ТАСТЫНДАҒЫ КӦРІМ КӀЗЕЕ ӀЗЕС ПИРЧЕ
09.09.2022
Хабарлар
Ольга МИНДИБЕКОВА
Пӱӱн - Сілігнің чоннар аразындағы кӱні. Пу ӱлӱкӱн чыл сай тилекейнің кӧп хазназында таныхталча. Аны чуртасха кирерге Чоннар аразындағы эстетика паза косметология комитедінің Россиядағы пӧлии чӧпнең сыххан
Сілігнең айғасчатхан кӧп кізі пу ӱлӱкӱнні таныхтапча - ол сас иптеңең устар, стилисттер, визажисттер, пластика хирургтары, тырғахнаң айғасчатхан тоғынңылар, фитнес-тренерлер паза дизайнерлер. Ӱлӱкӱнге ча-рыдып, сілігленңең салоннар аймах чӧ-рімнер иртірчелер, полызығларын сала ниик паанаң пирчелер.
Сілігнің чоннар аразындағы кӱніне піс перманент макияжынаң айғасчатхан ус Ольга Миндибекованаң (хыс фамилия-зы - Карамчакова) чоохтазып алғабыс.
- Ольга, Сірер хыстарның кӧміскелеріне паза иріннеріне перманент макияжын итчезер. Пу тоғыснаң ӱр айғас парирзар ба?
- Мин перманент макияжынаң тӧрт чыл айғас парирбын. Олған тузымнаң сығара хоостирға кӧңніме кірңең. Ӧс парғанда, ӧкер сырланарға хынңаңмын, кӧміскелерімні позымох иптіг хоостап алңаңмын.
Пос сӧбірезін тӧстеп, ибде паланаң одырчатханымда, пірее нименең айғазарым килібіскен. Андада, 2018 чылда, піс Приморскай крайдағы Уссурийск го-родта чуртапчатхабыс. Ам даа мында чуртапчабыс (Ольга Миндибекованаң телефон пастыра чоохтасхабыс. - Авт.). Мин перманент макияжынңа ӧӧн ӱгре-діг-ні иртібіскем.
- Ноға хыстар перманент макияжын иттірчелер?
- Ол хыстың сілиин улам кӧріндіре итче. Ағаа хоза, ӱр тудылча, чылларнаң, аннаңар кӧп тус ӱзӱрлепче. Полған на сай кӧріндес алнында сырланарға паза макияж чызыл парар тіп сағыссырирға кирек чоғыл. Хыс ха-ңан даа иптіг кӧ-рінче.
Перманент макияжы чылда пір хати иділче. Пастап анестезия турғызылча, ан-наңар ол процедура кізі идін ағыртпинча. Карандашнаң кӧміскелерні алай иріннерні килістіре хоостабысчам. Анаң ӧнетін аппаратнаң пигменттерні теері алтынзар кирчем. Андағ макияж пір-ӱс чыл тудылча.
- Ол кізі хазиина хомай теелбинче бе?
- Чох, опыттығ ус итсе, ол хазыхха теелбинче, чахсы пигменттернең паза анестезиянаң тузаланча нооза. Мин хада тоғынчатхан ӧӧрелеріме перманент макияжын иттіріп алчам.
- Бьютинең айғасчатхан ус хайдағ хылых-оңдайлығ поларға кирек?
- Специалист сілігні чахсы сизінерге, ідӧк ол кӧмес психолог поларға кирек. Ипчілернең тоғынарға оой ла нимес. Полғаны ла пос оңдайынңа алыхтанча нооза.
- Сірер хыстарны перманент макияжын идерге ӱгретчезер бе?
- Я, мин позым сыбыра ӱгренчем паза хыстарны ӱгретчем. Итсе, кізіні ӱгредербін тіп сағынмаан полғам. Че пір хыс тың сурынған. Позымның студиязын азып алғам. Пасха кізінең палғалыстығ поларым килбинче.
- Хыстар пасха устарның тоғыстарын хыйа алдыртарға Сірерзер айланчалар ба?
- Я, андағ тоғыстар сыбыра полча. Мода алысча, пӱӱнгі туста харахха тың тасталчатхан кӧміскелерні иттірбинібіскеннер. Аннаңар иргі макияжтарын хыйа алдыртарға килчелер.
Минзер айланған хыстар соонаң ӧӧре-лерін ысчалар. Іди кӧміскелерге паза иріннерге перманент макияжын иттірерге сағынчатханнарның саны хозылча.
- Ольга, Сірер хайдаңзар?
- Мин Ағбанда тӧреем. Хакас хазна университедінде юриспруденция факультедін тоосхам. Хада хонғаным чаа-ңы полча, аннаңар аның тоғызы хоос-тыра Уссурийсксер кӧс парыбысхабыс. Пу город кӧңніме кірче, хости талай пар. Мында чуртирға ӱгрен парғабыс. Ха-кас чирінзер чылда пір хати самолёттығ учух пар килчебіс. Андада мин кічіг чир--суумнаң наа кӱс алынып алчам. Хонғанымнаң хада ікі оолах ӧскірчебіс
Автор :
Чоохтасхан Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы