тимде. Пӱӱнгі кӱнде туризм сферазында істенчеткеннерге гранттар марии иртірілче, программалар тоғынча. Анда аралазарға кирек. Зарина Валерьевнаның таниинаң, республикада туризмні тилідер прай оңдайлар пар. Ол чоохтаан:
- Хакасия - улуғ нимес, че хайхастығ чир-чайаанға, хумартхыларға пай чир. Мында аймах оңдайнаң тынанарға чарир. Анзы ӧӧні полча.
Валентин Коновалов аалҷаа хабазығ ӱчӱн улуғ алғызын читірген. Ол турист ведомствозы Хакасиянаң аннаң андар палғалыс тударына ізенізінең ӱлескен.
«Сибирьдегі каникуллар» маршруттаңар чоохтаза, ол 8 кӱнге кӧріл парған. Аның узуны - 1244 километр. Андар чапсых орыннарда полары ла нимес, ідӧк Ким суғҷа инері, Ырғах-Тарғах тайғада тынанары кірче. Чорых, самолетха билеттерні санабаза, пір кізее 60-ҷа муң салковайға тур парар. Маршрут «Турист кешбэк» хазна программазынзар кирілзе, тӧлелген ахчаның 20 %-і чорыхчаа айландырылар.
Автор :
Тимнеен Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде