ПИЛТІР ТИЛІЗІН
Аал кӱні. Ирткен неделяда Асхыс аймаандағы Пилтір аал тӧреен кӱнін таныхтаан. Ӱлӱкӱнде республиканың паза Асхыс аймааның ӱлгӱ тоғынҷылары араласханнар
Таныхтирға кирек, Пилтір аал – республиканың чиит аалларының пірсі. Пӱӱл ағаа 71 чыл толған. Чазылар паза арығлар аразында, амыр суғ ахчатхан орында 1951 чылда пастағы туралар пӱдірілген. Чылдаң чылға аал алғым полып одырған, наа чурттар турғызылған. Тоғысчылар пеер прай хазнадаң кил турғаннар. Аны хоостыра наа туралар пӱдірілгеннер. Амды мында улуғ паза сіліг аал турча.
Аал чуртағҷыларын паза аалҷыларны алғыстирға Пилтір аал чӧбінің пазы Виталий Капустин сыххан. Аның таниинаң, Пилтір аал ағас тимнепчеткеннернің аалы чіли пӱт парған. Аал чарых паза хомзыныстығ чылларны тобырған, че хаҷан даа чуртағҷыларынаң сабланған. Пилтірде саблығ ветераннар чуртапчалар, аймах тоғыстарда профессияа сын кізілер істенчелер, таланттығ чииттер чахсы чидіглерге читчелер.
Пилтірде аал тилізіне улуғ хозым иткен кізілер чуртапча. Аал чуртағҷылары оларны чахсы таныпчалар, оларзар улуғласнаң айланчалар. Аалның аарластығ чуртағҷыларын алғыстирға республиканың Ӧӧркі Чӧп депутады Роман Челтыгмашев сыххан.
– Мағаа Пилтір аалның аарластығ чуртағҷыларын алғыстирға ӱлӱс тӱскен. Олар аал тӧстелгеннең мында чуртапчалар, 1951 чылдаң Пилтірде хайдағ киректер полғанын кӧргеннер. Улуғласнаң тузаланчатхан кізілерні хайди даа таныхтирға, ундутпасха кирек, – теен Роман Абрекович. – Пилтірнiң аарлығ чуртағҷылары, прай чӱреемнең сірерні Аал ӱлӱкӱнінең алғыстапчам. Пу пайрам чыл сай таныхталча, халғанҷы чылларда уламох алғым. Аның ӱчӱн аал чӧбі устағ-пастаана улуғ алғыс.
Роман Челтыгмашевтің сӧстерінең, пӱӱл Асхыс «Аалларның тиксі тилізі» хазна программазына кірiп алған. Пу чағында Пилтір аалны пу программаа кирерінҷе пічіктер тимнеліп пасталды. Аны хоостыра аалның социальнай объекттерінде тиксі тыхтағ тоғызын иртірібізерге пӧгін турча. Имнег туразы кӧп чыл нааҷылалбаан, аннаңар Пилтір аал хазна программазына кір парарына ізенерге кирек.
Асхыс аймааның депутаттар чӧбінің кнезі Александр Челтыгмашев, сценаа сығып, таныхтаан:
– Пӱӱн піс тӧреен аалымның пайрамын таныхтапчабыс. Мында мин олған садына, школаа чӧргем, мындох іҷем паза арғыстарым чуртапчалар. Полған на кізінің чир-суу тӧреен аалынаң пасталча. Ағаа истіг чуртас, тиліс алғапчабыс. Прайзының чуртазында чарых киректер удаа ползын. Аалыбыс чылдаң чылға ӧңнензiн.
Пӱӱл Пилтір аалда 40 ыңааҷах тӧреен. Оларның паба-іҷелерін алғыстирға Роман Челтыгмашев сыххан. Аның чооғынаң, халғанҷы туста пала асхынах тӧрiпче, аннаңар пір чыл аразына аалда 40 иркеҷек тӧреені ӧріндірче. Наа тӧрееннер паба-іҷелеріне ӧрініс сыйлазыннар.
Ідӧк аал чуртағҷыларын Ӧӧркі Чӧп депутады Евгений Челтыгмашев алғыстаан. Ол аалның ӧткін чуртағҷыларына сыйыхтар читірген. Аннаң пасха, ӱлӱкӱнде профессияҷа иң артыхтарны паза аалның таңдағызына ізеніс пирчеткен чуртағҷыларны чеестееннер.
Концерттең пасха, пайрамда мини-футболҷа марығ ирткен. Арға-мӧрійге тӧрт команда сыххан. Хазыр харбазығда Таштып пилтірі аалдаң килген команда чиңіс тутхан. Финалда ол марығ ээзі полған Пилтір аал командазынаң тоғыр турысхан. Ойын 1:1 саннаң тоозылған. Хоза пирілген туста командалар кӧрігҷілерні голларнаң ӧрiндірбееннер. Іди командаларға пенальти теберге киліс парған. Мында аалҷылар 3:2 саннаң чиңіс тутханнар, алтын медальларны холға киргеннер.
Кӱн тооза Пилтір аалда сарыннар паза кӧглер чайылған. Чайаачы ӧмелер чуртағҷыларны ідӧк теелбектернең ӧріндіргеннер.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |