Правительствоны алызығлар сағыпча
26.07.2022
Хабарлар
Аннаңар Хакасия пазы Валентин Коновалов республика правительствозының пӱӱнгi чыылиинда искiрген. Аның чарытханынаң, США паза Европа хазналарының экономика хатығластары сылтаанда Россия наа чуртас-экономика хығыртығларына урунғаннаңар пу чарадығны аларға килiскен:
– Президент турғысхан пӧгiннернi пӱӱн чапчаң паза чахсы толдырарға кирек: пос кирексiнiстерiне сыданчатхан экономика тӧстирi, кiзi оңдайларының тилiзi, чуға чуртапчатханнар санын хызырары. Мин кӧстепчеткен Хакасияның ӧӧн кӧстеглерi Россия президентi турғысхан чолға толдыразынаң килiсче. Пiске саңай наа паза табырах алысчатхан оңдайларда тоғынарға киректелче.
Хомзынысха, пӱӱнгi кӱнде республика правительствозында турғызылған кӧстеглерге прайзы сыданминча. Сылтағлар аймах. Кем-де профессия саринаң ус парған, кемге-де тынаға парар тус чит килген, кем-де читiре тоғынминча паза чуртағҷыларның орындағы сидiксiнiстерiнеңер айланыстарны испинче. Кем-де, тiзең, пасха саринзар харахсынча. Ӧменең пiр салтарға тоғынар орнына пос кирексiнiстерiне ле хайығ салча, салтарында Хакасия чуртағҷыларынаң тоғыр турча.
Хайзы даа саринаң алза, ол кiзiлер алынҷа кӧстеглерҷе тоғысты уйан толдырчалар, пiстiң командаа паза республикаа турыспинчалар.
Валентин Коновалов республика правительствозының 3,5 чыл тоғызына тиксi пӧзiк паалағ пирген:
– Пiс сiрернең хада таңдағызына чахсы ӧзен тӧстеебiс. Уғаа кирек сурығларны пӧгiп алғабыс: хазна ахчазын оңдайлап алғабыс паза ол сурығны муниципалитеттерге пӧгерге полыс пиргебiс. Бюджеттiң парызын ӧскiрiп алғабыс. Экономиканың ис-пайнаң палғалыстығ нимес кӧстеен тилiтчебiс, кiчiг паза ортын пос киреене хабасчабыс. Халғанҷы чылларға пiс коммунальнай хоныхты тиксi сыныхтабысхабыс, реформа иртiрiп, нааҷылабысхабыс. Экология сидiксiнiстерiн тиксi саринаң пӧкчең тоғысты иптеп алғабыс. Хакасияда чал ахчазы паза пособиелер тузында тӧлелче.
Тиксi алза, пiстiң правительство ӧмезi кӱстiг тоғыныбысхан паза ӧӧн кӧстеглерге сыданған.
Хакасия правительствозының пӱдiзiндегi паза алынҷа орыннардағы алызығлардаңар республика пазы пу чағында искiрер.
– Мин пiлчем, пу алызығлар пiске ӧткiн хаалирға, президент турғысхан пӧгiннерге паза пiстiң ӧӧн кӧстеглерге чидерге полызар. Хынған Хакасиябысты аннаң андар тилiдерге полызар, – таныхтаан Валентин Коновалов.
Хакасияның чуртас-экономиказын тилiтчең пис ӧӧн кӧстег таныхтал парған. Олардаңар Валентин Коновалов Хакасияның Ӧӧркi Чӧбiнiң депутаттарына правительствоның 2021 чылның тоғызынҷа сан пирiсте искiрген. Оларның санына кiрче: кiзi оңдайларының тилiзi, экологияны чахсыландырары, чир-чайаанға ӱрег ағылбинчатхан наа экономика, амғы инфраструктура паза хайхастығ культура-тархын ис-пайын хайраллиры.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде