шахтёрның тоғызы аарласта
28 августта – Шахтёр кӱні. Чыл сай орғах айының халғанҷы тынағ кӱнiнде Харатасчы кӱнi таныхталча
ХУБАЧАР ЧУРТАҒҶЫЗЫ ЛЕОНИД КИЛИЖЕКОВ 19 ЧЫЛ ЭКСКАВАТОР МАШИНИЗI ПОЛЫП ТОҒЫН САЛҒАН. ПРАЙ ПУ ЧЫЛЛАРДА ОЛ ХАРА ТАС АНЫПЧАТХАН РАЗРЕЗТЕРДЕ IСТЕНГЕН: ЫЗЫХТАҒЫ, IСКЕРКI-ПИИ ПАЗА КИРБIДЕГI. ХАЛҒАНҶЫ ТӦРТ ЧЫЛ КИРБIДЕГI РАЗРЕЗТЕ ТОҒЫНЧА. ОЛ «РУССКИЙ УГОЛЬ» КОМПАНИЯНЫҢ ХОЛЫНА КIРЧЕ.
Леонид Килижеков Пии аймаандағы Алахтайлар аалында 1979 чылда тӧреен. 1989 чылда сӧбiрезi Хубачарзар кӧскен. Аның чооғынаң, пу тоғысха ол усанабас килген. 1995 чылда Хубачардағы ортымах школаны тоозыбызып, тӧрт чыл пӱдiрiгде тоғынған, анаң iкi чыл – Хубачарда колбасалар итчең цехта.
– ПӰДIРIГДЕ ТОҒЫНҒАНДА, ХАДА ТОҒЫНЧАТХАН АРҒЫЗЫМ, ПАС ЧӦРЧЕТКЕН ЭКСКАВАТОР МАШИНИЗI, МАҒАА ЭКСКАВАТОР МАШИНИЗIНЕ ӰГРЕНIП АЛАРҒА ЧӦП ПИРГЕН. 2002 чылда чонға тоғыс тапчаң кiн пастыра экскаватор машинизiне ӱгренiп алғам. 2003 чылда Ызыхтағы разрезсер тоғынарға килгем. Анда иң ӱр тоғынғам – 11 чыл. Ызыхтағы разрезте тоғынчатханымда, Ағбанда политехническай колледжте заочно ӱгренгем. Анда «Чол, пӱдiрiг паза таарлағ техниказынаң тузаланары» специальность алғам. Хара тас аныпчатхан тоғыс пӱдiрiгдегiзiнең аар нимес сағынчам. Пу тоғыс аар даа полза, ол аарласта. Чал ахчазы пӧзiк. Че кiзi хазиина хомай теелчеткен тозын паза тітірестер полча, уламох хаҷаннаң тоғынчатхан разрезтерде. Пастап мин ЭКГ экскаваторнаң тоғынғам. Ол 1980 чыллардох пiстiң хазнада сығарылған. Аның тоғынҷаң тузы хаҷанох ирт парған полған, че олар ам даа тоғынчалар. Пас чӧрчеткен экскаваторлар аразында даа 30 чыл азыра тоғын салғаннар илееде пар. Халғанҷы ӱс чыл Hitachi ЕХ1200 экскаваторның рульы кистінде одырчам. Ол дизель топливозынаң тоғынча. Анда электроника пары тоғысты нииктепче. Ӱс чыл тоғын салған соонда экскаваторны тиксi нааҷылирға киректелче. Амды ол тыхтағда турча. Тыхтағнаң сервис кiнi айғасча. Тоғыс тузында экскаватор сайбал парза, посха даа тыхтирға килiс парча. Хырығ озаринда сығарылған экскаваторларны тыхтирға оой паза табырах. Пiстiң хазнада сығарылғаннар сайбалза, тимiр хабыстырҷаң тоғыс кӧп полча. Олар удаа тыхтағ киректепчелер, – теен Леонид Килижеков.
Аның бригадазында пис экскаватор машинизi iстенче. Пiр смена 12 час тоғынча. Ол тус аразына экскаватор машинизi 3 – 6 муң кубометр чир, сай паза хара тас тастап саларға кирек. Разрезте чиит тоғынҷылар илееде. Оларның хай пiреезi стажировканы Леонид Килижековтың устаанынаң иртче.
– Наа ла тоғынарға килгеннернi ӱгретчем. Оларның кӧбiзi предприятиеде тоғынарға халча. Экскаватор машинизiне ӱгренiп алғаны читкіҷе нимес, iдӧк тоғысха хынарға кирек. Хараа тоғынарға килісче. Че iстенер кiзi хараа даа тоғынарға ӱгрен парча. Пу тоғыс кӧңнiме кiрче. Аар полыбысса, пасха профессияа ӱгренiп аларбын, тоғысты алыстырыбызарға хаҷан даа орай нимес, – сағыстарынаң ӱлесче Леонид Килижеков.
«Русский уголь» компания, ирткен чылның салтарларын идiп, иң чахсы тоғынҷыларын таныхтапча. 2021 чылның салтарларынҷа, Кирбiдегi разрезтiң бригадазы чиңiсчiлер санында полыбысхан. Таныхтирға кирек, пу марығда «Русский уголь» компанияның Амур облазында, Хызылчар крайында паза Хакасияда орныхчатхан разрезтерiнiң прай тоғынҷылары араласхан.
Леонид Килижековтың бригадазы иң чахсы алты бригада санында пол парған. Хада тоғынчатхан экскаватор машинисттеріне ахчалығ сыйыхтар пиргеннер, Леонид Килижековха – Нива Тревел автомобиль. Ол, ағаа сыйлалған машинаны садыбызып, ахчаны прай бригадаа ӱлестірібіскен.
Чағдапчатхан Харатасчы кӱні алнында Леонид Килижеков хада тоғынчатханнарын алғыстаан:
– Хада тоғынчатхан арғыстарымны Шахтёр кӱнінең алғыстапчам. Прайзына пик хазых, тоғыста пӧзік чидіглерге чидерге паза амыр чуртас алғапчам!
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |