IЗЕСТІГ АРАЧЫЛАҒҶЫЛАР ХОЙНЫНДА
Пайрам. Пу кӱннерде Хакасиядағы ӧртнең харбасчаң службаның тӧреен кӱні полған.
Ол 2008 чылда тӧстелген Ағбандағы С.П.Кадышевтің адынаң чон чайаачызы национальнай кіннің кічіг залында Хакасиядағы ӧртнең харбасчаң службаның тоғынҷыларын чеестееннер. Оларның службазына 14 чыл тол парған. Пеер прай республиканың ӧрт ӱзiрҷеңнерiнің иң матыр тоғынҷылары чыылысханнар.
Мероприятие пасталар алнында, Россия Федерациязының паза Хакас Республиканың хазна гимннері ойнадылған. Анаң улуғ экранда республикадағы ӧрт ӱзiрҷең службаның тоғызынаңар хысхаҷах кино кӧзіткеннер.
Ӧрт ӱзiрҷең отрядтар хаҷанох полҷаңнар, че Хакасияда андағ алынҷа служба 13 августта 2008 чылда тӧстелген. Аның холында прай республика чирі полған. Пастап анда 579 кізі тоғынған. Олар 25 ӧрт ӱзірҷең пӧлікке чарылғаннар. Анаң 2010 чылда ӧрт ӱзірҷең служба хазнаның казеннай учреждениезi пол парған. Тоғынҷылар саны 602 полған. Халғанҷы чылларда Асхыс аймаандағы ӱс чул паза Палыхтығ суғ аалларда, iдӧк Орджоникидзе аймаандағы Приисковай аалда ӧрт ӱзірҷеңнернің наа пӧліктері азылған.
Хакас Республика правительствозында региондағы ӧрт ӱзірҷеңнер службазының 2027 чылға теере тиліс пӧгіннерін чарат салғаннар. Оларны толдырар ӱчӱн, 590 миллион азыра салковай хорадары кӧріл парған. ӧрт ӱзірҷеңнерге социальнай полызығларны алғыдарға чаратханнар.
Пӱӱнгі кӱнге службада 78 ӧнетін машина саналча. Халғанҷы чылларда ла хайдағ даа чолларҷа чӧрҷең пис автоцистерна алылған.
Кӧп хайығ салылча кізілерні ӧрттең арачылир чарыдығлығ тоғыстарға. ӧрт ӱзiрҷеңнер, турадаң тураа чӧріп, сизіндірігліг чаҷыннар таратчалар. Аалларда ӧнетін дружиналар тӧстелчелер. Андар чӧрчеткен чииттер соонаң ол профессияны таллап алчалар. Тренировкалар паза марығлар удаа иртірілче. Пір сӧснең, Хакасиядағы ӧрт ӱзірҷең службаның тоғынҷылары постарының тоғыстарын турыстыра толдырчалар.
Хакасиядағы ӧрт ӱзірҷеңнерні алғыстирға килген Хакасия пазы Валентин Коновалов. Ол, чыылған чонны ӱлӱкӱннең алғыстап, піди таныхтаан, республиканың правительствозы ӧрт ӱзірҷең службаа полызарға кӱстенче. Наа техника алылча, хоза штат пирілче паза социальнай хабазығлар алғыдылча. Бюджеттең ахча хоза пир турарға пӧгін пар. Хакасияның ӧӧркі Чӧбінзер ӧрт ӱзiрҷеңнерні сыйыхтирға «Хакас Республиканың ӧрт ӱзiрерінҷе аарластығ тоғынҷызы» ат пир турардаңар чӧп пирілген.
Анаң Хакас Республиканың пазы Валентин Коновалов иң турыстыра тоғынҷылар Валерий Генкеге, Андрей Чебодаевке, Раиса Забродинаа паза Сергей Гуськовха Хакас Республиканың Аарластығ пічіктерін читірген. Iдӧк Хакасия пазының алғыстас пічіктерін алты кізi алған.
Андох Хакасия пазы ӧрт ӱзірҷең наа автоцистернаның клӱзін Шира аймаандағы пӧлікке читірген.
Хакасияның ӧӧркі Чӧбіндегі чир-чайаан ис-пайы паза экология комитедінің кнезі Валерий Старостин, ӧрт ӱзірҷеңнерні алғыстап, пис кізее алғыстас пічіктерін сыйлаан.
Піс соонаң Хакасия правительствозынаң Аарластығ пічік алған Андрей Чебодаевнең кӧп нимес чоохтазып алғабыс. Ол Аcхыстағы ӧрт ӱзірҷеңнер службазынзар 2000 чылда армия соонда килтір. Армияда iдӧк ӧрт ӱзірҷең пӧлікте служба иртір. Ол позы водитель полча. Пiлдістіг, ӧрт сыххан чирзер аар машиналығ табырах ойладарға килісче. Мында руль ээзіне улуғ ус поларға кирек. Ибде аны ипчізі паза пала-пархалары сағыпчалар. Аның 1 оол паза iкі хыс.
Хакасияның ӧрт ӱзірҷеңнерін, сарын сарнап, алғыстаан республиканың чон артизі Герман Танбаев паза «Айас» ӧменің хызыҷахтары теелбек сал пиргеннер.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |