РЕСПУБЛИКА ЭКОНОМИКАЗЫНА ХОЗЫМ ИТЧЕЛЕР
15.07.2022
Хабарлар
Саяногорсктағы алюминий заводының таныхтатхан тоғынҷылары Хакасия пазының орынҷызы
Юрий КУРЛАЕВНЕҢ хада
17 июльда - Металлург кӱні. Пу неделяда Саяногорскта РУСАЛ компанияда тоғынчатхан металлургтарны чеестепчелер
САЯНОГОРСК ГОРОДТЫ ТӦСТЕПЧЕТКЕН ПРЕДПРИЯТИЕ МЕТАЛЛУРГ КӰНІН ХАҶАН ДАА АЛҒЫМ ТАНЫХТАПЧА. КИБІР ХООСТЫРА ПАЙРАМДА ИҢ ЧАХСЫ ТОҒЫНҶЫЛАРНЫ ЧЕЕСТЕПЧЕЛЕР.
ХАЛҒАНҶЫ ІКІ ЧЫЛ ПУ ӰЛӰКӰН ТАНЫХТАЛБААН. ПӰӰЛ МЕТАЛЛУРГ КӰНІ МЫНЫҢ АЛНЫНДАҒЫ ЧІЛИ АЛҒЫМ ПАЙРАМНАЛАР. ПУ НЕДЕЛЯДА САЯНОГОРСКТАҒЫ АЛЮМИНИЙ ЗАВОДЫНЫҢ ТОҒЫНҶЫЛАРЫ ПРОФЕССИОНАЛЬНАЙ ПАЙРАМНАРЫН ТАНЫХТАПЧАЛАР. ӰР НИМЕСТЕ ПРЕДПРИЯТИЕ ТОҒЫНҶЫЛАРЫ АРАЗЫНДА СПОРТТЫҢ 10 КӦРІМІНЕ МАРЫҒЛАР ИРТКЕН. АНДА ІДӦК ПРЕДПРИЯТИЕДЕ КӦП ЧЫЛ ТӰЗІМНІГ ТОҒЫН САЛҒАН ТОҒЫНҶЫЛАРНЫ ТАНЫХТААННАР.
- Хайдағ даа профессиялығ істеніс кізілерін тоғыстары ӱчӱн хаҷан даа таныхтирға кирек. Уламох чахсы тоғынарға кӱстенчеткеннерні. Аның ӱчӱн спорт марығлары иртче, кізі кӱстенер паза тоғызын чахсыландырар ӱчӱн. Аннаң хада пасхазы даа кӱстенер, - таныхтаан САЗ-тың чон паза ӱлгӱ органнары палғалызынӌа директоры Евгений Молодняков.
Предприятиенің онарлап тоғынӌызына алғыстас пічіктері паза грамоталар читірілген. САЗ-тың электролиз сығарызының мастері Иван Артемьев предприятиеде 17-ӌі чылы тоғынча.
- Мағаа тоғызым, ахча тоғынып аларынаң пасха, ідӧк чайаачы оңдайым тыыдарға полысча. Пастап, заводсар килгенімде, кӧп арах ахча тоғынып аларға сағынғам. Амды, хайдағ-да чидіглерге читкенімде, мастер полыбысханымда, чал ахчазы ла ӱчӱн тоғынминчам, ідӧк посты тилідерге кӱстенчем, - теен Иван Артемьев.
Владимир Шкрум «Аарластығ металлург» атха турысхан. 22 чыл аразына ол олаңай тоғынӌыдаң ӧӧн мастерге теере ӧс парған. Аның чооғынаң, тоғыс ӧзізі - ол иң пастап улуғ опыт.
- Олаңай тоғынҷыдаң тоғынып пастапчатса, тоғынарға даа оой паза профессияның прай сидіксіністерін пілчезің, - таныхтаан Владимир Шкрум.
Хакасия ӱлгӱлері металлургтарны профессиональнай ӱлӱкӱннең алғыстирға килгеннер. Пӱӱнгі кӱнге алюминий сығарызы - экономика тилізінің ӧӧн чардығы, налог тӧлепчеткен паза кӧп чыл тоғынчатхан ізестіг партнёр.
- Металлургия Хакасияның экономиказына, тиксі хазнаа улуғ хозым итче. Ол аймах проекттернің полысчызы полча, хайзы регионның социальнай киреене чахсы хабасча: ӱгредіге, культураа, хазых хайраллирына. Аннаңар піске, правительстваа, ӱлӱкӱн алнында металлургтарны танығлығ тоғыстары ӱчӱн алғыстабызарға киректелче, - таныхтаан Хакасия пазының орынӌызы Юрий Курлаев.
От айының 16-ӌы кӱнінде пайрам узарадылар. Саяногорск чуртағӌыларына паза аалӌыларына пайрамнығ программа тимнелген. Иирде хазна эстрадазының «чылтыстары», Нюша паза Филатовнаң Карась, ідӧк Хакасия филармониязының чуртағӌыларның хынчатхан «Джинсалығ симфония» артисттері чон алнынзар сығарлар.
Автор :
Ольга СТЕЛЬМАХ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде