ТЫНАНҶАҢ НАА ОРЫН
14.09.2022
Хабарлар
Хакасияның национальнай паза территориальнай политика министрінің орынҷызы Юрий ЧЕРТЫКОВ, Таштып аал чӧбінің пазы Рустам САЛИМОВ паза идінҷек Дмитрий КРУГОВЫХ хызыл лента хыплапчалар
Пайрам. Ирткен пятницада Таштып аалда кӧп кӧстегліг тынанҷаң ачых азыл парған
Ол суғ хазындағы иптелчеткен чирге кірче. «Суғ хазы» адалчатхан проект «Городта истіг оңдайлар тӧстирі» нацпроектче пӱдірілче. Аның чапчаң пӱдірии чон хайди ӱн пирерінең палғалыстығ. Амды ол пӱдірігнің ӱзінҷі теезі апарылча. Тынанҷаң ачых, тізең, Хакасияның национальнай паза территориальнай политика министерствозы хоостыра утып алған ахчаа (650 муң салковай) иділген. Тротуар чоллары тӧзелген, одырҷаң чирлер, сӧп-сап тастаҷаң орыннар, хоостаҷаң чардылар, сомға суурынҷаң орын паза сцена турғызылған. Ачых ибіре тимір сиден турғызылған.
Нааҷыласнаң Таштып аал чуртағҷыларын республиканың национальнай паза территориальнай политика министрінің орынҷызы Юрий Чертыков алғыстирға килген. Ол мындағ чоох тутхан:
- Чыл сай пістің министерство муниципальнай пӱдістер аразында чуртаста тың киректелчеткен проекттер мариин иртірче. Аймахтар кіннерінің аразында иртірілчеткен номинацияда читі аймах кіні араласхан, ол санда Таштып аал. Пу марығ хоостыра утып алған муниципальнай пӱдіске республиканың, аймахтың, аал чӧбінің бюджеттерінің паза идінҷектернің ахчазы пирілче. Прайзына, кем пу проектті тимнирге паза чуртасха кирерге полысхан, алғызым читірчем.
Министерствоның алғыстас пічиин Юрий Чертыков позынаң хада тоғынчатхан Ольга Тидеге читірген, аның хабазиинаң марығ иртірілче, олох араласчатханнарға пічіктер тимнирге полысча, ӱгретче. Паза Юрий Карповичтің холынаң идінҷектер Александр Исаков, Дмитрий Круговых, Олег Вахрушев, Таштып аал чӧбі кнезі Рустам Салимов сыйыхтатханнар.
Площадканың пайрамнығ азылғанында Ағбандағы артисттер теелбек-сарыннарынаң чапсытханнар. Ол Россияның саблығ артизі Евгений Улугбашев, «Час ханат» ӧме, ырҷылар Екатерина Чебодаева паза Иван Шулбаев. Чайаачыларның кӧзідии кӧрігҷілернің кӧңнілеріне уғаа кірген. Ідӧк наа кӧп кӧстегліг тынанҷаң ачых чуртағҷыларның чӱректеріне чатхан. Анзы пілдістіг, Таштып аалда мындағ орыннар кӧп нимес: «Изеннер» площадка, казачествоға чарыдылған орын, Хыныс таа, Чиңіс паркы, олғаннар ойнаҷаң ачыхтар. Олар Рустам Салимов аал чӧбінең устапчатхан туста пӱткеннер. Аны аал чуртағҷылары сизінчелер, аннаңар ирткен табығларда аны хатабох таллап алғаннар.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде