ХАКАС ХАБАРҶЫЛАРНЫҢ ЧИДИИ
16.09.2022
Хабарлар
Презентация. Хакасияның Чайаачылар туразында «Россия чоннарының амғы литературазы. Хоос публицистика» антологияның презентациязы ирткен
«Россия чоннарының амғы литературазы» антология пис чыл мының алнында сығарылып пастаан. Ол хазнабыстағы чоннарның национальнай литературазын тилідеріне хабасчатхан программа хоостыра тимнелче. Анаң Россияның сан тилізі паза палғалыс министерствозының ахчалығ хабазиинаң чарых кӧрче. Таныхтирға кирек, андар чӱзерлеп кізінің чайаачы тоғыстары киріл парчалар. Хакасиядағылар даа мындағ чыындыны тӧстирінде ӧткін араласчалар.
Іди пастағы, поэзияа чарыдылған, антологиязар Хакасияның саблығ чайаачылары Моисей Баиновтың, Альбина Курбижекованың, Валентина Татарованың, Галина Казачинованың паза Сибдей Томның тоғыстары кирілгеннер. Ол полған 2016 чылда. Аның соонда прозаа, олған литературазына, драматургияа чарыдылған антологиялар тимнелгеннер. Пу чыындыларда ідӧк пістің поэт-писательлерібістің хоос произведениелерін таап аларға чарир - Валентина Шулбаеваның, Анатолий Султрековтың, Илья Топоевтің, Галина Казачинованың, Татьяна Казанаеваның, Людмила Костякованың.
Пизінҷі антологияны, тізең, проекттің тӧстегҷілері «Хоос публицистика» адап саларға чарадығ алыбысханнар. Андар хазнадағы национальнай газеталар хабарҷыларының чарыхха сығарылған тоғыстарын кирерге пӧгін турғызылған.
- Пу чыындызар пістің республикадаң кемнерні таллап алар ӱчӱн ӧнетін чӧп тӧстелген. Андар Хакасиядағы Чайаачылар туразының тіл, литература паза тархын наука-істезігліг институттың «Хакас чирі» газета редакциязының устағ-пастааның кізілері кирілгеннер. Кирексіністер хатығ полғаннар. Иң пастап, антологиязар тӧрт тӧлнің тоғыстары кір парарға паза ол эсселер, очерктер газетада хайди даа сығарылған поларға кирек полғаннар. Паза олар ирткен чӱс чылның 90 чыллары соонаң газета хығырығчыларының хайиина сығарыларға паза орыс тіліне тілбестел парарға кирек полғаннар. Сынны чоохтаза, редакционнай чӧп араласчыларына таллап аларға оой полбаан, - теен презентация тузында Хакасиядағы Чайаачылар туразының устағҷызы Надежда Бурнакова.
Хайди таныхтаан редакционнай чӧптің араласчызы, Хакасиядағы тіл, литература паза тархын наука-істезігліг институттың устағҷызы Нина Майнагашева, хакас публицистиказынаңар саблығ писательлер Каркей Нербышевнең Митхас Туран чох чоох тударға сидік. Олар кӧп чыл «Ленин чолы», «Хакас чирі» газетада істен салғаннар нооза. «Аннаңар пу чайаачыларның хакас газетазында сығарылған тоғыстарын антологиязар хайди даа кирерге чаратхабыс. Олар хакас публицистиканың пастағы тӧлі полчалар тиирге чарир», - чарытхан Нина Семёновна.
«Россия чоннарының амғы литературазы. Хоос публицистика» антологиязар Хакасияның прай тӧрт хабарҷызының тоғызы киріл парған.
Каркей Нербышевнең Митхас Туран пӱӱнгі кӱнде изен ниместер. Аннаңар оларның хаҷан-да газетада сыххан хабарларын редакционнай чӧптің араласчылары орыс тіліне тілбестееннер. Амғы туста хабарҷы полчатхан Наталья Табакованаң Александра Карамчакова Россия синінде тимнелген чыындызар кирілген тоғыстарын постары орыс тіліне тілбестееннер.
Наталья Табакова пӱӱнгі кӱнде «Хакасия» ГТРК-ның хакас пӧлиинің устағҷызы полча. Че істеніс чолын ол «Хакас чирі» газета редакциязында пастаан. Аның антологиязар кирілген тоғызы хакас книга издательствозынаң кӧп чыллар устаан Вера Чезыбаевадаңар.
Александра Карамчакованың тоғызы, кирексіністер хоостыра кӧрілген тӧрт тӧлнің иң чиит хабарҷызы полып, пу чыындызар кирілген. Аның ӧӧн матыры - Хакасияның Л.Р.Кызласовтың адынаң чир-суғ ӱгренҷең музейнің пӧлік устағҷызы Людмила Угдыжекова.
- Мындағ синніг проекттің араласчылары санына кір парғаныбыс тың поғдархастығ пілдірче. Аның ӱчӱн улуғ алғыс читірчебіс редакционнай чӧптің араласчыларына, тоғыстарыбысты піди пӧзік паалаан ӱчӱн, - алғыстарын читіргеннер амғы хабарҷылар.
Саблығ пабаларының аттарын аарлапчатхан ӱчӱн, ах чарыхтаң парыбысхан писательлернің палалары презентация тузында ідӧк прайзына улуғ алғыс читіргеннер.
Тиксі чоохтаза, «Россия чоннарының амғы литературазы. Хоос публицистика» антология Россияның аймах пулуңнарында чурттығ 134 хабарҷының чайаачы тоғызынаң пӱтче. Олар 45 национальнай тілнең пазылғаннар.
Антологияның тиражы - тиксі хазнаа 1000 экземпляр! Хакасияа кӧрілгеннернің ікізі істеніс чолын узарат парчатхан хабарҷыларға читірілген, паза ікі кинде антологиязар материаллар тимнир тоғыста араласхан учреждениелерге сыйлалған - Хакасиядағы тіл, литература паза тархын наука-істезігліг институдынаң «Хакас чирі» газета редакциязына.
Теестегі алтынҷы антология чоннарның пазылбин пӱткен чайаачызына чарыдылар.
Автор :
Александра СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде