КУЛЬТУРА ТУРАЗЫНА – НАА ТИРIГЛЕР
Танығлығ кӱн. 22 августта Таштыпта Россия Флагының кӱнiн таныхтааннар. Олох кӱн Культура туразы наа аппаратураның презентациязын иртiрген
Иртеннең Культура туразының хыринда флагтар чалбырапчатханы кӧрiнген. 12.00 часта волонтерлар, аалҷа чӧрiп, ӱс ӧңніг чаламаларны паза флаерлернi тарадып пастааннар. Иирзер «Россияның ӧңнерi» квест, устарның флаг ӧңнерi чаламаларынаң ниме-ноо идер кӧзiдiглерi ирткен, полған на кiзее Россия флагынаңар паза чир-суубыстаңар кибелiстерні микрофон пастыра хығыр пирерге оңдай полған. Iдӧк артисттер, ӧмелер теелбек-сарыннарынаң ӧріндіргеннер.
Олох кӱнде Культура туразы тастындағы сценада музыка аппаратуразының презентациязын иртiрген. 2019 чылда ол субсидия аларына айланыс пiчиин пасхан полған, хайзы «Кічіг чир-сууның культуразы» федеральнай проектке кiр парған. Культура туразына 1 млн 650 муң 424 салковай пирiлген. Ол ахчаа оргтехника, кӧзiдiглерге киректелчеткен ӧнетiн тирiглер, музыка аппаратуразы (1 миллион салковай артиинаң сых парған) алылған. Наа тирiгнiң морсыныстығ тоғызын Хураған аймаанаң килген «Пати-Бум ШОУ» ӧме кӧзiт пирген. Ырлар толдырылчатханда, наа музыка тирiглерi пӧзiк синде тоғынчатханы сизiнiстiг полған.
Чыылысхан улусты пайрамнаң Хакасия Ӧӧркi Чӧбiнiң депутады Наталья Кокорева, республиканың культура министерствозының амғы искусство пӧлиинiң устағҷызы Валентина Лебедева паза Таштып аймааның устағ-пастаа алғыстааннар.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |