ВЭФ-2022: РУСАЛ Хакасияда наа завод пӱдiрер
07.09.2022
Хабарлар
Пӱӱн Хакасияның делегациязы VII Ӏскеркi экономика форумында тоғызын узаратча. Хакасия пазы Валентин Коновалов паза РУСАЛ-ның вице-президентi Елена Безденежных iкi чӧптезiгде хол салыбысханнаңар искірче Хакасия пазының паза Хакасия правительствозының пресс-службазы. Чöптезіглернің пiрсi «Хакас технология ойымы» промышленность-сығарыс оңдайлығ алынҷа экономика орнын тӧстир кӧстеглерге теелче. Ол Саяногорск город хыринда орнығар.
Хакасиядағы технология ойымының кӧстеенде пӧзiк синде тимнелген ниме-ноо сығарҷаң наа орыннар тӧстирi кӧрiлче, ол санда алюминийнi сығарчатхан заводтарнаң хости, тимде металл кӧнi читiрiл турар. Чоохтирға кирек, алынҷа экономика орнында санға алылған пiрiгiстерге ӧнетiн налог льготалары паза пасха даа ниик оңдайлар пирiлче.
Тӧстелер «Хакас технология ойымында» «САЯНАЛ» предприятиенiң кӱзiн алғыдары паза чылда 36 муң тонна алюминий лентазын паза чылда 55 муң тонна алюминий фольгазын сығарар заводтың пӱдiрiг проектiн чуртасха кирерi кӧрiлчеткенін таныхтапча РУСАЛ-ның пресс-службазы.
— Алынҷа экономика орнын тӧстеенi республикада сығарысты алғыдар наа инвестиция проекттерiн чуртасха кирер оңдайлар тӧстир. Ол, тiзең, аннаң андар наа тоғыс орыннарын пирер, бюджетсер кiрчеткен налог синi iдӧк ӧзер, - чарытхан Хакасия пазы.
Проектке инвестициялар синi 30 миллиард салковайға паалалча. Предприятиелерде 800 азыра тоғыс орны тӧстелер. Сығарылар ниме-ноо iстiндегi рыноктаң пасха, iдӧк тастында кирексiнiснең тузаланар.
Кӧп чыл РУСАЛ Хакасия правительствозынаң хада тоғынчатхан iзестiг пiрiгiс полча. 2019 чылдаң пасти компания регионның чонға кирек аймах программаларына тиксi 350 миллион азыра салковай позытхан. Ағаа хоза, пу тус аразына РУСАЛ республика бюджедiне аймах тӧлеглернi пис хати ӧскiрiбiскен: 2018 чылда оларның синi 1,49 миллиард салковай полған полза, 2021 чылда – иң кӧп 7,6 миллиард салковай.
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде