Ӱс тӧлнiң тархыны
Пресс-конференция. А.М.Топановтың адынаң Хакас национальнай драма театрында «Хуу инейнiң тӧлi» наа ойынның тимненiзi хоостыра чыылығ ирткен
Пылтыр театр, хайҷы-нымахчы П.В.Курбижековтың «Алтын Арығ» алыптығ нымаанҷа проект тимнеп, Президент грантын утып алған. Ол чайаачы ӧменiң матлама тоғызының чидии полча. Президент грантының синi – 1 миллион 855 муң салковай.
Пу проект пӱӱл январь айдаң сығара чуртасха кирiлче. Ойын «Алтын Арығ» алыптығ нымах хоостыра турғызылча. Пьесаны Россияның паза Хакасияның саблығ артизi, Хакасияның чон артизi Татьяна Майнагашева пас салған. Хакасияның чон артизi, республика искусствозының саблығ деятельi Юрий Майнагашев режиссёр-постановщик полча. Хакасиязар Москвадаң хоосчы-постановщик Екатерина Ряховская ӧнетiн хығыртылған. Пiстiң республикада ол пастағызын на тоғынар. Проекттiң композиторы Аржан Туденев полча. Прай пу тоғысты Хакас национальнай драма театрының ӧӧн режиссёры Тимур Казнов хайығда тутча. Чарытхы хоосчызы Андрей Зозуля полар. Ол Новосибирск городтаң килер. Хореограф Анастасия Быдышева спектакльға теелбектер тимнепче.
– Пiccсер Екатерина Владимировна килгенiне ӧрiнчебiс, – хоосчы-постановщикнең таныстырып, теен ӧӧн режиссёр Тимур Казнов. – Москвадағы хоосчыларны пеер тартып аларға оой ла нимес. Оларның анда даа тоғыстары пас азыра. Че андағ даа полза, Екатерина Хакасиязар килдi. Пic ағаа хайхастығ Кӱн тағны кӧзiт пиргебiс.
– Кӱн тағ – уғаа сiлiг орын, – хозылған Тимур Тамерлановичке Екатерина Владимировна. – Анда улуғ городтаң тынанып, кӱс алынып алғам.
Пресс-конференцияда Екатерина Ряховская сцена хайдағ поларын чарытхан. Анда потолоктаң сығара полға теере 12 улуғ ах ис iлiнер. Ойын тузында олар аар-пеер чылдырыл чӧрерлер. Истернi тӱнее ле тiк салғаннар. Пiрсi iлiлiк. Ойында истер обааларны таныхтирлар. Аннаңох хакас ибiҷек тимнелер. Ойын киртiстiг парар ӱчӱн, улуғ тоғысты чарытхы хоосчызы толдырар. Спектакльда iдӧк кӧлектернең ойнирлар.
– «Алтын Арығ» алыптығ нымах хакас чонның фольклор ис-пайының иң чахсы произведениезiнiң пiрсi полча, – чоох тутхан Татьяна Андреевна. – Фольклор чонның кибiр-чозахтарын, тiлiн хайраллапча. Хакас чон пурунғыдаң сығара пазылбин пӱткен чайаачызын тӧлдең тӧлге пирҷең. Олғаннар хайҷыларны хынып исчеңнер. Илбек хайҷы-нымахчыларның пiрсi Пётр Васильевич Курбижеков полған. «Ай Хууҷын» паза «Алтын Арығ» алыптығ нымахтарны Хакасия науказының саблығ деятельi Валентина Евгеньевна Майногашева орыс тiлiне тiлбестеп салған. Пу улуғ тоғыстар тилекей литературазына кiр парғаннар. Хакас алыптығ нымахтардаңар прай чир ӱстӱнде пiлiп алғаннар. Саблығ учёнайлардаң чылығ ӱндезiглер килген. Ойында ӱс тӧлдеңер чоохталча. Ӧӧн матырның пiрсi Хуу иней полча. Ол ах пӱӱрге, хара тӱлгее, хара хусха хубулча. Ол худын Алтын Арыға артыс салча. Анзы чир-суун арачылирға ах хайадаң сыхча. Ханнығ Хылыс ӱзiнҷi тӧлнiң арачылағҷызы полча.
Ойын кӧглернең чазалча. Пресс-конференция тузында пiр кӧгнi ойнат пиргеннер. Аны иссе, пурунғы туссар алай хайдағ-да пасхаҷыл чирзер кiр парғанға тӧӧй пiлдiрче. Аржан Туденев – кӱстiг композитор. Аның кӧглерiн иссе, ачын аң-хустың омалары даа харах алнында кӧрiнче.
– Кӧглернi амғы тусха килiстiре, Голливудтың фильмнерiндегi саундтректерге тӧӧй арах ползын тiп пазарға кӱстенчем, – чоохтаан Аржан Туденев. – Чаалазығларны, харбазығларны, аң-хустың тудынчатхан оңдайларын хайыға алчам.
Артисттер 18 августтаң сығара репетициялар иртiрчелер, театр тоғынҷылары сценаны тимнепчелер. Тун ойын октябрь айның 28-29 кӱннерiнде полар.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |