НАА ЗАВОД 800 ТОҒЫС ОРНЫН ПИРЕР
09.09.2022
Хабарлар
Хакасия пазы Валентин Коновалов паза РУСАЛ компанияның вице-президентi
Елена Безденежных хада-пiрге тоғынардаңар чӧптезiглерде хол салыбысханнар
Хакасия правительствозының делегациязы ӱртӱн айының 7-8 кӱннерінде Іскеркі экономика форумында тоғызын узаратхан. Анда ідӧк Россия президенті Владимир Путин араласхан
ӰРТӰН АЙЫНЫҢ 7-ҷі КӰНІНДЕ ХАКАСИЯ ПРАВИТЕЛЬСТВОЗЫ ПАЗА РУСАЛ ХАДА-ПІРГЕ ТОҒЫНАРҒА ЧӦПТЕС САЛҒАННАР. ІКІ ЧӦПТЕЗІГДЕ РЕСПУБЛИКА ПАЗЫ ВАЛЕНТИН КОНОВАЛОВ ПАЗА РУСАЛ-ның ВИЦЕ-ПРЕЗИДЕНТІ ЕЛЕНА БЕЗДЕНЕЖНЫХ ХОЛ САЛҒАННАР. ПАСТАҒЫ ЧӦПТЕЗІГ «ХАКАС ТЕХНОЛОГИЯ ОЙЫМЫ» ПРОМЫШЛЕННОСТЬ-СЫҒАРЫС ОҢДАЙЛЫҒ АЛЫНДА ЭКОНОМИКА ОРНЫН ТӦСТИР КӦСТЕГЛЕРГЕ ТЕЕЛЧЕ, ІКІНҶІЗІ - РЕСПУБЛИКАДА ААЛ ХОНИИ ПРОМЫШЛЕННОЗЫН ТИЛІДЕРІНЕ. ПАЗА ПІР ЧӦПТЕЗІГ СИБИРЬДЕГІ ФЕДЕРАЛЬНАЙ УНИВЕРСИТЕТНЕҢ ХАДА ИДІЛГЕН. АННАҢАР СОЦИАЛЬНАЙ СЕТЬТЕРДЕ ПОЗЫНЫҢ ПӦЛИИНДЕ ХАКАСИЯ ПАЗЫ ВАЛЕНТИН КОНОВАЛОВ ИСКІРГЕН.
Наа завод пӱдірерлер
«Хакас технология ойымы» промышленность-сығарыс оңдайлығ алынҷа экономика орны Саяногорск город хыринда орнығар. Алынҷа экономика орнында пӧзік синде тимнелген ниме-ноо сығарҷаң наа орыннар тӧстирі кӧрілче, ол санда алюминийдең, ол кӧстеге тимде металл кӧні читіріл турар. Чоохтирға кирек, алынңа экономика орнында санға алылған пірігістерге ӧнетін налог льготалары паза пасха даа ниик оңдайлар пирілче.
Технология ойымында «САЯНАЛ» предприятиенің кӱзі алғыдылар, ідӧк чылда 36 муң тонна алюминий лентазын паза чылда 55 муң тонна алюминий фольгазын сығарар заводтың пӱдіріг проекті чуртасха кирілер.
- Алынҷа экономика орнын тӧстеені республикада сығарысты алғыдар наа инвестиция проекттерін чуртасха кирер оңдайлар тӧстирге полызар. Ол, тізең, аннаң андар наа тоғыс орыннарын пирер, бюджетсер кірчеткен налог сині ідӧк ӧзер, - чарытхан Хакасия пазы.
Проектке инвестициялар сині 30 миллиард салковайға паалалча. Предприятиелерде 800 азыра тоғыс орны тӧстелер. Сығарылар ниме-ноо, істіндегі рыноктаң пасха, ідӧк тастында кирексініснең тузаланар.
Хакасия пазының паза Хакасия правительствозының пресс-службазы искіриинең, кӧп чыл РУСАЛ республика правительствозынаң хада тоғынчатхан ізестіг пірігіс полча. 2019 чылдаң пасти компания регионның чонға кирек аймах программаларына тиксі 350 миллион азыра салковай позытхан. Ағаа хоза, пу тус аразына РУСАЛ республика бюджедіне аймах тӧлеглерні пис хати ӧскірібіскен: 2018 чылда оларның сині 1,49 миллиард салковай полған полза, 2021 чылда - иң кӧп 7,6 миллиард салковай.
Аал хониин тилідерлер
Ікінҷі чӧптезіг хоостыра араласчылар республикада аал хонии сығарызының тӱзімін ӧскірерге, ол санда аал хонииның аймах-пасха кӧстеглерін тилідерге, инвестицияларны тартарын айныдарға, предприятиелернің техниказын нааҷылирға, хыра чирлерін хайраллирға паза хозарға кӱстенерлер.
- Мал ӧскірңең комплекс пӱдірерге, наа техника аларға, хыра чирлерін хозарға паза пасха тоғыстар толдырарға пӧгін турча. Республика инфраструктуразын тилідеріне хозым итчеткен ӱчӱн РУСАЛ компанияа алғызым читірчем, - таныхтаан Хакасия пазы.
РУСАЛ-ның вице-президенті Елена Безденежных чӧптезіг ікі сарина тузалығ полчатханын таныхтаан:
- РУСАЛ предприятиелерінің кӧбізі улуғ нимес городтар хыринда орныхча. Компания чуртас синін чахсыландырар пӧгіннең анда туралар, имнег тураларын, поликлиникалар, олған садтарын, школалар, чон тынанҷаң орыннар пӱдірче, наа сығарыс тӧстелеріне хабасча, ол санда технология ойымын тӧстирінҷе пастағларның тилізі полызии-наң. Аал хонии сығарызын тилідері, тізең, компанияның чонға кирек программаларына килісче, ол РУСАЛ тоғынҷыларына паза пістің городтар чуртағҷыларына ниик паалығ чахсы ас-тамах читірерге полызар.
Республика пазының чарытханынаң, пӱӱл сілкер айында РУСАЛ «Копьевский» СПК-ның ӧдістерін чабысхан. Чоохтирға кирек, аал хонии кооперативі нинҷе-де чыл сидік оңдайларда тоғынған. Хакасия правительствозы пірігіске инвесторны ӧткін тілеен. Амды РУСАЛ предприятиенің сығарызын ӧскірерге, ниме-нооны сатчаң орыннарны алғыдарға, орындағы чуртағҷыларға тоғыс орыннарын тӧстирге пӧгінче.
Нефть тілирлер
Іскеркі экономика форумында Хакасия правительствозы паза пір чӧптезігде хол салды. Ол Сибирьдегі федеральнай университетнең хада иділген. Республика пазы Валентин Коновалов паза университеттің ректоры
Максим Румянцев Хакас Республикада орындағы ис-пай паза сервис кластерін тӧстирдеңер паза тилідердеңер чӧптезігде хол салыбысханнар. Хакасияда Ӱстӱнзархы Минсуғ оймааның Алтай ачығы орныхча, анда аймах оңдайлығ нефть ӱс хадылда пары таныхталча.
Чӧптезігнің пӧгіні - Сибирьдегі федеральнай университеттің технологиялары полызиинаң Хакасиядағы нефтьтіг орыннарны істезері.
Республикада «Хакасия» наука-сығарыстығ полигон тӧстирі кӧрілче. СФУ-ның паза регионның специалисттері республиканың чир ис-пайын нефть паза газ осхас ис-пай парына істезерлер.
- СФУ-наң хада чуртасха кирілер проект Хакас-Минсуғ оймаандағы Алтай ачығында нефть чыындызын паалирға паза мыннаң мындар аны анирынҷа комплексті тилідерге полызар, - таныхтаан Валентин Коновалов.
Чӧптезіг хоостыра чир ис-пайын істезерінең пасха, специалисттернің тимненізін кӧдірері, республика кирексіністерінҷе ӱгредіг программаларын чахсыландырары паза нааларны тимнирі, студенттер практиказын региондағы предприятиелерде иртірері, ідӧк промышленностьты тилітчең ӧӧн кӧстеглерңе наука тоғыстарын пірге апарары кӧрілче.
Автор :
Тимнеен Наталья СЮПТЕРЕКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы