СЫЙЫХ МАТЫРНЫ ТАПХАН
15.07.2022
Хабарлар
Чааҷылар комиссары Андрей ТИТОВ Мария ВОРОШИЛОВАА медаль удостоверениезін читірче
Илбек Чиңіс. Киҷее чааҷылар комиссариадында Илбек Ада чааның араласчызы, сержант Василий Поршаковха тузында читірілбеен сыйыхты аның хызына пиргеннер
Хакасияның чааҷылар комиссариадының чыылығлар иртірчең залында илееде кізі чыыл парған. Анда Илбек Ада чаа араласчызы Василий Фёдорович Поршаковтың хызы Мария Васильевна Ворошилова, аның хада хонғаны, оларның хызы паза оолғы полғаннар. «За оборону Москвы» медальның удостоверениезін Мария Ворошиловаа читірер алнында, Илбек Ада чаа араласчызының чуртас чолынаңар искіріг пирілген.
Василий Поршаков 1918 чылда 23 июльда Мордовия АССР-ның Атюрьевскай аймаандағы Дмитриев Усад аалда тӧреен. Пу аймахтың военкомады аны армияа хығыртхан, срочнай службаны 1939 чылның октябрьынаң ирткен.
Илбек Ада чаа пасталыбысханда, ол, 58-ҷі артиллерия полкында полып, Москваны арачылаан, анаң Западнай, Калининскай, Харьковскай, Сталинградскай, Степной, 2-чі Украинскай фронттарда чааласхан. Будапешт городты аларында араласхан. 1942 чылда январьда паза майда палығлатхан.
23 августта 1943 чылда хызыл армеец Василий Поршаков, 84-ҷi атығчылар дивизиязының 201-інҷі атығчылар полкындағы батарея расчёдында полып, Харьков облазындағы Люботинскай аймахтың Коммунар совхозы хыринда наступлениее парчатхан чаалазығ соонда айландыр полбас чідіріглер списогына кір парған. Ипчізі Ксения Егоровнаның ибінзер Василий Фёдорович сағба чох чіт парғаннаңар искіріг килген. Че ол хазых полған, ибдегілері ол тіріг поларына ізенгеннер, киртінгеннер.
Соонаң Василий Поршаков, чаалазығларда аралазып, Ада чааның II степень орденінең, Хызыл Чылтыс орденінең, «За победу над Германией», «За взятие Будапешта» медальларнаң сыйыхтатхан.
1944 чылда июньда паза июльда Василий Фёдорович полған 476-ҷы гаубицалар артиллерия полкының устаа аны хазна сыйиина сығарған. Че хазна сыйиин аларға позының должнозын, частьын паза армиязын, хайда ол часть полғанын кӧзідерге кирек полған. Прай ол искіріглер сынға саналзалар ла, сыйых читірілчең. Василий Фёдорович, Москваны арачылирында араласчатханда, 58-чі артиллерия полкында полған. Аны сыйыхха сығарчатхан пічікте «Хайдағ армияда часть полған» графада «пілбинче» пазыл партыр. Андағ оңдайнаң Василий Поршаковха хазна сыйии читірілбин халған.
2021 чылда сентябрьда Василий Поршаковтың хызы Мария Ворошилова Хакасияның чаачылар комиссариадынзар пабазының чаадағы чолын істезерге полызығ сурып айланған. Андағ тоғыс апарылған соонда, 5 майда 2022 чылда Россия президенті Василий Фёдорович Поршаков хазна сыйиина турысчатханнаңар удостоверениеде хол салыбысхан.
Амды пайрамнығ чыылығда Хакасияның чааҷылар комиссары, полковник Андрей Титов Мария Ворошиловаа пабазының хазна сыйиина удостоверениені читірген.
Мария Васильевна чааҷылар комиссариадының прай тоғынҷыларына пабазының чаадағы чолын істезерінде улуғ тоғыс толдырған ӱчӱн алғызын читірген. Хайди ол чоохтаан, пабазы Василий Поршаков 1992 чылда ах чарыхтаң парыбысхан.
Іди хазна сыйии позының матырын таап алды.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде