ВЕТЕРАНҒА – ПРЕЗИДЕНТТӀҢ АЛҒЫСТАЗЫ
Улуғ тіл. Хакасияда ӱртӱн айында пайрамнығ тӧреен кӱнін таныхтапчатхан аға-ууҷаларның пірсі чаа кинегі Иван Егорович Шмаков полча
Ӱртӱн айында республиканың узах частығ 21 чуртағҷызы пайрамнығ тӧреен кӱнiн таныхтапча. 90, 95 паза 100 чазын толдырчатхан аға-ууҷаларға президенттің алғыстазы паза Хакасия правительствозынаң танығлығ сыйыхтар читірілче.
Узах частығларның пірсі полча Илбек Ада чаа кинегі Иван Егорович Шмаков. Ағаа 95 час тол парған. Аның тіреен чирі – Хызылчар крайындағы Ермаковскай аймах. Паба-iҷезі колхозта істенген, аал хониинаң айғазып чуртаан. Сӧбіреде тӧрт пала полған. Иван Егорович Хызыл городсар ӱгренерге парыбысхан. Ӱгреніп алғанда, 1944 чылда армияа хабылған. Рядовой полып, ол Япониядаң тоғыр чаада араласхан. Амыр тиңic флодында службазын ирткен. 1954 чылда армиядаң айланған.
Хакасия пазының пастағы орынҷызы Татьяна Курбатова чаа ветераны Иван Шмаковха президенттің алғыстазын паза республика правительствозының танығлығ сыйиин читірген. Ол ветеранға пик хазых поларға, узах чазын узарадарға, чахсы чуртас алғаан.
Iдік алғыстас сістеріне хозылған республиканың істеніс паза социальнай арачыланыс министрінің тоғызын толдырчатхан Андрей Петров.
– Пістің хазнаның ирткен илбек тузы чонның сағызында халар, хаҷан полған нимедеңер піске, Иван Егорович, Сірер осхас кізілер чоохтапчалар. Сірерні тӧреен кӱніңернең алғыстапчам, амыр паза чахсы чуртас, хазых паза часкалығ поларға алғапчам, узах час чазаңар, ибіркі кізілернең улуғлас ползын паза оларнаң пілізіп чуртаңар. Піснең хада полчатханыңар ӱчӱн Сірерге алғызым читірчем! – таныхтаан Андрей Петров.
Юлия Шушакова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |