ОЛҒАННАРҒА ТЫНАНҶАҢ ИСТІГ ОҢДАЙЛАР ТӦСТЕЛЧЕ
22.07.2022
Хабарлар
Хакасия пазы Валентин КОНОВАЛОВ «Пуланнығ кӧл» спорт лагерьінде олаңай кӱреснең айғасчатхан олғаннарнаң хада
Олған хазиин пиктирі-2022. Пу кӱннерде Хакасия пазы Валентин Коновалов Асхыс аймаандағы «Пуланнығ кӧл» тынағ лагерьінде пол килген
Олған хазиин тыытчаң тынағ лагерьі Пуланнығ кӧл хазында орныхча. Харағай аразындағы арығ кии кізі хазиина улуғ туза ағылча нооза. Амды анда ікінӌі сменада ӱс чӱс азыра пала тынанча. Ідӧк олғаннар командаларнаң паза тренерлерінең хада килчелер. Ікінӌі сменада хазиин тыыдарға паза тынанарға кӱреснең, хоккейнең, тенниснең паза даа пасха спорт кӧрімнерінең айғасчатхан олғаннар килгеннер. Олар мында олаңай ла тынанминчалар, ідӧк тренировкалар иртірчелер. Кӱнӧрте спорттың хынчатхан кӧрімнерінең айғазарына уламох кӧп кӱс салчалар, иирде, тізең, пос тус полча. Андада олар тынанчалар паза кӧңнілеріне чатчатхан киректернең айғасчалар.
«Пуланнығ кӧл» тынағ лагерьі ідӧк тиксі Сибирь регионнарында саблан парған. Аннаңар анда пасха даа регионнарның олғаннары тынанчалар. Харағай аразындағы кии паза тайға чирінде орныхчатхан лагерьде тынанған соонаң палаларның хазии даа тыыпча паза спортта чидіглері чахсыланча. Таныхтирға кирек, ідӧк спорт лагерьінде оларға чиис тимниріне ӧнетін хайығ салылча. Ас-тамах аймах паза тузалығ поларға кирек. Хайди таныхтааннар столовайның тоғынӌылары, олғаннарға тимнелчеткен чиис кӱннің пасхалалча.
Хакасия правительствозы чайғы тынағ кампаниязының хорадығларын чардыхти ӧскірче. Халғанӌы чылларда лагерьде кӧріндіре алызығлар чахсы саринзар парча. Позыдылған ахчаа «Пуланнығ кӧл» лагерьде олғаннар чуртапчатхан тураларда тиксі тыхтағ тоғыстары иділген, наа техника паза оборудование алылған, чиис тимнепчеткен орынға плиталар паза пасха даа нимелер алылған. Ирткен чылдағызынаң тиңнестірзе, республика бюджедінең позыдылчатхан ахча сині 45%-ке ӧс парған.
- «Пуланнығ кӧл» лагерь 1932 чылда тӧстелген. Илбек Ада чаа тузында аны палығлатхан летчиктерге реабилитация иртчең орынға айландырғаннар. Пеер прай Совет Союзынаң реабилитация кирексіпчеткен летчиктер килчеңнер. Анаң чаа соонаң хатабох олған лагерьіне айлан парған.
2009 чылда республиканың спорт министерствозына пиріл парған, ол спорт чидіглерін тилітчең паза хазых тыытчаң олған лагерьі пол парған. Палалар пістің лагерьде тынанған соонаң спорт саринаң чахсы чидіглерге читчелер, - чоохтаан лагерь устағӌызы Ирина Соловьева.
Тынағ лагерьінде олғаннарға чуртаӌаң прай 11 тура. Пӱӱл ӱс смена аразына анда 850-ӌе олған тынанып алар. Спортсменнердең пасха, «Пуланнығ кӧл» лагерьде сидік чуртас оңдайларына кір парған сӧбірелердең паза ӱгредігде чахсы кӧзідімнерге читкен палаӌахтар тынанчалар. Олар прайзы тренировкаларда тиңнең тиңе айғасчалар. Олғаннар тӧзек-частыхтарын паза тумбочкаларын на чыы тартчалар. Полны чууп, тозынны ӧнетін тоғынӌы чысхлапча. Олох, санитар-эпидемиология кирексіністеріне тудынып, полған на турада дезинфекция иртірче.
Тренировкалардаң пасха олғаннар ідӧк ӧткін тынанчалар. Тынанчатханнарның аразында «Саяночка» ансамбльның араласчылары. Олар ідӧк сыбыра пу лагерьде тынанчалар паза андағыларны теелбектерінең ӧріндірчелер. Полған на иир ансамбльның араласчылары улуғ нимес концерт кӧзітчелер алай мастер-класстар иртірчелер. Хайда пасхазын сидік нимес теелбектерге ӱгретчелер.
Олаңай кӱресче тренер Денис КАРАМЧАКОВ тоғыс тузында
Лагерьде аймах спорт кӧрімнерінең айғасчатханнарға алынӌа тренировка иртірӌең туралар пар. Хакас ибі оңдайынаң пӱдірілген пӧлік хайиимны тартхан. Анда олаңай кӱресче тренер Денис Карамчаков палаларнаң айғасчатхан. Ол тоғызынаңар хысхаӌахти чоохтап пирген:
- Мин сигізінҷі чылы Олимп резерві училищезінің тренері полып істенчем. «Пуланнығ кӧл» тынағ лагерьінде чыл сай ікінҷі сменада Хакасия кӱресчілерінің піріктірілген командазының спортсменнеріне тренировкалар иртірчем.
Амды піс тиксі физкультура тимненіс залындабыс, анаң кӱрес залынзар парарбыс. Мин 16 - 18 частығ палаларнаң тоғынчам. Олар ӱс неделя аразына, пос салынмин, кӱрес оңдайларын таптапчалар. Андағ пӧгін ӧнетін турғызылған, ӱртӱн айында марығлар тузы пасталча, ағаа тимненчебіс.
Килчеткен 2023 чылда «Пуланнығ кӧл» тынағ лагерьінің инфраструктуразын нааӌылиры узарадылар. Наа спорт площадкалары пӱдірілер, ідӧк кинек паза хазии уйан спортсменнерге спортнаң айғазар оңдайлар алғыдылар. Лагерь орғах айы тоозылғанӌа тоғынар. Ол тус аразына илееде пала, хазиин тыыдып, чағдапчатхан спорт марығларына тимненіп алар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде