СЕССИЯА ТИМНЕНІС СУРЫҒЛАРЫ ӰЗӰРІЛГЕН
14.09.2022
Хабарлар
Президиум чыылиинда
Ӧӧркі Чӧпте. Киӌее Хакасияның Ӧӧркі Чӧп кнезі Владимир Штыгашев президиум чыылиин иртірген
Президиум чыылии кибірли средада иртче, че пу хати ол вторникте иртірілген. Ноға іди пол парғанын Ӧӧркі Чӧп кнезі Владимир Штыгашев чарыт пирген. Хакасияның Ӧӧркі Чӧп делегациязы средада Хызылчарзар чорых тудар, анда 15 сентябрьда Кимдегі губернияның 200 чылына чарыдылған улуғ наука-практикалығ конференция иртер. Пістің депутаттар аның тоғызында аралазарлар.
Аннаңар даа пу президиумның кӱн суриинда сурығлар кӧп полбаан - 6 ла сурығ. Пастағылары республика законнарынзар алызығлар кирчеткен закон проекттері полған.
Оларның аразында «Хакас Республиканың хазна устаа сферазындағы алынҷа законодательнай акттарынзар алызығлар кирердеңер паза алынҷа законодательнай акттары (положениелері) кӱзін чідіргенге санирдаңар» закон проекті хайығ тартхан. Закон проектінең Хакасия пазының орынҷызы, Хакасия пазының Ӧӧркі Чӧптегі полномочиеліг кізізі Сергей Комаров таныстырған.
Хайди ол таныхтаан, алызығлар пістің законны федеральнайларға килістіре идер кӧстегнең кирілче. Ідӧк оларның чардығы республика правительствозы пӱдізінде алызығлар пол парғанынаң палғалыстығ. Чоох парча наа хазна органнары тӧстелгенінеңер: мобилизация тоғызынҷа хазна комитеді, саннығ тиліс паза палғалыс министерствозы (алында хазна комитеді полған).
Президиумдағылар закон проекті хоостыра республика бюджедінең хоза хорадығлар киректелеріне хайығ салғаннар - 600 муң артиинаң салковай. «Ол ахча хайдар парар?» - сурған Ӧӧркі Чӧп кнезінің орынҷызы, конституционнай законодательствоҷа, хазна пӱдізінҷе, законностьча паза правопорядокча комитеттің кнезі Светлана Могилина. Сергей Комаровтың искіриинең, ол хорадығлар иң пурун саннығ тиліс хазна комитеді тоғынҷылары саннығ тиліс паза палғалыс министерствозы тоғынҷыларына айлан парғанынаң палғалыстығ. Министерствода тоғыс паза нандырығ тудары кӧдіре, аннаңар чал ахчазы ідӧк ӧскірілче осхас.
Комитет-комиссиялар устағҷылары, саннығ тиліске тиксі хазнада хайығ салылчатханынаң паза ол прай даа сфераларға теелчеткенінең чаразып, закон проектін сессия ӱзӱриине сығарарға чаратханнар.
Олох туста президиумдағылар Ӧӧркі Чӧпті республика правительствозының пӱдізін тӧстеҷең системадаң хыйа идібіскеннеріне чӧпсінмееннер осхас. «Аннаңар бюджет пастыра оңдайлирбыс», - чоохтанған Ӧӧркі Чӧп кнезінің пастағы орынҷызы Юрий Шпигальских.
Халғанҷы сурығлар чағдапчатхан сессия тоғызынаң палғалыстығ полған. Кӱн суриинда килер сессияа «Республика правительствозы чол чӧрізін хорғыс чох идерінҷе паза автомобиль чолларын чахсыландырарынҷа хайдағ тоғыс апарчатханынаңар» правительство чазын кирердеңер сурығ турған. Че президиумдағылар ол сурығнаң чараспааннар.
- Піс халғанҷы сессияда сӧп-сапты тартарынаң палғалыстығ сурығны правительство чазына сығарарға тіп чарадығ алғабыс нооза, - таныхтаан Светлана Могилина.
Владимир Штыгашев аннаң чарасхан.
- Чолларны ноо ӱзӱрерге кирек, олар пістің чахсылар, - теен Ӧӧркі Чӧп кнезі. - Сӧп-сап сурии хай-хай ағырсымнығ турча.
Андағ оңдайнаң сессияның кӱн суриинзар пу сурығның орнына сӧп-сап киреен чарытчатхан «правительство чазын» кирерге чарат салғаннар. Халғанҷызында президиум чайғы каникуллары соондағы пастағы сессияны иртірҷең кӱнні чарадыға алған. Аны 28 сентябрьда иртірерге чарат салғаннар. Иртер сессияның кӱн суриинзар 20 артиинаң сурығ кирілер тіп кӧрілче.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде