СЫЙЫХ КӰС ПИРЧЕ
29.07.2022
Хабарлар
Чиңісчілер. Пу кӱннерде Хакасия пазының М.Баиновтың паза Н.Доможаковтың адынаң литература сыйиин алған чиңісчілер адалды. М.Баиновтың паза Н.Доможаковтың адынаң литература сыйыхтарына Сибдей ТОМ паза Юрий АБУМОВ турысханнар
Хакасияда сигіс чылӌа Хакасия пазының Моисей Баиновтың паза Николай Доможаковтың адынаң литература сыйыхтарын орыс паза хакас тіллерінең пазылған иң маңат кибеліс паза проза чайаачы тоғыстарын сығарған авторларны таныхтапчалар. Андағ сыйыхтар Хакасияның писательлер трігізінің, чайаачы паза халыхтар трігістерінің, литература пірігістерінің араласчыларына паза республикада чуртапчатхан авторларға пирілчелер.
Іди Хакас Республика пазының пӱӱл 26 июльда сығарылған чарадиинаң литература сыйыхтарына ікі писатель турысхан. Моисей Баиновтың адынаң литература сыйии (поэзияда) пирілген Россияның писательлер трігізінің араласчызы, поэт Сергей Майнагашевке, литературадағы сола ады - Сибдей Том. Сыйыхты ол «Хан тигірні сӧс ооғаснаң тіреп» кибелістер чыындызы ӱчӱн алған. Чоохтирға кирек, Сибдей Том позының чайаачы тоғызында хаӌан даа тілегде. Кибелістерні полған на сай наа оңдайнаң пазарға кӱстенче. Орыс таа паза хакас таа тіллерінең пасча.
Николай Доможаковтың адынаң литература сыйиин (прозада) алған Россияның писательлер трігізінің араласчызы, саблығ хабарӌы Юрий Абумов. Аның орыс тілінең пазылған книгазы «Ведьмина коса» адалча. Юрий Абумовтың позының чайаачы оңдайы. Ол пай тілліг паза полған на сӧзі сӱзӱнніг. Аның пазылған чоохтарын паза очерктерін хығырарға оой даа полза, кізіні тирең сағыстарға тӱзірче.
Поэт Сергей Майнагашев алай ба Сибдей Том республиканың «Хакас чирі» газетазында сайт пӧлиинең устап парча. Мин, оңдай полғанда, аның кабинедінзер кіріп, алғыстаам паза пу сыйых ағаа ниме пирчеткенінеңер сурғам.
- Хакасияда мындағ сыйыхтар иділчеткеніне уғаа ӧрінчем, - чооғын пастаан ол. - Россияда литература сыйыхтары кӧп, че піске, хакас тілінең пасчатханнарға, олар пирілбеҷеңнер дее. Аннаңар пістің республикада литератураҷа алынҷа сыйыхтар кирек ле полған.
Мындағ сыйыхха турысханда, хайди ӧрінмес. Хазна саринаң піди таныхтапчатханы чайаачы кізіні улам кӧп паза тӱзімніг тоғынарға кӧӧктірче. Сынны чоохтаза, мин литература сыйиин ӱр ниместе пас салған «Хан тигір кимезі» медиа-роман ӱчӱн аларҷыхпын. Хакасияда мындағ чайаачы тоғыс пастағызын на полар. Минің алнымда «Таң солбанында тоғазығ» кибелістіг романны пістің саблығ поэт Моисей Романович Баинов ла пас салған. Анда ол кибелістердегі аймах жанрларны піріктіріп алған. Пар анда кип-чоохтар, сарыннар паза тахпахтар, чоохтазығлар паза даа аннаң пасхазы.
Амғы туста прайзының даа компьютер пар. Олар книгаларны анда хығырчалар. Компьютер пастыра кибелістерні посха хығырып, видео алай сомнар хоза кӧзідерге чарир. Медиа-романда ідӧк тілнің аймаанаң тузаланчазың.
Минің кибелістіг медиа-романымның ӧӧн матыры поэт полча. Ол чуртастың ӧӧн сағызын пілер ӱчӱн кӧгҷізер, хоосчызар, ухаанҷы ипчізер, хайҷызар, анаң халғанҷызында Худайзар килче. Поэт Худайнаң чоохтасча. Анаң чуртаста Тенгринің он чахиинча чуртаза, кізі ӱлӱзі сайбалбин иртче. Ол ӧӧркілер кӧзіткен чолҷа парча, - тіпче Сибдей Том.
Автор :
Илья ТОПОЕВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы