МЫНДА ЧАЙААЧЫЛАР ТӦРІПЧЕЛЕР
20.07.2022
Хабарлар
Чайғы литература лагерьінің араласчылары
Литература лагерьі. Асхыс аймаандағы М.Е.Кильчичаковтың адынаң литература музейінде регионнар аразындағы VI чайғы литература лагерьі позының тоғызын тоосхан
Чиит литераторларның чайғы лагерьі кибір хоостыра Асхыс аймаандағы Чоғархы Тӧӧ аалда тоғынча. Пӱӱл ол позының тоғызын от айының 4 - 9 кӱннерінде иртірген.
Хакасияның Чайаачылар туразы, чыл сай аймах литература марығларын иртіріп, чииттер аразында таланттығ оол-хыстарны таапча. Иң таллама чайаачы литераторлар чайғы лагерьінде полып алчалар. Пӱӱл чоохтар паза кибелістер пасчатхан чииттерге книга хоостапчатхан иллюстраторлар хозылғаннар. Пастап оларны республикада иртірілчеткен «Таланттарның тигір хуры» адалчатхан литература марииның салтарлары хоостыра таллап алчалар.
Іди чайғы литература лагерьіне кіріп алғаннар Илья Еремин (Харатас город), Анастасия Литвинова (Саяногорск город), Альбина Арчимаева (Пии аймаа), Малена Чебодаева (Таштып аймаа), Регина Ултургашева, Ксения Майнагашева, Пиксен Ултургашев (Асхыс аймаа) паза Чечена Монгуш (Тыва Республика).
Оларны ӱгредерге парғаннар лагерьнің пастығы паза проза пӧліктің устағӌызы Юрий Черчинский, хакас тілінең пасчатханнарны ӱгреткен поэт Сибдей Том. Ідӧк лекциялар хығырғаннар хакас фольклорнаң айғасчатхан, Хакас Республиканың саблығ артизі Инна Майнагашева, педагогика наукаларының кандидады Наталья Кольчикова, ідӧк сценада иптіг чоохтанарына ӱгреткен Минсуғ городтаң парған Артём Охальников, издательство киреенеңер чоохтаан Ростов-на-Дону городтаң килген Ольга Прилуцкая паза Хызыл городтаң полған литературовед Сайлыкмаа Комбу.
Пастағы кӱнінде педагогика наукаларының кандидады Наталья Кольчикова чииттерге чон фольклорынаңар лекция хығыр пирген. Ікінӌі кӱнінде Крым Республикада сыхчатхан «Доля» литература хоос журналының редакторы Ольга Прилуцкая наа пасчатханнарға хайди чайаачы тоғыстарны журналларда сығарып алардаңар чӧптер пирген.
Минсуғдағы «Эгоист» театр-студияның устағӌызы Артём Охальников чиит авторларны чон алнында хайди тудынарға паза пілдістіг, чарыда чоохтанарға ӱгреткен. Артём позы алында пу лагерьнің тоғызында чиит автор полып араласхан.
Хакас тілінең кибелістерні орта пазарға паза оларның пӱдізін пілерге ӱгреткен поэт-блогер Сибдей Том. Аның чооғынаң, лагерь тоғызында араласчатхан хакас хыстар пос тілінең маңат чоохтасчалар паза кибелістерін тахпах оңдайынаң пасчалар. Альбина Арчимаева, тізең, Илбек Ада чаада чааласхан ағазынаңар пӱкӱлее поэма пас салтыр.
Чиит авторлар пис кӱн аразына удур-тӧдір чахсы танызып алғаннар, хынығ иирлер иртіргеннер паза экскурсияа чӧргеннер. Халғанӌы ікі кӱнде лагерь араласчылары «Хуртуйах тас» паза Казановкадағы музей-заповедниктерде полып алғаннар. Лагерьнің тоғызын чаапчатханда, Хакасияның саблығ артизі Анна Бурнакова устапчатхан «Кӱн чахайағы» теелбек паза сарын чон ӧмезі хынығ ойын кӧзіт пирген.
Хакасияның Чайаачылар туразы чайғы литература лагерьінің тоғызын тӱзімніг иртірерге полысхан ӱчӱн М.Е.Кильчичаковтың адынаң литература музейін, «Хуртуйах тас» музейні, «Кӱг» хакас ибіӌектер комплексін, Казановкадағы национальнай музей-заповедникті, С.П.Кадышевтің адынаң чон чайаачызы кінін, М.Ю.Лермонтовтың адынаң орыс драма театрын паза даа пасхазын алғыстапча.
Автор :
Валентина КАЙДАРАКОВА, Хакасияның Чайаачылар туразының методизі
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде