МЫНДА ХАКАС КНИГАЛАРЫ ПАР
22.07.2022
Хабарлар
Писательлернің книгалар лавказында
23 июльда - Садығ тоғынҷызы кӱні
Пу килчеткен чечіме кӱнде пістің хазнабыста Садығ тоғынҷызы кӱні таныхталча. Чуртаста піс садығ киреенең тӧреміл палғалысчабыс. Садығ тураларынзар удаа чӧрчебіс, улам городта чуртапчатханнар. Піске кӱннің сай халас, сӱт, ит паза даа пасха ас-тамах кирек пол парча нооза.
Анынаң кізілерні чапсыт полбассың, аннаңар мин Ағбанда Хакасиядағы писательлер пірігізінің туразынзар парғам. Ол Ленин орамазындағы 63 номер турада орныхча. Анда нинӌе-де чыл Хакас писательлері пірігізінің книгалар лавказы тоғынча. Сағам анда книгаларны чиит хыс Регина Ултургашева сатча. Ол позының тоғызынаңар хысхаӌахти чоохтап пирген.
- Мин мында ӱр ниместең не сығара тоғын парим, - теен ол. - Аннаңар кӧп ниме чоохтап полбаспын. Пу тоғыс кӧңніме кірче. Садығ орнында одырып, аймах книгалар хығырчазың паза саблығ писательлернең тоғасчазың. Наа пасчатхан чииттер удаа кил парчалар. Ӱр ниместе мин оларнаң хада чайғыдағы литература лагерьінде полғам. Мин анда книгалар хоосчызы полып араласхам. Писатель Илья Топоевтің пу наада сыххан олғаннарға пасхан кибелістеріне хоостар тимнеем. Хоостирға хынчам. Пістің книгалар лавказынзар кізілер удаа ла кірбинчелер. Халғанҷы ікі чыл ковид чуғынчах ағырығ тарапчатханда, піс тоғынмаабыс таа. Ам на тоғынып пастапчабыс. Чоохтирға кирек, хакас тілінең книгаларны Ағбанда пістің не лавкада алып аларға чарир. Хоза хайдағ книгалар сурапчалар? Кӧбізін Хакасияның тархынынаңар паза этнографиязынаңар. Чииттер, пос тілін чахсы пілерге хынып, хакас-орыс сӧстіктерні, разговорниктерні алчалар. Аалҷылар Хакасиядаңар сыйыхтығ альбомнарны сурапчалар. Ачырғасха, андағ альбомнар пасха даа садығ тураларында чоғыл. Амды Хакасияда туризмні тилітчеткенде, сіліг сомнығ альбомнар паза открыткалар сығарарға кирек тіп сағынчам. Чоохтирға кирек, пістің ус холлығлар постары иткен аймах сувенирлерні садыға ағыл салчалар. Туристтер оларны хынып алчалар.
Халғанҷы туста пістің писательлернің книгалары удаа сыхчалар. Піреезі пос кӱзінең сығарча, піреезіне правительство сығарарға полыс пирче. Пайрамнығ чылларын толдырған саблығ писательлерібістің книгаларын хатап сығарчалар. Іди Иван Мартынович Костяков тың кибелістер чыындызы орыс паза хакас тіллерінең сыххан.
Алында хайчы Семён Шулбаевтің «Ай Солбаннаң Кӱн Солбан» алыптығ нымаа чарых кӧрген. Амғы писательлерні алза, Хакасияның чон писательі Галина Григорьевна Казачинованың «Тілім минің - хайхазым» кибелістер чыындызы паза Илья Топоевтің олғаннарға пасхан «Чир-чайааным» ікі книгаҷағы сых парғаннар. Орыстарның Татьяна Штарк позының кибелістер чыындызын сығарыбысхан. Пістің книгалар лавказында наа сыххан книгалар ла нимес, че ідӧк хаҷанох сыххан книгаларны алып аларға чарир. Мында Николай Доможаковтың, Валерий Майнашевтің, Каркей Нербышевтің паза даа пасхазының чоохтары паза кибелістері пар.
Писательлернің книгалар лавказы кӱннің сай тоғынча. Олаңай кӱннерде 10 частаң 19 час иирге теере паза суббота - позырахта 10 частаң 18 часха теере пістің ізіктерібіс азых.
Пістің мында ідӧк пар тасхах, хайдар кізілер постарының хығыр салған книгаларын пасхазына хығырарға ағыл салчалар. Піреезі ӧнетін оларны кӧрерге паза хығырып аларға кір килче.
Піс книгаа хынчатханнарны писательлер лавказынзар ааллап кил турарға хығырчабыс!
Автор :
Илья ТОПОЕВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде