ААЛДА ЧУРТИР КӦҢНІЛЕРІ ПАР
Тоғыс чорығы. Хакасия пазы Валентин Коновалов пу понедельникте Алтай аймаандағы Ызых аалзар тоғыс чорығынаң читкен
Ызых поселок алнында Хакасия пазы Валентин Коноваловты республиканың транспорт паза чол хонии министрі Дмитрий Василиади, Алтай аймаа пазы Ирина Войнова, «ДСК-77» ООО устағҷызының орынҷызы Томас Сиукаев паза пасхазы удурлааннар. Аал тастында чолны нааҷылирынҷа тоғыстар апарылча. Чайғызын пу орында хуруғ поладыр, часхызын, тізең, чазытағлардаң инчеткен суғ пу чол алнында тол парча, аннаңар аның алтынҷа суғны иртірҷең ӧнетін трубалар кӧріл парған. Че ол, чылларға иргілен парып, иңзерілерінең чолға хорғыс ағылған.
– Пӱӱнгі кӱнде чол 90 процентке тимде, – чарытхан Дмитрий Василиади. – Чол алтында узуны 32 метр труба тартылған, асфальт тӧзирге 60 азыра метр чол тимде, ол ікі саринаң сиденнелер, ідӧк чазағ чӧрчеткеннерге чол тимнелер.
Хакасия пазы толдырылған тоғыстарны паалаан паза Палых заводы – Ызых чолның пу орны республика ахчазына нааҷылалғанын таныхтаан. «Хакасияның транспорт системазының тилізі» республика программазынҷа пу чолны нааҷылирына 15 миллион салковай позыдылған. Тыхтағ тоғыстарын «ДСК-77» ООО толдырған. Томас Сиукаевтiң таниинаң, чол сидік тее полза, олар ағаа сыданғаннар, ахча тузында позыдылған, аннаңар тоғыстар чарыс айының 1-ғы кӱніне толдырыл парар. Пу чол пӱдірии пірігізі республикада пір ле чол ӱчӱн нандырбинчаттыр, аннаңар, мында тоғысты тоозып, устағ-пастағ чолҷыларны паза техниканы пасха чолзар чапчаң ызарға пӧгінче. Аал істінде, тізең, Октябрьның 50 чылы орамада ідӧк тыхтағ тоғыстары парча. Хакасия пазы андағы тоғыстарны паалаанох, анаң аалдағы Культура туразынзар чол тутхан. Анда республика правительствозының делегациязын аал чӧбі пазы Ирина Щепилова паза Культура туразының устағҷызы Елена Тарасова удурлааннар.
Республика пазынаң тоғазыға чуртағҷылар 15 минута аразына ла чыылызыбысханнар. Оларға Хакасияның 2021 чылдағы чуртас-экономика тилізінеңер паза ӧӧн кӧстеглерінеңер кӧзідіг кӧртізілген. Хакасия пазы, тізең, республика правительствозынаң парламент чаратхан Тиліс стратегиязының ӧӧн кӧстеглерін чарыт пирген, анаң сӧс алған Алтай аймаа пазына наа табылған Ирина Войнова. Ол чооғында Хакасия пазына паза правительстваа Ызых поселоктың сидіксіністерін пӧкчеткен ӱчӱн алғызын читірген паза халғанҷы пӧгілген сурығларны чарыт пирген, ол санда чоллар, оларға позыдылған ахча ӱзӱрлелген сылтаанда, пасха орамаларда улуғ нимес тыхтағ тоғыстары толдырылар; 2023 чылда аалда спорт площадказын пӱдірері хазна программазына кирілген; республика бюджедінең позыдылған ахчаа школада кӧзенектер алыстырылған, химия паза физика кабинеттері тиксі нааҷылалған паза пасхазы.
Ирина Ивановнаның алғыстазына пасха даа чуртағҷылар хозылған, ол санда орындағы школаның устағҷызы Валерия Харвонен. Че ол ам даа пӧгілбеен сурығларға хайығ айландырған. Школадох олған сады тоғынчаттыр. Ол тыхтағ киректепче. Валерия Константиновна тасхархы террасаларны алыстырыбызар сағызынаң ӱлескен. Прай пу тоғыстарға смета пічіктері паза экспертиза тимде осхас. Валентин Олегович чуртағҷыларны ізендірген: пу тоғыстар федеральнай программаларға кирілгеннер паза 2024 чылда толдырыларлар.
Улуғ частығ чуртағҷы, сизінгенде, республика пазынаң тоғазыға Хубачардаң килтір, илееде сурығ тимнеп салтыр, ол санда Валентин Коноваловтың республика пазына табығларда аралазарға чаратханын піліп, ағаа амох чоннаң тоғыс апарарға чӧптеен. Позы ирен 1969 чылдаң сығара КПРФ-тың араласчызы полтыр. Валентин Коновалов аның чӧбіне нандырған:
– Минің кӧрізімнең, адым ӱчӱн республика пазы орнында толдырчатхан киректерім чоохтир. Сағынчам, кӧзітчең салтар пар!
Сидік сурығларның ӧӧн чардығы Хубачар аалға теелген, ол санда чоллардаңар паза ээзі чох адайлардаңар сурығлар. Ирина Войнова оларға хайығ айландырарға молҷаан. Паза пір сурығ «Чаа палалары» хумартхы тасха теелген. Тынағдағы кізі ағаа Ағбан городтың Чиңіс паркында орын табарға сурынған. Республика пазы нандыриинаң, Хакасия правительствозы паза Ағбан город устағ-пастаа Чиңіс паркының наа проектін чарат салғаннар, анда ідӧк «Чаа палалары» хумартхы тасха орын кӧріл парған. Чағынғы чылларда парк нааҷылалар, тоғыстарға ідӧк республика бюджедінең ахча позыдылар.
Тиксі алза, Ызых поселоктың чуртағҷылары амғы правительствоның хайиина чӧпсінчелер. Хысха тус аразына аалда наа Культура туразы турғызылған, суғ трубалары тиксі нааҷылалған, суғ ультрафиолет полызиинаң арығлалча паза пасхазы. «Амды аалда чуртирың килче!» – тіпчелер иреннер дее, ипчілер дее.
Хакасия пазы Валентин Коновалов республиканаң устап пастаандох город-ааллар чуртағҷыларынаң паза предприятиелернің тоғысчы ӧмелерінең тоғазығлар иртірерін кирген. Коронавирус тараанда, пу чахсы кирек тохтадылған. 2022 чылда, ағырығ сала «амырабысханда», тоғазығлар уламох удаа иртіріл сыххан. Кӧстең кӧcке сурығлар пирер, айланыстарнаң паза чӧптернең сығар оңдайнаң чуртағҷылар тузалан халарға кӱстенчелер. Республика ӱлгӱлеріне дее тоғазығлар тузалығ иртче, алында санға алылбаан сидіксіністер сығысча паза чапчаң пӧгілче.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |