ХАКАСИЯ ПАЗОХ ЧОБАҒДА
27.07.2022
Хабарлар
Матыр Вадим ТОРОКОВТЫ тӱгенҷі чолына ӱдесчелер
Хумартхылас. Ирткен неделяда Асхыс аймаандағы Ӱс чул аалда Украинада, ӧнетін чаа операциязында аралазып, тынын пир салған Вадим Тороковты тӱгенҷі чолына ӱдескеннер
Вадим Тороков танктың механик-водительі полған. Хумартхылас мероприятиезінде Хакасия правительствозы паза Асхыс аймаа ӱлгӱзінің кізілері араласханнар.
Хумартхылас мероприятиезіне килген чон алнынзар Хакасия пазының орынҷызы Сергей Комаров сыххан.
- Пӱӱн піс Вадим Борисович Тороковты тӱгенҷі чолына ӱдесчебіс. Ол чааҷы службазын халғанҷызына теере толдырған, пісті арачылаан. Пістің ӱчӱн ол позының чуртазын пир салған. Піс Вадим Борисовичті ундутпасха, сағыста хаҷан даа ал чӧрерге кирекпіс, - чоохтаан Сергей Владимирович.
Асхыс аймаа пазы Абрек Челтыгмашевтің чооғынаң, Украинадағы ӧнетін чаа операциязы, пизінҷі айы парча. Ол тус аразына Ӱс чул аал чӧбінің ӱс оолғы сын чирзер парыбысхан. Вадим Тороков 21 частығда ах чарыхтаң парыбысхан. Ол чуртазында кӧп ниме идіп аларҷых.
Хакасияның национальнай паза территориальнай политика министрі Михаил Побызаковтың таниинаң, Илбек Ада чаада Тӧӧ чирінең кӧп кізі араласхан. Олар прайзы фашизмнең тоғыр кӱрескеннер. Пӱӱнгі кӱнде фашизм ам даа пар. 9 Май ӱлӱкӱнін таныхтап, піс чуртазыбыс чарых ползын тіп сағынчабыс. Че фашизм пазох хазнабыстаң тоғыр турыбысты. Ачырғасха, пістің оолларыбыс сын чирзер парыбысчалар. Олар тиктең нимес тыннарын пир салғаннарына ізенелер, пістің сағызыбыста халзыннар.
Ӧӧркі Чӧп депутады Пётр Ворониннің сӧстерінең, пӱӱнгі кӱнде хакас ооллар Россияда чуртапчатхан прай чоннарнаң хада сидік тоғыс апарчалар, Донецк паза Луганск чон республикаларын нацизмнең позыдарынҷа Ӧӧркі ӧӧн командующай турғысхан пӧгіннерні толдырчалар. 24 февральда ӧӧн чарадығ алылбаан полза, пӱӱнгі кӱнде хан уғаа кӧп тӧгілерҷік, че Россияда. Хакас ооллар Илбек Ада чаада паза кизек чаалазығларда чат халған чир-суғҷыларыбысха турыстығлар.
Ӱс чул аал чӧбінің пазы Занета Ултургашеваның чооғынаң чиит ооллар чуртастаң парыбысчатханы уғаа ачырғастығ. Ӱс чулдагы чон Вадимге тың ізенген. Ол, музыка училищезін тоозып, аалдағы клубта тоғынарҷых. Че алып чуртазы кинетін ӱзіл парды. Хакас оолның адын ол пӧзік ал чӧрген.
Ідӧк Вадимнең анымҷохтазарга музыка училшезінде аны ӱгреткен Людмила Кирбижекова, класс устағҷызы Виктория Томочакова паза служба хада апарған сержант Артур Яхин килгеннер. Артур Николаевичтің сӧстерінең, Вадим Тороков терроризмнең тоғыр махачы чааласхан. Сидік чаалазығда ол матыр хылиин кӧзіткен. 13 июльда Луганск чон республиказындағы Золотаревка аалның хыринҷа парчатхан колоннаны ыырҷы ат сыххан. Аар палығладып, Вадим Тороков Москва облазындағы Красногорсктағы госпитальда сын чирзер парыбысхан. Служба тузында ол хаҷан даа присягаа сын полған, чаа пӧгіннерін турыстыра толдырған.
Вадим Борисович Тороковты тӧреен чирінде, Ӱс чул аалда, чыып салғаннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы