ГРАНАТАА ЧАДЫБЫЗЫП, АРҒЫСТАРЫН АЛ ХАЛҒАН
16.09.2022
Хабарлар
Россия Матыры Аймир МИЯГАШЕВ
Хакас матыр. Украинадағы ӧнетін чаа операциязында чуртазын пир салған Аймир Миягашевке Россия Матыры ат пирілген
РОССИЯ ПРЕЗИДЕНТІНІҢ 26 АВГУСТТА 2022 ЧЫЛДА АЛЫЛҒАН УКАЗЫ ХООСТЫРА СПЕЦНАЗ ӦМЕЗІНІҢ УЛУҒ РАДИСТ-РАЗВЕДЧИГІ, ГВАРДИЯ ЕФРЕЙТОРЫ АЙМИР ЕВГЕНЬЕВИЧ МИЯГАШЕВКЕ ӰРЕЕН СООНДА ХАЗНАНЫҢ ИҢ ПӦЗІК СЫЙИИ - РОССИЯ МАТЫРЫ АТ - ПИРІЛГЕН.
ПУ ХАБАРНЫ «ХАКАС ЧИРІ» ГАЗЕТАА МАТЫРНЫҢ ПАБАЗЫ ЕВГЕНИЙ АЛЕКСЕЕВИЧ МИЯГАШЕВ ТЕЛЕФОНҶА КИРЕЧІЛЕЕН.
- Алтын Чылтыс сағам Хабаровскта, хайда оолғым чааҷы службазын апарған, - чоохтаан ол. - Хазна сыйиин піс чуртапчатхан орында, Чукоткада, читірерлер.
Россия Матырынаңар искіріг «Герои страны» чоннар аразындағы патриот интернет-проектінде (https://warheroes.ru) ӱр ниместе сых килген.
Аймир Евгеньевич Миягашев тӧреен 10 сентябрьда 1995 чылда Хакас Республикадағы Таштып аалда. Час олған тузы Таштып аймаандағы Аңчул аалда ирткен. Ӱч частығда іҷе-па-базынаң хада Чукотканың Иультин-скай аймаанзар кӧскен, іҷе-пабазы Уэлькаль аалның ортымах школазында тоғыс таап алғаннарында. Нинҷе-де чыл пазынаң сӧбіре олох аймахтағы Эгвекинот поселоксар кӧзібіскен. Че Миягашевтер сӧбірезі Хакасиязар полған на чайғызын килҷең, олар Таштып паза Аңчул аалларда тынанҷаңнар. Аймир тӧреен чир-сууна тың хынҷаң.
2002 - 2013 чылларда Аймир Эгвекиноттағы ортымах школада ӱгренген. Ӱгредіг чылларында спортнаң ӧткін айғасхан, хоккей ойнирға паза кӱрезерге хынҷаң. Ідӧк ол «Штар» чааҷы-спорт клубынзар чӧрген, удаа «Зарница» чааҷы-спорт ойыннарында араласчаң.
2013 чылда Эгвекиноттағы ортымах школаны чахсы тоозыбысхан. Школа ӱгретчілері Аймирні ах сағыстығ, хаҷан даа сын ӱчӱн турысчатхан, махачы, нандырығлығ паза иптіг чиит кізі полған тіп сағысха кирчелер.
Школа соонаң Аймир Хызылчардағы Сибирьдегі федеральнай университетсер ӱгренерге кіріп алған. Че ол кічігдең сығара чааҷы поларға, чуртазын армиянаң палғалыстырарға сағынған. Аннаңар, вузта ікі курс ӱгренібізіп, университеттең парыбы-зарға чаратхан.
2016 чылда чааҷы службазына хығыртылған. Новосибирсктегі чааҷы училищезінің разведка кафедразында . пис айлығ тимненіс ирткен соонаң Ӱстӱнзархы чааҷы округынзар ызылған. 2016 чылның ноябрьынаң сығара 58-ҷі тиксі войсковой армияның (дислокация орны - Моздок город, Алтынзархы Осетия - Алания) 19-ҷы алынҷа мотострелковай бригадазында служба апарған.
2017 чылның октябрьында, срочнай службаны тоозып, контракт службазына кірібіскен. Генштабтың Ӧӧн управлениезінің (дислокация орны - Хабаровск город) 14-ҷі алынҷа гвардейскай спецназ бригадазының 794-ҷі алынҷа спецназ отрядының спецназ ӧмезінің радист-разведчигі полыбысхан.
Аймир Миягашев службазын нандырығлығ апарған, пасха чааҷыларға кӧзідім полған. Чидіглері паза махачызы ӱчӱн Аарластығ пічіктернең, алғыстастарнаң, «Участник маневров войск (сил) Восток-2018» медальнаң сыйыхтаттырған.
2020 чылның февраль - майында Іскеркі чааҷы округының чааҷыларынаң хада Хабаровсктаң Москваға теере Чиңістің 75 чылына чарыдылған, узуны 8,5 муң километр полған чорыхта араласхан. Аның ӱчӱн Суворовтың медальынаң сыйыхталған. 2020 чылның октябрьынаң сығара - спецназ ӧмезінің улуғ радист-разведчигі.
Тӱрчедең Донецк Чон Республиказын паза Луганск Чон Республиказын арачылирынҷа ӧнетін чаа операциязы пасталыбысханда, подразделениезінең хада андар ызылған. Аның подразделениезі Украинаның Харьков облазында чаалазығлар апарған.
27 майда 2022 чылда разведчиктер ӧмезі, хайда гвардия ефрейторы Аймир Миягашев полған, Изюм аймаандағы Яремовка аал хыринда хай-хай кӧп саннығ ыырӌы чааӌыларына урун парған. Чағынғы чаалазығ пасталыбысхан. Аймир, чаалазығда ыырӌыны атып, олох туста хости подразделениелернең паза штабнаң палғалыс тутхан. Миягашев пу чаалазығда 9 боевикті чох иткен. Че ыырӌы, кинетін чағын кіріп алып, пістің разведчиктер хыринзар хол гранатазын тастабысхан. Аймир чідірінмеен, сах андох арғыстарын ал халарға чарадығ алып, гранатаа чадыбысхан. Іди ол, пос чуртазын пиріп, чааӌы арғыстарын ал халған.
Матыр чааҷыны 11 июньда тӧреен чирінде, Таштып аймаандағы Аңчул аалда, чыып салғаннар.
Россия президентінің 26 августта 2022 чылда алылған указы хоостыра Аймир Евгеньевич Миягашевке ӱреен соонда Россия Матыры ат пирілген.
Аймирге Россия Матыры ат пирер пастағнаң Хабаровсктағы чааӌы частьы, хайда хакас оол службазын апарған, сыххан. Киректің узы-пазына сығарына оларға хабазығ киректелген.
Андада, матыр чир-суғҷыбысха хазнаның иң пӧзік сыйиин пиреріне хабазып, хакас чонның республикадағы Улуғлар чӧбі, Хакасия правительствозы пастыра, Россия президенті адына айланыс тимнебіскен.
- Республиканың Улуғлар чӧбі Аймир Миягашевке ӱреен соонда Россия Матыры ат пирердеңер кірген айланысха хабазарға чаратхан, - чоохтаан республикадағы Улуғлар чӧбі президиумының хачызы Любовь Аёшина. - Аны хоостыра Хакасия правительствозынзар айланғабыс, Россия президентіне айланыс ызарға сурынып.
Амды Улуғлар чӧбі чоныбыстың турыстығ оолғын хумартхылирынӌа тоғыс апарарға пӧгінче. Пістің матырлар чиит улусха кӧзідім поларға кирек тіп санапчалар олар. Аннаңар Аймир Миягашевтің ады хайди даа хумартхылаларына ізеніс пар.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде