НАА ӰГРЕДІГ ЧЫЛЫ - НАА ПІЛІСТЕР
07.09.2022
Хабарлар
Пастағы саң. Ӱртӱн айының 1-ғы кӱнінде школалар олғаннарға ізіктерін асханнар. Ис пилтірі аалда парталар кистіне 110 ӱгренӌі одырған
Чалахай чайғы тузы табырах ирт парған, арығзар чӧріс, чир-суубысча экскурсиялар киҷеегі кӱнде халдылар. Пӱӱл М.Г.Торосовтың адынаң Ис пилтіріндегі ортымах школазар 1-ғы классха пис олған килген. Оларға пастағы Піліс кӱні уғаа чӱрексіністіг ирткен. Пайрамнығ мероприятиеде олғаннарны алғыстирға школа директоры Надежда Чебодаева сыххан:
- Піс ӱгренҷілерібіске поғдархапчабыс, олар хынған вузтарзар кіріп алғаннар. Пір оол школабысты алтын медальға тоосхан. Ол иң улуғ поғдархазыбыс полча, 1 - 11 класстарда пістің школабыста ӱгренген. Прайзыңарға ідӧк маңнаныстығ ӱгренерге алғапчам. Пастағы класс ӱгренҷілері, сірерні. 11 ӱгредіг чылы сахтапча. Ӱгредігні турыстыра иртібізіңер. Чидіглеріңнең ӱгретчілеріңні, паба-іҷеңерні ӧріндіріҷер. 9-ҷы паза 11-ҷі класстарны тоосчатханнарға ӱгреніске нандырығлығ хайарға алғапчам. Ӱгредіг салтарларынҷа алар пічіктерің - таңдағы чуртазыңарға билет. Чахсы ӱгредіг алып алзаңар, тоғызыңар ідӧк чахсы парар.
Чооғын тоозып, Надежда Ильинична школа ветераннары Алевтина Карповна Чебодаеваа паза Агафья Егоровна Топоеваа сыйыхтар читірген. Пӱӱл Ис пилтіріндегі школазар чиит ӱгретчілер килгеннер. Математика ӱгретчізі Элеонора Валерьевна Чертыгашева 5-ҷі класстың устағҷызы полча. Ідӧк пӱӱл школада англия тілінің ӱгретчізі Полина Иннокентьевна Сандыкова тоғынар.
Паба-іҷелер адынаң Жанна Кыржинакова чоох тутхан. Пӱӱл аның оолағы Антошка Асхыстағы лицейдең Ис пилтірінзер 2-ҷі классха килген. Пу ӱгредіг чылы чахсы киректерге пай ползын, ӱгренҷілер ынағ чуртазыннар, чахсы ӱгрензіннер, таңдағы кӱнге ізеніснең кӧрзіннер тіп алғаан.
Чайғы тооза олғаннар школаның ӱӱчігінде тоғынғаннар. Прайзы чир тамаан мааннап ӧскірген сылтаанда ӧзімнер сығызы чахсы. Чайғы ирт парғанда, парталар кистіне одырар тус читкен. Ӱртӱн айының пайрамнығ линейка тузында 1-ғы класс ӱгренҷілері, прайзының алнынзар сығып, кибелістер хығырғаннар. Ідӧк 11-ҷі класс ӱгренҷілері нандырығлығ чоох тутханнар. Олар, ирткен 10 чылны сағысха киріп, школаа паза ӱгретчілеріне алғыс сӧстерін читіргеннер.
Алғыстастар соонаң пастағы саңны 1-ғы класс ӱгренҷізі Ангелина Чебодаева паза 11-ҷі класс ӱгренҷізі Максим Чаптыков сыңыратханнар. Анаң Ис пилтіріндегі школаның директор орынҷызы Нелли Чертыгашева, прайзын наа ӱгредіг чылы пасталғанынаң алғыстап, ӱгренҷілерге турыстыра ӱгренерге, 9-ҷы паза 11-ҷі класстардағы оол-хыстарға школаны чахсы аттестаттығ тоозарға алғаан. Паба-іҷелер палаларына полыссыннар, ӱгретчілер наа чидіглерге читсіннер. Чооғын тоозып, Нелли Степановна тоғыс оңдайларын чарыт пирген.
Пайрамнығ линейка тоозыл парғанда, олғаннар класстарынҷа тарааннар. Анда оларға класс частары ирткен. Наа ӱгредіг чылында школа хайдағ оңдайда тоғынарын директор Надежда Чебодаева чарыт пирген. Кадрлар сурии кӧп школада ағырсымнығ полча. Ол санға Ис пилтіріндегі школа кірче. Пӱӱнгі кӱнге школада биология-химия ӱгретчізі чоғыл. Амды пу орынға магистрант килген. Че мында пасха сурығ сығысча: студенттер чиит специалисттерге саналбинчалар, аннаңар оларға хоза тӧлеглер пирілбинче. Олох туста студентке ӱгренерге чӧрерге килізер. Математика ӱгретчізі ідӧк магистратурада ӱгренче. Орыс тілі паза литература предметтерін апарарға тынағдағы ӱгретчі сыххан. Англия тілінің ӱгретчізі тынаға парыбысхан. Аның орнына чиит специалист килген. Ӱгретчілерге чал ахчазы наа оңдайнаң тӧлел сыхханда, чииттерні кічіг школаларда тут халарға сидік.
Чурт сурии ідӧк ағырсымнығ полча. Амғы туста Ис пилтіріндегі школаның чиит специалисттеріне чурт пӱдірілче. Че ол орында кізі сӧӧктері табыл парғанда, пӱдіріг тоғыстары тохтап парған. Пӱӱл Ис пилтіріндегі школаның алнында Россия флагы турғызылған. Ол ӱгренҷілерні чир-суубыстаңар ӱгредерге кӧстелген. Совет Союзы тузында школаларда политика сурығларын чарытчатхан уроктар иртірілген, амды неделя сай патриотизм уроктары иртер.
Пӱӱл школаларда наа ӱгредіг стандарты кирілче. Ис пилтірінде ағаа 1-ғы паза 5-ҷі класстар кірчелер. Ідӧк ирткен чылда школа «Ӧзіс орны» программаа кір парған. Аны хоостыра школаа компьютерлер паза информатика кабинедіне оборудование пирілген. Анзы ӱгренҷілерге проект-істезігліг тоғыстар апарарға чахсы хабазығ полча.
Чиит ӱгретчілердеңер чоохты узаратса, Элеонора Чертыгашева пӱӱл ИЕНиМ-ның бакалавриадын тоос салған, магистратуразар ӱгренерге кіріп алған. Специальность хоостыра математика паза информатика ӱгретчізі. Ідӧк Элеонора Валерьевна 5-ҷі класстың устағҷызы полча. Аның холында 16 пала ӱгренче.
- Тӧреен-ӧскен чирім Асхыс аймаандағы Таштып пилтірі аал полча. Ис пилтірінде тураны арендаа суурарбын. Таныхтирға сағынчам, Ис пилтіріндегі школада мин алтынҷы класста ӱгренгем. Тоғызынҷы классты Таштып пилтірінде тоосхам, ортымах ӱгредіг аттестадын Асхыстағы лицейде алғам. Ис пилтірінде ӱгренчеткенімде, піс иргі школазар чӧргебіс. Амғы школа кӧңніме кірче. Тоғысха тимдебін, школа ӧмезінең ӱгренҷілерімнең танызып алғам, - чоохтапча Элеонора Валерьевна.
Наа ӱгредіг чылы пасталғанда, ӱгренҷілер наа чидіглерге читсіннер, паба-іҷелерінің паза ӱгретчілерінің поғдархазы ползыннар.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде