Кемнер мобилизацияа тартылар?
23.09.2022
Хабарлар
Брифинг. Хакасияның юстиция министерствозының мобилизация тоғызынҷа департаментінің устағ паза искіріг пӧлии устағҷызы Сергей Максимов чардыхти мобилизациядаңар чарыда чоохтап пирген
Кемнер мобилизацияа тартылар?
23 сентябрьда Хакасия правительствозы туразында чардыхти мобилизацияа чарыдылған брифинг ирткен. Анда Хакасияның юстиция министерствозының мобилизация тоғызынҷа департаментінің устағ паза искіріг пілии устағҷызы Сергей Максимов пістің республикада кемнерні мобилизацияа тартарларын чарыт пирген.
– Ӱр ниместе Хакасиязар мобилизация телеграммазы килген, – искірген ол.– Иң не пурун Тирігліг кӱстерде служба ирткен, алынҷа чааҷы специальнозы паза килістіре опыды пар полған чуртағҷылар хығыртығ аларлар.
Россияның арачыланыс министерствозы нинҷе чааҷы хығыртардаңар пирген пігін муниципальнай пӱдістернің прай комиссариаттарынҷа ызыл партыр. Город-аймахтарның пастарына мобилизация пігінін толдырарына хабазарға чахығ пирілтір.
– Хакас Республикадаң пастағы разряд запазында полчатхан чуртағҷылар хығыртылар, таныхтаан Сергей Максимов. – Кемнер олар? Ол 35 часха теере солдаттар паза сержанттар. Запастағы офицерлер амғы туста Хакасиядаң хығыртылбастар. Солдаттарны паза сержанттарны тимнир тоғыснаң чаалазығларда араласхан опыды пар офицерлер айғазарлар.
Сергей Максимовтың искіриинең, амғы туста студенттерні, срочнай службаа хығыртылчатханнарны мобилизация тартардаңар чоох пір дее чоғыл. ідік суурылбаан алай тоозылбаан чарғылатханы пар чуртағҷылар хығыртпастар.
Кемнер хығыртылбас:
– срочнай чааҷы службазын апарчатханнар;
– хазна вузтарында, училищелерінде, колледжтерінде паза техникумнарында очнай оңдайнаң ӱгренчеткен, запаста полбинчатхан студенттер, ӱгренҷілер;
– бакалавриат тоосхан соонаң магистратураа алай аспирантураа ӱгренерге кіріп алған студенттер;
–суурылбаан алай тоозылбаан чарғылатханы пар чуртағҷылар;
– мобилизация пігіннері пар алай оларны толдырарына хабасчатхан организацияларның тоғынҷылары;
– хазии хоостыра чааҷы службазына чарас нимес полчатханнар;
– хығыртығнаң позыдыларына пасха законнығ тістеглері пар чуртағҷылар.
Хазнада чааҷы запазында полған тиксі 25 миллионҷа кізі саналча осхас. Хакасияда –100 муң артиинаң. Че чардыхти мобилизация тузында хазнадаң 300 муңҷа ла кізіні хығыртары кірілче – служба ирткен, алынҷа чааҷы специальнозы паза килістіре опыды пар полғаннарны. Хакасиядаң нинҷе кізі хығыртыларынаңар саннар искірілбеен.
Че мобилизация тоғызынҷа департамент кізізі таниинаң, Хакасия улуғ нимес регион, аннаңар мыннаң тың кіп кізі апарбастар. 22 сентябрьдаң пасти хығыртығ пічіктерін ыс сыхтырлар. Хығыртылғаннарға комиссариатсар кирек пічіктерні ағыл килерге кирек: хығыртығ пічиин, паспорт, чааҷы биледін, водитель правазын паза пасхаларны. Полған на кізі имнег комиссиязын иртер.
Хакасияның чааҷы тимненізін иртірҷең килістіре полигоны чоғыл, аннаңар хығыртылғаннарны іін чааҷы округының чааҷы частьтарынзар ызарлар. Анда оларға чааҷы кип-азаа, кирек тиріглер пирілер. Тимненіc тузы 5 айҷа полар тіп кірілче.
– Пірдеезі атыс алтында полбаан, ӱгреділбеен кізілерні ызарға сағынминча, – таныхтаан Сергей Максимов.
ідік ол хығыртылған чааҷыларға прай кирек социальнай хабазығ, ол санда Хакасия правительствозы саринаң – амғы туста регион синінде льготалар пирҷең паза полысчаң оңдайлар тимнелчеттір, пирілер тіп ізендірген. Оларның тоғыс орыннары хайраллалар, льготалар хоостыра олар контрактча служба апарчатханнарға тиңнелерлер.
Сергей Максимов брифингті тоозып, мобилизацияа тартылар кізілерзер айланған:
– Аарлығ иреннер! Піс Ада чир-суу арачылағҷызы полчабыстар. Ундубаңар, сірернің кистіңерде сібіренер, сірернің ипчіңер палаларыңар, іҷе-пабаңар... Пістің пігінібіс – постың конституционнай ідізібісті толдырары. Киртініңер, хорғыс сынап пар. Сірер аны прайзыңар кірчезер – ол Запад саринаң хорғыс. Россия хаҷан даа пик полған, чааҷы-сибиряктар хаҷан даа пір чіптіг полғанынаң паза чир-сууна хынызынаң сабланҷаңнар. Ол пізік сістер нимес, мин сағынчам, полған на ир кізі аны оңарып аларға кирек. Піреезінің минуталығ хорығыс пар полза, ағаа сыданарға кирек. Мин киртінчем, пістің чуртағҷыларның кібізі – сынға тудынчатхан, пілінчеткен кізілер, хайзылары пістің Чир-суубысты арачылирына турыбызарға тимделер.
Автор :
Альберт Толмашов
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде