ЧААҶЫЛАР АЛҒЫСТАРЫН ЧИТІРЧЕЛЕР
17.10.2022
Хабарлар
Хакасия пазының орынҷызы Юрий КУРЛАЕВ (ортызында) мобилизацияа тартылғаи ооллариаң хада
Чардыхти мобилизация. Хакасиядаң мобилизацияа тартылған чааҷыларға Омск облазынзар теестегі гуманитарнай полызығ читірілген
Хайди искірче Хакасия пазының орынҷызы Юрий Курлаев (ол республика устағҷызы Валентин Коноваловтың чахиинҷа пістің оолларға хабазарға Омскта халған), мобилизацияа тартылған пістің чааҷыларның чуртас оңдайларынаң палғалыстығ сурығлар пӧгілче, ӱр ниместе Хакасиядаң теестегі гуманитарнай полызығ читкен.
«Киҷее 6 час иртен пістің оолларны Новосибирск городтаң ағылған эшелонны удурлаабыс. Оларны чааҷы частьына теере ӱдескем. Анда оларны прайзы пар полғанын сыныхтабысханнар, анаң чаачы кип-азаан пиріп пастааннар. Улуғ хомзынысха, кичее прайзын тонандыр полбааннар, обмундирование чидіспинче. Че аны кӱннің сай ағылчалар. Пістің оолларға нинче форма килгенін позым сыныхтабызарбын. Че пӱӱн-таңда оларны соохталчатхан тусха килістіре хайди даа тонандырыбызарлар. Оолларның чардығы чааҷы частьында ӱгредіг иртче, чардығы чайғы полигонзар парыбысхан. Пӱӱн андар пар килербін, олар анда хайдағ оңдайларда чуртапчатханын кӧріп аларға.
Ідӧк киҷее оолларға республикадаң фуралығ гуманитарнай таарлағ килген. Пірее кізілер ниме-ноо пӱдӱн чидер бе тіп ікінҷілееннер. Сағыссырабаңар, прай ниме читкен. Пістің ооллар чылығ кип-азах, ас-тамах паза имнер ӱчӱн улуғ алғыс читірчелер. Ол гуманитарнай полызығ прайзына ӱлестірілген. Полғанына ла адалған посылка читірілген, мында пістің «Боевое братство» пірігізібістің кізілері чахсы тоғыныбысханнар. Піс 12 час харааға теере ол посылкаларны паза Хакасияның прай чуртағчылары, муниципальнай пӱдістері паза халых пірігістері чыған гуманитарнай полызығны чаачылар аразында ӱлестіргебіс», - чоохтапча Юрий Николаевич.
Паза Хакасиядаң мобилизацияа тартылған пір чааҷызар іҷезі килтір. Анзы СМИ-лардағы искіріглерге прайзы ла киртінминчеткенінең палғалыстығ. Ағаа хоза, интернет пастыра аймах-пасха тайма искіріглер тарапча нооза. Че іҷе кізі амды пістің ооллар хайдағ оңдайларда чуртапчатханын пос хараанаң кӧріп алтыр. Аның таниинаң, оларның прай ниме чахсы, мобилизацияа тартылғаннар палаткаларда паза ангарларда чуртапчалар, тосхымнығ азырапчалар.
Автор :
Тимнеен Альберт ТОЛМАШОВ
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде