ВЭФ-2022: аал хониин хада-пiрге тилiдерлер
07.09.2022
Хабарлар
Ӱртӱн айының 7-ҷi кӱнiнде, Ӏскеркi экономика форумының iкiнҷi кӱнiнде, Хакасия правительствозы паза РУСАЛ республиканың аал хонии промышленнозын тилiдерiнҷе хада-пiрге тоғынарға чӧптес салғаннар. Аннаңар социальнай сетьтерде позының пӧлиинде Хакасия пазы Валентин Коновалов искiрген. Чӧптезiгде ол паза РУСАЛ-ның вице-президентi Елена Безденежных хол салғаннар.
Олар республикада аал хонии сығарызының тӱзiмiн ӧскiрерге, ол санда аал хонииның аймах-пасха кӧстеглерiн хайраллирға, инвестицияларны тартарын айныдарға, предприятиелернiң техниказын нааҷылирға, хыра чирлерiн хайраллирға паза хозарға кӱстенерлер.
– Мал ӧскiрҷең комплекс пӱдiрерге, наа техника аларға, хыра чирлерiн хозарға паза пасха тоғыстар толдырарға пӧгiн турча. РУСАЛ компанияа республика инфраструктуразын тилiдерiне хозым итчеткен ӱчӱн алғызым читiрчем, – таныхтаан Хакасия пазы.
РУСАЛ-ның вице-президентi Елена Безденежных чӧптезiг iкi сарина тузалығ полчатханын таныхтаан:
– РУСАЛ-ның предприятиелерiнiң кӧбiзi улуғ нимес городтар хыринда орныхча. Чуртас синiн чахсыландырар пӧгiннең компания анда туралар, имнег тураларын, поликлиникалар, олған садтарын, школалар, чон тынанҷаң орыннар пӱдiрче, наа сығарыс тӧстелерiне хабасча, ол санда технология ойымын тӧстирiнҷе пастағларның тилiзi полызиинаң. Аал хонии сығарызын тилiдерi, тiзең, компанияның чонға кирек программаларына килiсче, ол РУСАЛ тоғынҷыларын паза пiстiң городтар чуртағҷыларына ниик паалығ чахсы ас-тамах читiрерге полызар.
Республика пазының чарытханынаң, пӱӱл сiлкер айында РУСАЛ «Копьевский» СПК-ның ӧдiстерiн чабысхан. Чоохтирға кирек, аал хонии кооперативi нинҷе-де чыл сидiк оңдайларда тоғынған. Хакасия правительствозы пiрiгiске инвесторны ӧткiн тiлеен. Амды РУСАЛ предприятиенiң сығарызын ӧскiрерге, ниме-нооны сатчаң орыннарны алғыдарға, орындағы чуртағҷыларға тоғыс орыннарын тӧстирге пӧгiнче.
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде