МАТЫРЛАРҒА САБЛАНЫС ХАҶАНҒА ДАА!
13.07.2022
Хабарлар
Хакасияның Ӧӧркі Чӧп кнезі Владимир ШТЫГАШЕВ чуртастарын пир салған чааҷыларны
халғанҷы чолға ӱдесчеткен митингте чоох тутхан
Чобағ. Хакасия Украинада Россия войсколары ӧнетін чаа операциязын иртірчеткен туста чуртастарын пир салған чааӌыларны халғанӌы чолға ӱдескен
Ағбанда орныхчатхан 5-ӌі алынӌа тимір чол бригадазының актовай залында чон толдыра чыылысхан. Анда тимір чол бригадазының Украинада чуртастарын пир салған чааӌыларын - Пётр Кучаковты, Роман Бирюковты, Сергей Гнускинні, Максим Журовты паза Богдан Фотинні - халғанӌы чолға ӱдескеннер. Олар Украинаны нацизмнең позыдар паза аның тиріглерін чох идер ӧнетін чаа операциязы тузында, чааӌы службазын толдырчадып, матырлар чіли чат халғаннар.
Оларнаң хада чааласхан Оттук Ооржакты аның кічіг чир-суунда - Тувада - ӱдескеннер.
Чааӌылар 27 июньда чуртастарын пир салғаннар. Олар, Россия войсколарын иртірер пӧгіннең, суғ кизіре понтоннығ тахта пӱдірчедіп, Украина армиязының артиллерия атызына кір парғаннар.
Тимір чол бригадазының актовай залында траур митингі ирткен. Анда Хакасияның устаа, офицерлер, чааӌылар араласханнар. Республика пазы Валентин Коновалов правительство паза позының адынаң чуртастарын пир салған чааӌыларның туған-чағыннарына, хомзынызын читіріп, чааӌыларның сӧбірелеріне прай кирек полызығ пирілердеңер искірген.
- Хакас чиріне улуғ чобағ килді. Піс чир-суғҷыларыбысты ӱдесчебіс, олар постарының чуртастарын неонацизмнең паза бандеровщинадаң тоғыр кӱрезігде пир салдылар. Че олар пістің хазнаның кирексіністерін не арачылабааннар, олар прай тилекейнің пос чуртазы ӱчӱн чат халғаннар. Хомзынысха, пос чуртастың паазы уғаа аарлығ, - айланған Валентин Коновалов чыылысхан чонзар. - Піс чир-суғҷыларыбыстың махачызын хачан даа ундутпаспыс, чаа пӧгінін толдырчадып, оларның матыр тудынызынаң поғдархирбыс. Оларның аттары паза матыр чааласханнары Россияның тархынында хаҷанға даа халарлар.
Трибуназар чоох тударға Хакасияның Ӧӧркі Чӧп кнезі Владимир Штыгашев сыххан.
- Піс пӱӱн чир-суғҷыларыбысты халғанҷы чолға ӱдесчебіс. Украинадағы хатығ кӱресте олар чуртастарын пир салдылар. Пу прайзыбысха айландыр полбас чідіріг, оларны айландырар оңдай чоғыл. Пістің чааҷыларыбыс, хорғыс пілбин, матырлар чіли чааласханнар. Оларның туған-чағыннарына хомзынызыбысты читірчебіс, оларнаң хада чобалчабыс. Амды Украинаны нацизмнең позыдар операция иртірілче, хазнаны нацисттердең арығлабызарға кирек. Чуртастарын пир салған чааҷыларны піс хаҷан даа ундутпаспыс, оларның сӧбірелері, ипчілері, палалары ӧкіс хала пардылар, оларға хайди даа полызығ пирілер. Чат халған чааҷылар читіре идерге маңнанмаан киректі піс читіре толдыр саларға кирекпіс. Сабланыс матырларға хаҷан даа, - теен Ӧӧркі Чӧп кнезі.
Траур митингінде ідӧк чоох тутханнар Ағбан город пазының орынӌызы Владимир Крафт, Ағбандағы чаа гарнизонының пастығы Сергей Буланов паза даа пасха офицерлер. Траур митингі тоозылғанда, Россияның паза Хакасияның гимннері толдырылған. Чуртастарын пир салған матырларны ӱбӱрӌең оркестрнің траур кӧгінӌе халғанӌы чолға ӱдескеннер.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде