МАТЫРЛАРНЫҢ ОМАЛАРЫН ТОЛДЫРА ЧАРЫТ ПОЛЧАТХАН АРТИСТ
16.09.2022
Хабарлар
Пайрамнығ тӧреен кӱнi. А.М.Топановтың адынаң Хакас национальнай драма театрының таланттығ паза чарых кӧңнiлiг артизi Сергей Доможаков киҷее пайрамнығ 60 чазын таныхтаан
Сергей Николаевич республиканың драма театрының сценазында 30 чылҷа iстен парир. Пеер ол 1991 чылда Ленинградтағы кӧг паза кинематография хазна институдын тоосханда килген. Чиит артист театрның сценазында Нил Саймонның «Билокси-Блюз» пьесазынҷа турғызылған спектакльда пастағызын на ойнаан. Артист поларға чайалған, иптiг тудыныстығ, сiлiг паза халын ӱннiг чиит оол тоғызон чыллардох кӧрiгҷiлернiң чӱректерiн аптап алған. Ол хада тоғынчатхан арғыстарының аразында хаҷан даа улуғласнаң тузаланча.
С.Н.Доможаков орыс паза пасха чоннарның классикаларынҷа, национальнай паза амғы тустағы драматургияҷа хырых азыра роль ойнап салған. Н.В.Гогольның пьесаларынҷа турғызылған «Ревизор» кӱлкiстiг ойында Лука Лукичтi ойнаан, «Женитьба» спектакльда – Яичницаны, В.Шекспирнiң «Виндзорские насмешницы» ойынында Сэр Хью Эванс полған, В.Шукшиннiң «Энергичные люди» спектакльында олаңай сырайлығ кiзiнi ойнаан, А.Вампиловтың «Провинциальные анекдоты» кӱлкiстiг ойынында – Угаровты, Л.Пиранделлоның «Шесть персонажей в поисках автора» кӱлкiстiг ойынында – пабаны, Д.Б.Пристлинiң «Необычайное происшествие» ойынында – Джордж Кеттлнi, А.Цагарелинiң «Ханума» кӧглiг кӱлкiстiг ойынында – Акопты, Антон Чеховтың «Чайка» спектакльында – Тригориннi, Николай Гогольның «Как Иван Иванович поссорился с Иваном Никифоровичем» кӱлкiстiг ойынында – Иван Иванович Перерепенконы паза пасха даа матырларны.
Сергей Доможаков полған на матырын матлама ойнабызарға кӱстенче. Кӧрiгҷiлер андағ артисттерге тартылчалар, аның ойынын чылларнаң кӧрерге хынадырлар. Режиссёр Нонна Галецкая О.Богаевтiң пьесазынҷа турғысхан «Тридцать три счастья» трагедиялығ кӱлкiстiг ойында Сергей Николаевич апсахты ойнапча. Кӧрiгҷiлер ол спектакльны он чылҷа cценадаң позытпааннар. Д.Голдменнiң «Лев зимой» ойынында даа принц Ричардтың хылиин паза омазын артист чахсы кӧзiт пирген. Аны режиссёр С.Верхградский турғысхан. Хызылчар крайының городтарынҷа чорыхха чӧргенде, андағы чуртағҷылар спектакльны хынып кӧргеннер, пӧзiк паалааннар.
Артисттiң иң чахсы тоғыстарын театрларның аймах фестивальларында кӧп специалист таныхтапча. 2005 чылда «Сибирский транзит» регионнар аразындағы V фестивальда Сергей Доможаков С.Беккеттiң пьесазынҷа турғызылған «В ожидании Годо» спектакльда Владимирнi ойнаан (режиссёр А.Асочаков).
2007 чылда Хазан городтағы «Науруз» тӱрк чоннар аразындағы театрлар фестивальында С.Злотниковтың пьесазынҷа «Пришёл мужчина к женщине» драмада Сергей Доможаков Виктор Петровичтi ойнаан (режиссёр Ю.Майнагашев).
«Ах иб» чоннар аразындағы кӧс чӧрҷең фестивальда Кен Кизинiң романынҷа турғызылған «Пролетая над гнездом кукушки» ойын (режиссёр С.Коков) «За лучшее пластическое решение спектакля» дипломны утхан. Пу чиңiстi холға кирерiнде Сергей Доможаковтың хозымы улуғ, ол Скэнлонны чалтырама ойнаан.
Iдӧк артисттiң харахха тасталчатхан тоғыстарының пiрсi – «Калека с острова Инишмаан» ойында Патинмайктың iҷезi. Аны Мартин Макдонахтың чоннар аразындағы фестивальында театрлар эксперттерi махтааннар. 2020 чылда ойын Пермьде ирткен Чоннар аразындағы фестивальда пӧзiк сыйых алған.
Сергей Николаевич аймах режиссёрларнаң хынып тоғынча. Ол хаҷан даа позының узынаң, пiлiзiнең, чайаачы кӧңнiнең ӱлесче. Аның хынығ паза сағыста саңайға халчатхан рольлары толдыра.
Иптiг кӧрiмнiг, хормачы оңдайлығ, матырларының омаларын толдыразынаң чарыт пiлчеткен артист пу кӱннерде кӧрiгҷiлернi тун ойыннарда ӧрiндiрер. Iди Антон Чеховтың чоохтарынҷа «Антон VS Антоша», А.Гельманның «Скамейка», Николай Гогольның «Как Иван Иванович поссорился с Иваном Никифоровичем», Тимур Казновтың «Такая разная любовь» паза «Голливуд. Другой ракурс...» ойыннар тимнелче.
А.М.Топановтың адынаң Хакас национальнай драма театрының артизi Сергей Николаевич Доможаковты прай чӱреебiснең пайрамнығ чазынаң алғыстапчабыс! Чайаачы чолы хаҷан даа азых ползын, наа хынығ матырларны кӧп ойназын паза, иң ӧӧнi, хазии пик ползын!
Автор :
Светлана Селигеева, Хакас драма театрының литература пӧлиинiң устағҷызы
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде