АБА СӦӦГІНІҢ ТӦЛІ ЧЫЫЛЫСХАН
20.07.2022
Хабарлар
Улуғ Асхыс суғ хазында МЕЖЕКОВТАР тоғасты
Род тоғазии. Пу наада Асхыс аймаандағы Асхыс чоғархы аалда Межековтарның тоғазии ирткен
Чоохтирға кирек, Аба родының тӧлі мындағ тоғазыға пастағызын на чыылысхан. Аны иртірер пастағнаң сыххан 31 частығ Роман Николаевич. Хайди ол таныхтаан, пасха родтар тоғазығлар иртірчелер, Межековтар,тізең, пір дее чыылыспааннар.
Андағ сағыс тӧреендӧк, Алексей Михайловичнең чӧптезіп, «ВКонтакте» социальнай сетьте «Межековым привет!!!» группа тӧстебіскеннер. Анда тоғазығ иртірердеңер чӧптес сыхханнар. Романның чооғынаң, «ВКонтакте» соцсетьте, «Межеков» пазыбысса, кӧп кізі табылча.
Тоғазығ Улуғ Асхыс суғ хазында ирткен. Че аның алнында тимнегліг тоғыс парған. Мында чииттерге улуғлар полызии чох чарабас. Хайди теен Рома, оларға Афонасий Тимофеевич паза Зинаида Карповна чахсы хабасханнар.
Тоғазыға азынада тимненіп, тракторнаң чардылар арығзар тартып, анда, чир хазып, столбалар турғызып, стол-одырчыхтар идібіскеннер. Кӧлек полар ӱчӱн, тент тартыбысханнар.
Иртенӧк хазаннар турғызып, чарба ӱгре хайнатханнар, істі-харын, хан пызырғаннар, потхы тимнееннер, салаттар тоғырааннар. Хой идін сістирге мангал турғысханнар.
Анаң чыылчатхан чон-чахсыны пай стол кистіне одыртханнар. Хайди искірген Роман, кӧп кізі кил полбаан: кем-де тоғынча, хайзы-да ағырча...
Аба сӧӧгінің тӧлі, стол кистінде одырып, удур-тӧдір танысханнар: хайдаң килгенін искіргеннер, іӌе-пабазынаңар, харындас-пиӌелерінеңер, пала-пархаларынаңар чоохтааннар. Межековтар Ағбаннаң, Трайлардаң, Аевтең, Апчанайдаң, Пилтірдең, Оӧк пилтірінең, Асхыстаң, Чоғархы Пазадаң, Асхыс станциязынаң паза Асхыс чоғархыдаң килгеннер.
Полған на мероприятиеде кем-де, киліп, ӱр полбин, парыбысча, піреезі тоғысха маңзырапча, хайзы-да, тізең, тоғыс соонаң орай килче. Мында ідӧк полған. Че ӧӧні - тоғазыға килгені.
Чыылығда род ағазын хоостааннар. Межековтар роды Пастискадаң пасталған. Аннаңар пу фамилияны ал чӧрчеткеннер прайзы туғаннар. Аба сӧӧгінің тӧлі Ағбан пилтірі аймаандағы Уйбат паза Асхыс аймаандағы Аев аалда чуртапчатханын пілерге чапсых полған.
Чуртас чахайахтары чох тоғазығ хайди иртер. Олған-узахты ӱтертер пӧгіннең ачыхта улуғ батут турғызылған. Анда палалар иирге теере майыхханӌа сегіргеннер. Ідӧк волейбол ойнирға сетка тартылған, меспек тепклеп, футбол ойнирға хынчатханнарға хаалхалар тимнелген. Плесет салар кӧңніліглерге колонкалар тимде полған. Хынзаң - ойна, хынзаң - теелбектен алай суға сом.
Стол кистінде сарын толдырбин хайди одырар, анзы полғанох. Хайди ӱстӱнде таныхталған, Межековтар Аба роды полча паза тоғазығ пастағызын на иртірілче. Аннаңар иң улуғ частыға, иң кічиине ӧнетін паза пасха даа сыйыхтар читірбеске чарадығ алылған. Тоғазыға килген прай сӧбірелерге «Сӧӧк Аба-2022» пазылған, аба хоосталған магниттер сыйлалған. Ол тоғазығдаңар ундирға пирбес.
Род тоғазии чииттер кӱстенізінең иртірілчеткені махтағлығ. Оларға пу пастағны узарадарға паза пасха даа чахсы киректерні чуртасха кирерге оңдай пиріп, род пазына Роман Николаевич табылған. Аның полысчылары - Алексей Михайлович паза Валерий Афонасьевич. Хайди таныхталған, мындағ тоғазығлар кирек, улуғ частығлар тігі чирзер парчалар, пала-пархалар удур-тӧдір танызарға, туғанназарға киректер. Алексейнің чооғынаң, Межековтарның род тоғазии ӱс чыл пазынаң, 2025 чылда, иртер.
Автор :
Наталья УГДЫЖЕКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде