ЫНАҒ ӦМЕНЕҢ ІСТЕНЕРГЕ НИИК
22.07.2022
Хабарлар
«Рассвет» садығ туразының тоғынҷылары Оксана ШУЛТРЕКОВА паза Лариса ЛОПАТИНА
Кӱннің сай піс садығ туразынзар ниме-ноо аларға чӧрчебіс. Анда піске аймах-пасха садығҷылар тоғасча
Таштыптағы «Рассвет» садығ туразында чиит ипчі Оксана Шултрекова ӱзінӌі чылы тоғынча. Андағы садығӌылар ікі кӱн істенчелер, анаң ікі кӱн тынанчалар. Сменада ӧӧнінде ӱзер ипчі тоғынча, олар чонға ас-тамах паза пӱдіріг киреенде тузаланылчатхан ниме-ноо, сабын-порошоктар паза пасха даа ниме сатчалар. Анзын таштыптағылар кӧбізі пілче, аннаңар, иблерінде тыхтағ тоғыстары пасталза, удаа пеер кірчелер.
Оксана Таштыпсар тӧреен Чоғархы Сии аалынаң тоғысха чӧрче. Абахай ипчі Михаил ирінең хада ӱс пала ӧскірчелер: 8 частығ Алинаны, 4 частығ Регинаны паза 3 частығ Артурны. Чиит сӧбіре городта чуртаанох, че анда олғаннарны ӧскірерге аар полыбысхан. Аалда, тізең, постарының ибі, арығ кии, палаларны тасхар хорыхпин позыдарға, мал-хус тударға оңдай пар.
«Рассветтің» садығӌыларының тоғызы оой нимес. Олар 9.00 час иртеннең сығара 21.00 час иирге теере кӱнні азахта иртірчелер. Наа ла килген товарны кӧдірерге, санирға, базазар кирерге, олох туста кізілернең тоғынарға кирек. Пірееде тыртыс таа кізілерге тоғас парарға айабас.
Оксананаң чоохтасхан кӱнде аннаң хада Лариса Лопатина тоғынған. Ол садығ киреенде 2002 чылдаң сығара, че «Рассветте» пастағы чыл істенче. Ол чарытча:
- Ниме мағаа тоғызымда кӧңніме кірче? Пістің уғаа ынағ ӧме, хыстарнаң тӧреміл тӧреен кӱннерібісті, Наа чыл, 8 Март ӱлӱкӱннерні хада таныхтапчабыс. Тоғыста пірее ікінҷілес сығыс килзе, сах андох чазыт чох аннаң ӱлесчебіс. Андағ ӧмеде тоғынарға ниик. Паза хада тоғынчатхан хыс Тамара Гамзатованы чағдапчатхан тӧреен кӱнінең газета пастыра алғыстабызарға сурынчабыс, 23 июльда полар.
Пос туста пістің абахай садығӌыларыбыс нименең айғасчалар? Илееде тус пала-пархаларға, ӱӱӌікке, аал хониина парыбысча нооза. Лариса Лопатина ибде тынанып кӱс алынча, Оксана Шултрекова чир-чайаанда чистектеп, мискелеп, тынанып алча алай чорыхха сыхча. Анаң наа кӱснең, чалахай кӧңніліг пазох тоғынчалар. Олар садығ туразынзар ниме-ноо аларға килген кізілернең хайди чоохтазарынаң, тудынарынаң, санирынаң садығ кирее чахсы алай уйан парары палғалыстығ.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде