Школалар пӱдiрiлче паза тыхталча
28.07.2022
Хабарлар
Хакасия пазы Валентин Коновалов Ағбан город пазы Алексей Леминнең тоғасты. Кӱн сурии – ӱгредiг учреждениелерiнiң наа ӱгредiг чылына тимненiзi.
Ағбан город пазы тиксi тимненiс хайди парчатханнаңар искiрген. Ол iдӧк 2023 чылға ӱгредiг учреждениелерiнiң тураларын тиксi тыхтирына айланыстарның тимнелчеткенiнеңер паза 9-ҷы чуртаҷаң районда 250 орыннығ школа пӱдiриинеңер искiрген.
Пӱдiрiг ниме-ноозына паалар ӧскеннеңер Хакасия правительствозы Россияның просвещение министерствозынаң пу школа пӱдiриине ахчаны хос пирерге сурынған. Ӏди хоза 36 миллион салковай позыдылған. Чӧптезiгде хол салылған, пу чағында ахча городха читiрiлер. Наа школа ӱгренҷiлерге iзиин 2023 чылда азар.
Пӱӱнгi кӱнде Ағбандағы школаларда паза олған садтарында тыхтағ тоғыстары хайди апарылчатханы алынҷа ӱзӱрiлген.
– Ӏзенчем, прай тоғыстар тузында толдырыларына паза 1 сентябрьға олғаннар истiг паза чарых класстарзар парарларына. Муниципалитеттернiң сидiксiнiстер сығысчатса, Хакасия правительствозы полызарға тимде, – таныхтаан Валентин Коновалов.
Наа ӱгредiг чылына тимненiс тиксi республикада парча. Хакасияда 250 орыннығ iкi наа школа пӱдiрiлче: Пирiкчул аалда паза Ағбан городта. Ӏдӧк полған на муниципальнай пӱдiсте ӱгредiг учреждениелерiнде тыхтағ тоғыстары апарылча. Тиксi тыхтағҷа федеральнай программаа пис школа кирiлген: Сорығда, Таштып паза Шира аймахтарында пiрер школа паза Орджоникидзе аймаанда iкi тура.
Республика 1000 орыннығ iкi школа пӱдiрерге пӧгiнче: Хубачарда паза Ағбан городтың Арбан чуртаҷаң наа районында. Пӱӱнгi кӱнде андағох улуғ школа Асхыс аалда пӱдiрiлче. Анда 825 орын кӧрiлче.
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде