ЧАРЫХТАҢ ХАЙДАҒ ДАА ЧЫПЛАМА ХАРАСХЫ ХОРЫХЧА
07.09.2022
Хабарлар
Чииттерге сынны кӧзітчелер
Кӧзідіг. Терроризмнең тоғыр кӱрезігде пір чӧптіг тудынары кӱнге чарыдып, Л.Р.Кызласовтың адынаң Хакас национальнай чир-суғ ӱгренҷең музейде «Украина нацисттерінің Донбасстағы сайбағларының киречілері (2022 чыл)» кӧзідіг азылған
Кӧзідігде Украинадағы нацисттердең позып алған Луганск паза Донецк республикалар чуртағҷыларының сомнары 17 планшетте сығарылғаннар. Олар Украинаҷа халых трибуналының тоғызы тузында тимнелгеннер. Нацисттернің холынаң позыдылған аал-городтарның 350 азыра киречізі пос хараанаң кӧрген искірігнең ӱлескен.
Сигіс чыл изере Донбасстағы чаалазығлар тузында Россияның чоннар аразындағы халыхчылары, право хайраллаҷаңнар, хабарҷылар Украинадағы нацисттернің прай сайбағларын санға алғаннар. Донбасстағы чобағлар тузында Европадағы кізі правозынҷа чарғызар 6000 азыра хоп пічии ызылған. Че пір дее пічік чарғыда кӧрілбеен. Россиядағы чоннар аразындағы халыхчылар, хабарҷылар паза политологтар, нацисттернің чабал кӧрістерінең чараспин, пӱӱл февраль айда Украинаҷа чоннар аразындағы халых трибуналын тӧстирге чӧптезіп алғаннар. 1 мартта Чоннар аразындағы конференцияда Россия президентінің хайииндағы кізі правозынҷа чӧп паза Россия Федерациязының Халых палатазы ол трибуналны тӧстирге чарадығ алғаннар. Анда 20 хазна араласхан.
Кӧзідігде Хакасия пазы Валентин Коновалов, республиканың Ӧӧркі Чӧп кнезі Владимир Штыгашев, Хазна Думазының депутады, Россияның коммунисттер партиязының ӧӧн комитеді кнезінің пастағы орынҷызы Юрий Афонин, Росгвардияның, МВД-ның, УФСИН-ның кізілері, Юнармия паза кадеттер араласханнар.
- Пу кӧзідіг піске тың кирек, - чоох тутхан регион пазы. - Ол республиканың паза хазнаның чуртағҷыларына тархындағы сынны чоохтапча. Кидеркі искірігліг чаа, Украинадағы паза Донбасстағы киректердеңер тайма хабарлар чонға читіріп, тархынны путхапча.
Проект 2022 чылның азығ айынаң сығара, Украинадағы нацисттернің холына кіріп, чаа сайбағларында хыйалны кӧрген кізілернің киречілернің паза пленге кірген чааҷыларның сын искіріглері хоостыра тимнелген. Ол тоғысты Украинаҷа чоннар аразындағы халых трибуналы апарча. Андар 20 азыра хазна кірче, ол санда Германия, Канада, Франция, США, Польша, Турция, Израиль.
Нацисттернің 21 чӱс чылда піди хайнап сыхханы ачырғандырча. Оларны ирткен чӱс чылдағы Германиядағы нацисттернің тархыны пір дее нимее ӱгретпиндір. Пӱӱнгі кӱннерде піс пазох ол чабал киректерге тоғасчабыс. Че чарыхтаң хайдағ даа чыплама харасхы хорыхча. Мындағ кӧзідіглер паза чӧрімнер иртіріп, піс сынны искірчебіс. Чабалны хада хайди даа тохтадып аларбыс, пу харбазығны чиңіп аларбыс! Пістің пасха чол чоғыл! Сайбағҷылар хайди даа нандырыға тартылар!
- Пӱӱнгі кӱнде харындас чоныбыстың хазназы, Украина, Россиядаң тоғыр кӱрезігнің ӧӧн орны пол парды, - теен Хакасияның Ӧӧркі Чӧп кнезі Владимир Штыгашев. - Піс кибірлерібісті, кӧрістерібісті, киртінізібісті хайраллап халар ӱчӱн харбасчабыс. Украинадағы ӧнетін чаа операциязында Россия войскозында 100 азыра аймах чон араласча.
Россия, Донбассты арачылап ала, нацисттердең позыдылған аал-городтарны, хатап пӱдіріп, азахха турғысча. Пӱӱнгі кӱнде пістің хазнаның полған на регионының предприятие-организациялары пӱдіріг материалынаң, ас-тамахнаң, специалисттернең хабазарға кӱстенчелер.
«Украина нацисттерінің Донбасстағы сайбағларының киречілері (2022 чыл)» кӧзідіг Хакасияның ӧӧн музейінде пӱӱл чыл тоозылғанҷа тоғынар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде