ХООС СӦСТІҢ ИЛБЕК КӰЗІ
21.09.2022
Хабарлар
Хабарҷылар марии. Республиканың иң артых хабарҷылары кем полчатханын піліп алар ӱчӱн, чыл сай «Хакасия, алнынзар!» марығ иртірілче. Анда сыбыра кӧп кізі араласчатханы таныхталча. Пӱӱл дее позының узын сынирға чӱс артиинаң кізі тоғызын ысхан
САҒЫБААН СЫЙЫХ
Прай кибірлерні сайбаан чіли, чон алнынзар сығарға СУЭК пірiгістің ӧӧн директоры Алексей Килин хығыртылған. 16 сентябрьда Алексей Богданович пайрамнығ тӧреен кӱнін, 70 чазын, таныхтаан полтыр. Аннаңар ағаа Россияның Журналисттер пірігізінің иң аарлығ сыйыхтарының пірсін, «За заслуги перед профессиональным сообществом» таниин, читір пирерге Хакасия пазы Валентин Коновалов сыххан.
– Хоос сӧстің кӱзi илбек полчатханын прайзы пілче. Хакасияның хабарҷыларына тӧреміл хабазығ пирчеткеннерің ӱчӱн улуғ алғыс, Алексей Богданович, – таныхтаан позының чооғында Валентин Олегович, ағаа сыйых читіріп.
Хакасия пазының соонда пайрамнығ тӧреен кӱнін таныхтапчатхан пастыхты алғыстирға сыххан орындағы журналисттер пірігізінің кнезі Ольга Ширковец. Ольга Валериановна сағысха кирген, хайди СУЭК пірігістің ӧӧн директоры хабарҷыларға ахчанаң даа, автобустарнаң даа маңат полыс турғанын. Iди пірсінде Сус аймаандағы спорт базазында хабарҷыларның спартакиадазын иртірерге автобус чидіспинчеткенде, Ольга Ширковец Алексей Богдановичке сығдырадыбысхан, пір полардаң, ікі дее автобус чиде салған.
Андада піс, хабарҷылар, Сус чирінзер уғаа тӱзімнiг чӧр килгебіс.
– Піс Сірернің ӱчӱн уғаа тың поғдархапчабыс. Тиксі хазнабыста даа Россияның Журналисттер пірігізінің мындағ аарлығ сыйиина турысхан устағҷылар саннығ ла. Хакасияда Сірер пастағызы полчазар. Предприятиелер устағҷылары санынаң чи, – Алексей Килинні паарсах хуҷахтаан Ольга Валериановна.
– Полысхам, мыннаң мындар даа хабазығ тохтадылбас. Тиктең нимес хабарҷыларның аар тоғызын шахтерларның тоғызынаң тиңнестірчелер, – таныхтаан чооғында пайрамнығ тӧреен кӱнінде мындағ сыйыхха турысхан устағҷы.
АЛҒЫСТАСТАР
Анаң сӧc пирiлген Хакасия пазы Валентин Коноваловха. Валентин Олегович позының чооғында, хазыр марығда аралазып, аймах-пасха номинацияларда чиңic тутхан хабарҷыларны чылығ алғыстаан, наа чидіглерге алғаан. Ол iдӧк Хакасиябыс хазна чахығларын маңнаныстығ толдырчатханын хоос сӧс ээлері хайди алғым чарытчатханын махтаан. Анаң постарының тоғыстарын сыбыра пӧзік синде толдырчатхан хабарҷыларны алынҷа таныхтаан, Хакасия правительствозының алғыстас пічіктерін читірген. Оларның санында ӧӧнінде республика аймахтарында паза городтарында сыхчатхан газеталарның редакторлары, орыннардағы телевидение паза радио тоғынҷылары полғаннар.
Хакасия пазының соонда чон алнынзар сыххан орындағы журналисттер пірігізінiң кнезі Ольга Ширковец. Ол позының чооғында пӱӱл ирткен марығның аймах номинацияларындағы чиңicчілерні таллап аларға уғаа сидік полғанын таныхтаан. Пастағы сылтағ – кізі уғаа кӧп араласханы. Iкінҷі сылтағ – чииттер саблығ хабарҷылардаң устары хоостыра сала даа соона халбинчатханы. Аннаңар пірее номинацияда кем чиңic тутханын ӱзӱрчетсе, хазыр талазығлар пасталыбысчаң полтыр. Піреезі, кӧңні-чӱреен пазын полбин, ӱзӱріг тузында сыға халҷаң осхас. Сала амырап, нандыра кір киліп, пазох ла хазыр талазығларда араласчаң.
– Аннаңар постарының номинацияларында чиңic тутхан хабарҷыларны иң чахсыларына сала даа ікінҷілес чох санирға чарир, – чарлаан Ольга Ширковец.
ЧИҢӀСЧӀЛЕР
Анаң сыйыхтарнаң таныхтап пастабысханнар. Иң пастап «Минің Хакасиям» номинация адалған. Пу номинацияда прай 24 хабарҷы позының узын сынаптыр. Талазығ хазыр партыр. Пістің редакция тоғынҷыларының улуғ ӧрінізіне, «Хакас чирінің» пӧлік редакторы Инора Боргоякова, ікінҷi орынға сыххан хабарҷыны пір санға ла ас парыбызып, чиңicчі полыбыстыр. Алғыстапчабыс хада тоғынчатхан арғызыбысты, наа чиңicтер алғапчабыс.
Прайзынаң кӧп араласчы полтыр «Илбек Чиңic» номинацияда. Хайдағ хазыр талазығ парғаннаңар чазырбин чоохтап пирген чон алнынзар сыххан Александр Векшин. Ол Хакасиядағы «Боевое братство» пірігістің кнезі полча. Чааҷы офицер «Илбек Чиңic» марығның номинациязында 40 артиинаң хабарҷы араласханын искірген. ӱр нимеске дее тохтабинчатхан талазығлар соонда пастағы орынға хабарҷы Наталья Ковалёва сых килтір. Ол Таштып аймаандағы ӧлең чазы аалның чаа ветеранының чуртас чолын тирең iстестір. Итсе, пу тоғысты пастаптыр «Земля Таштыпская» газетаның хабарҷызы Юлия Уксекова. Хаҷан аны газетаның нандырығлығ хачызына турғыс салғаннарында, саңай маң чохха тӱзіп, чайаачы тоғызын узарадарға Наталья Ковалёваа чахыптыр. Хада істенчеткен чиит кізее тыңох ізенген полбас па. Улуғ арғызының сурынызын толдырарына анзы парчан кӧңнін салтыр, уғаа чӱрексіністіг iстезігліг тоғыс тимнебістір. Аннаңар ағаа пу номинацияда пастағы орын пирердеңер чарадығ алылтыр. Че мындағ чарадығнаң хай піреезі чараспиндыр, талазығ пасталыбыстыр. Хайди iди чыл сай пір ле кізі сыйыхтар ал турчадар теен осхастар.
Таныхтирға кирек, 2021 чылда Наталья Ковалёва «Чыл журнализі» аарластығ атха турысхан. Амды, ті-зең, «Илбек Чиңіс» номинацияда чаа ветеранынаңар істезігліг тоғызы прайзынаң артых пазылғаны таныхталған. Ол сылтағнаң чааҷы офицер Александр Векшин комиссия алған чарадығны алыстырбиндыр, сыйыхты Наталья Ковалёва алған.
Пастағы туста «Очерк» номинацияда «Хакасия» газетаның ӧӧн редакторының пастағы орынҷызы Юрий Абумов чиңісчі пол парар тіп сағынған осхастар. Минің марыға ызылған очерктерім хакас тілінең пазылған полғаннар. Іди чарадылча. Ол даа сылтағнаң комиссиядағылар оларны хығырбааннар. Андада пістің газетаның ӧӧн редакторы Радион Сунчугашев очерктернің ӧӧн сағызы газетабыстың пайрамнығ 95 чылына чарыдылчатханынаңар, «Хызыл аалның» редакторларының чуртас чолынаңар пазылчатханын хысхаңахти орыс тілінең чоохтап пиртір. Сах андох Радион Дмитриевичке «Земля Таштыпская» газетаның редакторы Виктор Пермяков хозылтыр, минің материалларымны махтап сыхтыр, ирткен тусты пілбинчеткен чонның таңдағызы чоғыл тіптір. Комиссия араласчыларының ӱннері ікі чарыл парыбыстыр. Пу номинацияда чиңіс тутханым ӱчӱн ӧӧн редакторыбысха улуғ алғызым читірчем.
«Иң чахсы интервью» номинацияда чиңісчі полыбысхан хабарҷы Нина Богатырева. Тиксі хазнабысха сабланчатхан хабарҷы Саяногорсктағы «Саянская заря» газетада тоғынча. Ол Сойан-Сус ГЭС-та полған саайдаңар улуғ чыынды чарыхха сығарыбысханда, аны прайзы махтап сыххан.
Ідӧк «Саянская заря» газетада тоғынчатхан Татьяна Короткова «Профи года» номинацияда ізестіг чиңіс тутханнаңар чарлааннар. Ол даа, хабарҷы полып, пастағы ла чыл тоғынминча, хынығ паза чапсых материалларынаң хығырығҷылар хайиин тартча. Пу аның мындағ марығда пастағы ла чиңізі нимес.
«Хакасия» газетаның ӧткін хылыхтығ хабарҷызы Елена Абумова «Репортаж» номинацияда чиңіс тутханнаңар чарлалғанда, прайзы даа улуғ ӧрчіде суулаза тӱскебіс. Аны пістің республикада маңат таныпчалар.
Оңарылыстығ, прайзы даа чидікпин сағыпчатхан, иң аарлығ сыйых - «Чыл журнализі» атха пӱӱл кем не турызар ни? Хаҷан сыйых аларға Татьяна Потапова хығыртылғанда, хахап таа парғам. «Хакасия» газетада культура пӧлиинің редакторы полчатхан хабарҷы мындағ аарластығ атха хаҷанох турысхан полар тіп сағынҷаңмын. Аның ӱчӱн хайди ӧрінмес. Уғаа чахсы хабарҷы редакцияда ӱр чыл тоғын парир. Аның тирең сағыстығ материалларын хаҷан даа хынып хығырчалар, прайзы даа махтапча.
«Чыл газетазы» атха пӱӱл «Черногорский рабочий» турысхан. Аның редакторы Алла Корзунованың ӧрінізі оңнығ нимес, чайаачы ӧмемні уламох матап тоғынарға кӧӧктірербін тіп прайзын даа ізендірчеткен. Піс аннаң хада ӧрініскебіс.
Таныхтирға кирек, орындағы журналисттер пірігізінің кнезі Ольга Ширковецтің ӧткін хайынғаны сылтаанда Хакасия правительствозының министерстволары паза ведомстволары постарынаң пик палғалыс тутчатхан, тоғыстарын алғым чарытчатхан хабарҷыларға алынҷа сыйыхтар читіргеннер, уламох пӧзік чидіглерге чит турарға алғааннар.
Мындағ ӧрчіліг туста марығ чиңісчілерін постарының чайаачы устарынаң уламох тың ӧріндір турғаннар пістің саблығ ырҷыларыбыс Герман Танбаев, Аселя Давлетова, Ирина Кулагашева. Хабарҷылар таныс сарыннарны чайаачы устарнаң хада толдырчатханнар. Олғаннарның хайдағ даа теелбектерін хазыр айа сабызынаң таныхтап, ӧрчіліг хысхырысханнар.
Пу чылның марығ салтарлары иділ парды, чиңісчілер адалды, сыйыхтар ӱлестірілді. Че алнында чайаачы кӧңніліг хабарҷыларны уламох хынығ паза хазыр марығлар сағыпчалар. Хоос сӧстің кӱзі илбек, пірсі пірсінең артых материаллар пас турарға прайзы даа матап харазар. Сыйыхтар аларға хаҷан даа ӧріністіг нооза. Че аны утып алар ӱчӱн кӧп кӱс хорадарға килісче.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде