Матырның халғанҷы чолы
Ӱдезiг. Украинада нацизмнең тоғыр иртiрiлчеткен чаа операциязында, махачы чаалазып, чуртазын пир салған чир-суғҷыбыс Егор Кадочниковты Ағбанда халғанҷы чолына ӱдескеннер
Ағбанда Кожевеннай орамадағы халғанҷы чолға ӱдесчең улуғ залда чон толдыра чыылысхан. Анда Украинаны нацисттер холынаң позыдар паза аның тирiглерiн чох идерiнҷе ӧнетiн чаа операциязы иртiрiлчеткен туста, махачы чаалазып, чуртазын пир салған чир-суғҷыбыс, лейтенант Егор Кадочниковты халғанҷы чолына ӱдескеннер. 24 частығ офицер, матыр чаалазып, Украина чирiнде чуртазын пир салған.
Ол, чаа училищезiн тоозып, службазын Алтынзархы Осетияда, Владикавказта орныхчатхан чааҷылар частьында, узаратхан. Ӱстӱнзархы чаа округының радиоэлектроннай кӱрезiг апарҷаң алынҷа батальонында автомобильлер службазының пастығы полған. Украинада ӧнетiн чаа операциязы пасталғаннаң cығара чааҷы службазын анда толдырған.
Ағбанда ирткен хомзыныстығ мероприятиеде араласханнар Хакасия пазы Валентин Коновалов, правительство паза Ӧӧркi Чӧп кiзiлерi, Ағбан город пазы Алексей Лёмин, городтың чааҷылар комиссары Сергей Кибирев, военкомат тоғынҷылары паза даа пасха кӧп кiзi. Траур митингi пасталғанда, микрофонзар Хакасия пазы сыххан.
– Пӱӱн прай Хакас чирiнде чобағ кӱнi. Пiс чир-суғҷыбысты, Егор Кадочниковты, чiдiр салдыбыс. Ол Украинада иртiрiлчеткен ӧнетiн чаа операциязында чааҷы службазын толдырған. Пiстiң амыр тигiрiбiс ӱчӱн, Донбасстағы амыр чуртағҷылар ӱчӱн, Украинаның амыр чуртағҷылары ӱчӱн чаалазып, матыр чiли чуртазын пир салған. Туған-чағыннарының, Егорны пiлген прай кiзiлернiң чӱректерiндегi чобағны ӱлезер сӧстер дее табарға сидiк. Пӱӱн прай Хакасия сiрернең хада чобалча.
Мындағ айдас кiзiнi, сын чааҷыны, Ада чир-суубыстың патриодын ӧскiрiп алған паба-iҷезiнiң алнында пазыбыс тӧбiн тӱзiрчебiс. Улуғ хомзынызымны читiрчем. Республика правительствозы Егорның хумартхызын хаҷанға даа хайраллирына, аның матыр тудынызы хаҷан даа ундудылбазына прай ниме идер. Ол офицер полчатхан адын позының чуртазының халғанҷы секундаларына теере турыстыра апарған. Аның матыры хаҷан даа ундудылбас, сабланыс ағаа хаҷанға даа, – таныхтаан Валентин Коновалов.
Ол, хомдызар чахайахтар салып, Егор Кадочниковтың паба-iҷезiнзер, ипчiзiнзер, туғаннарынзар иртiп, полғанын на хуҷахтап, хомзыныс сӧстерiн читiрген.
Траур митингiнде iдӧк, чоох тудып, хомзыныс сӧстерiн читiргеннер Ағбан город пазы Алексей Лёмин, Хакасияның Ӧӧркi Чӧбiнiң бюджетче паза налогтарҷа комитедiнің кнезi Олег Иванов, Ағбанның чааҷылар комиссары Сергей Кибирев, Егор ӱгренген Ағбандағы 9 № школаның директоры Александр Конев, Егорның чағын арғыстары Никита Мирошниченко паза Андрей Новиков.
Россияның паза Хакасияның гимннерi толдырылған, чыылысхан чон, матырны ӱдезiп, веноктар, чахайахтар салған соонда, Егор Кадочниковты Ағбандағы сыыраттың чааҷылар пӧлиинде чыып салғаннар. Чааҷылар, аны халғанҷы чолына ӱдезiп, автоматтардаң залпнаң киизер атып, салют иткеннер.
Егор Кадочников махачы чааласхан ӱчӱн хазна сыйии Мужество орденiнең сыйыхтатхан (ӱреен соонда).
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |