IҶE КАПИТАЛЫ - ЧИР УЧАСТОГЫНА
20.07.2022
Хабарлар
Кӧні эфир. От айының 18-ҷi кӱнінде Хакасия пазы Валентин Коновалов социальнай сетьтер пастыра республика чуртағҷыларының сурығларына нандырған
Кӧні эфир пасталғалахха даа Валентин Олеговичтің социальнай сетьтердегі страницаларына аймах-пасха сурығлар кіргеннер. Сурығларның кӧбізі чоллар тыхтирына, сӧп-сап сурии чахсы пӧгілбинчеткеніне, социальнай тӧлеглердеңер паза даа пасха темаларға чарыдылғаннар.
Социальнай сетьтерзер мындағ сурығлар кіргеннер:
- Кӧп палалығ сӧбірелерге автомобиль пирчеткен программа тоғынча ба? Сӧбіреде нинҷе пала полза, ол программада аралазарға чарир?
- Андағ программа республикада тоғынча. Ол программада полған на кӧп палалығ сӧбіре, хайда читі паза аннаң даа кӧп пала ӧсче, аралас полар.Кӧп палалығ сӧбірелерге автомобиль алар программадаңар, чуртапчатхан орындағы чонға социальнай хабазығ пирҷең управлениезер айланып, толдыразынаң піліп аларға чарир. Таныхтирға кирек, ол программаҷа республикада чыл сай кӧп палалығ сӧбірелер транспорт алчалар.
- Саяногорск городтағы фонтаннар хаҷан тоғынарлар? Оларның пӱдіриине асхынах нимес бюджет ахчазы хорадылған.
- Город кініндегі фонтаннаңар чоох парча полар. Саяногорск город устағ-пастаа искіриинең, пӱӱл фонтан тоғынған, че хайдағ-да кізілер аны сайбабысхан соонаң ол тоғынминыбысхан. Мыннаң мындар фонтанны тоғындырар сурығны городтың устағ-пастаа пӧкче.
- Ноғадаңар республиканың іҷе капиталын, 100 муң салковай, чир участогын аларына хорадарға чарадылбинча?
- Аал чуртағҷыларының республика пирчеткен іҷе капиталы 200 муң салковайға тиңнелче. Пу сурығны хайыға аларбыс. Республиканың істеніс паза социальнай арачыланыс министерствозына сурығны пӧгерге чахығ пирчем. Ол неделя тоозылғанҷа
сурығны кӧрібізер алай чӧптер пирер.
- Копьев - Приисковай чолның хай пірее кизектері тың изелче. Олар нааҷылалғаннар, че тоғыс читіре толдырылбин, тохтап парған. Мыннаң мындар чолны иптирлер бе?
- Ол чолны иптиріне асхынах нимес ахча позыдылған. Хомзынысха, чолны тыхтир подряд организациязы тоғызын чахсы толдырбаан. Пӱӱнгі кӱнге ол подрядчикнең чӧптезіг чох иділче паза наа подряд организациязынаң чӧптезіг идерінҷе тоғыс апарылча. Андағ чӧптезіглер табырах иділ парбинча, че орғах айының пастағы чардығында тыхтағ тоғыстары узарадыларға кирек.
Ідӧк кӧні эфир тузында чуртағҷылар Хакасия пазына палалар ӱчӱн социальнай пособиедеңер илееде сурығ пиргеннер. Піреезі пособие хайдағ кӱннерде банк счедына килерін, хайзы-да пособие оларға пирілбинчеткені сағыссыратчатханнаңар сурығлар пирген. Хай пірее сурығларны Валентин Олегович толдыразынаң чарыт пирерге паза аның социальнай страницазында пас пирерге сурынған.
Автор :
Наталья ТЮКПЕЕВА Хакасия пазы Валентин КОНОВАЛОВ кӧні эфирде
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде