МАТЫРНЫҢ АДЫ УНДУЛБАЗЫН
14.09.2022
Хабарлар
Митинг араласчылары чаадаңар кибелістер хығырчалар
Хумартхылас. Пӱӱл Хакасия Совет Союзының Матыры Михаил Чебодаевтің 100 чазын таныхтапча. Аны хоостыра республикада аймах мероприятиелер иртче
Пу кӱннерде Асхыста Совет Союзының Матыры Михаил Иванович Чебодаевке турғызылған хумартхы чарды алнында митинг ирткен. Анда Калининдегі ортымах школаның ӱгренӌілері араласханнар. Мындағ мероприятие чиит тӧлні Чир-сууна хынарға ӱгретче. Олғаннар, матырларның махачызынаңар піліп алып, оларға кӧӧгерге кӱстенерлер. Чииттерзер Асхыс аймаа пазының пастағы орынӌызы Евгений Костяков айланған.
- Михаил Иванович Чебодаев Илбек Ада чаада, махачы чаалазып, тынын пир салған. Пӱӱл мероприятиелер матырның тӧреен, ӧскен паза чуртаан орыннарда иртірілче. Амыр чуртасты, чарых тигірні піске сыйлаан матырларны чиит улус хайди даа пілерге кирек, - таныхтаан Евгений Юрьевич. - Сірер пілчезер, пӱӱн Украинада ӧнетін чаа операциязы иртче. Пістің войсколарыбыс амыр тигірібісті арачылапчалар. Амғы ӧсчеткен тӧлібіс ноға хумартхы тастар турғызылчатханын пілзін, піс оларны ундутпасха кирекпіс.
Хумартхылас мероприятиезінде матырның чуртас чолынаңар чоохтап пиргеннер. Михаил Иванович Чебодаев от айының 10-ӌы кӱнінде 1922 чылда тӧреен. Аның олған тузы Пии аймаандағы Киндірліг пилтірі аалда ирткен. Асхыстағы ортымах школаны тоозып, Ағбанда ӱгретчілер училищезінзер ӱгренерге кірібіскен. Училище соонаң пасталығ класстар ӱгретчізі полған.
1941 чылда ӱгретчі М.И.Чебодаев фронтха хығыртылған, Пирятинскай дивизияда разведчик полған. Чааӌы Михаил Чебодаев Днепр суғны кизер чаалазығда махачызын кӧзіткен. Ыырӌы атчатхан туста матыр, суғның оң саринзар кизіп, пулемет атчатхан орынзар гранаталар тастап, ыырӌының атызын тохтадыбысхан. Аннаң пасха, автоматтаң атып паза гранаталар тастап, 14 ыырӌыны чох иткен. Палығлат салып, чаалазығны тохтатпаан. Махачы чааласхан ӱчӱн, Михаил Иванович Чебодаев Совет Союзының Матыры атха турысхан. Азығ айының 25-ӌі кӱнінде 1945 чылда, Латвия ССР-дағы Приекуле аал хыринда аар палығлат салып, М.И.Чебодаев тынын пир салған. Аның сӧӧгін Скуодас городта чыып салғаннар.
Асхыс аймааның ветераннар чӧбінің кнезі Алевтина Тохтобинаның чооғынаң, Ікінӌі тилекей чаада 70 артиинаң хазна араласхан. Ол ӱртӱн айының 2-ӌі кӱнінде 1945 чылда тоозылған. Че пӱӱнгі кӱнде дее пістің хазнабыс фашизмнең тоғыр чааласча, аннаңар Асхыс аймаанаң Илбек Ада чааға парған матырларны чииттер пілерге кирек. Асхыс аймаанаң фронтха парған ікі кізі, фашисттердең тоғыр Украинада чаалазып, Совет Союзының Матыры атха турысхан. Хакасиядаң делегациялар аймах чылларда Скуодас городсар чӧргеннер, пістің чир-суғӌыбыс Михаил Иванович Чебодаев чатчатхан орында пол килгеннер. Амды Прибалтика хазналарында СССР тузында турғызылған хумартхы тастарны иңзерчелер, че пістің матырыбыстың хумартхызы хайраллалча.
Митингте ӱгренӌілер Илбек Ада чаадаңар кибелістер хығырғаннар. Матырның адын хумартхылап, чыылысхан чон пір минута сым турған. Митингтің халғанӌызынзар Михаил Иванович Чебодаевке турғызылған хумартхы тас алнынзар чахайахтар салылған.
Автор :
Антон ЧЕРТЫКОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде