ЗАПАСТАҒЫ ОФИЦЕРЛЕР ХЫҒЫРТЫЛҒАННАР
Чардыхти мобилизация. Россияның Тирiглiг кӱстерiнiң чааҷылар службазына мобилизация хоостыра Хакасиядаң офицерлер хығыртылғаннар. Олар Украинада иртiрiлчеткен ӧнетiн чаа операциязында аралазарлар
Пiстiң республика Россия президентiнiң Указы хоостыра иртiрiлчеткен чардыхти мобилизацияны хазнада пастағылар санында толдырыбысханнаңар чарлаан. Че мобилизацияҷа мероприятиелер ам даа тоозылбаан. Хакасияның город-аалларынаң амды запастағы паза чааҷы службазын иртчеткен дее офицерлер ӧнетiн чаа операциязында аралазарға хығыртылғаннар. Олар анда командир поларлар.
Iди 27 октябрьда иирде республиканың чааҷылар комиссариадының плацында чардыхти мобилизацияҷа чааҷы службазына хығыртылған офицерлер стройға турыбысханнар. Олар олаңай кип-азахтығ полғаннар. Пiди кӧрзе, офицерлер частары хоостыра илееде пасхалалчалар, пiреезi – чиит, пасхазы – улуғ арах.
Хакасияның чааҷылар комиссариадының тоғызын толдырчатхан подполковник Николай Видяйкин список хоостыра, чааҷыларның ады-солазын адап, прайзы стройда турчатханын сыныхтаан. Россияның паза Хакасияның гимннерi толдырылған соонаң офицерлернi пайрамни ӱдезерiне чарыдылған митинг азылған. Пастап сӧс пирiлген Хакасия пазының орынҷызы Юрий Курлаевке.
– Аарлығ чир-суғҷылар! Пӱӱн пiс сiрернi чардыхти мобилизация хоостыра чааҷылар частьынзар ӱдесчебiс. Пастап хығыртылған пiстiң оолларыбыс Омскта тимненiс иртчелер. Сiрер ам, андар парып, тӧстелген подразделениелернiң командирлерi поларзар. Сiрер Тирiглiг кӱстернiң элитазызар. Сiрерге аарластығ ӱлӱс тӱстi – Чир-суубысты арачылиры. Тоғынчатхан орыннарыңны артызып, пу чолны таллап аларға килiс парды. Iзенчебiс, Украинадағы нацизмнi чох идiп, ciрер ибзер чиңiснең айланарзар. Ибде халған туған-чағыннарыңны ундубаңар, олар сiрернi чидiкпин сағирлар. Оларға iдӧк сидiк чухча. ӧӧнi – ибзер чиңiснең тiрiг-хазых айланыңар. Оң ползын сiрерге!
Митингте iдӧк чоох тутханнар «Боевое братство» халых пiрiгiзiнiң региондағы пӧлиинiң устағҷызы Александр Векшин, Афганистандағы чаалазығның ветераны Геннадий Синельников, абыс Александр ада. Александр Векшин офицер-командирлерге постарының холындағы чааҷыларны хайраллирға алғаан. Александр ада, молитва хығырып, пiстiң чааҷыларның чуртазын ал халарға Худайдаң сурынған.
Митинг тоозылғанда, резервисттер постарын ӱдезерге килген туған-чағыннарынаң тоғасханнар. Ол туста мин Юрий Курлаевнең чоох алысхам. Хайди Хакасия пазының орынҷызы искiрген, чардыхти мобилизацияҷа республиканың город-аалларынаң прай 36 офицер хығыртылған. Чааҷылар комиссариадының имнег комиссиязы тӧрт кiзiнi хазии хоостыра артызарға чарадығ алған. Андағ оңдайнаң чааҷы службазына Хакасиядаң 32 офицер ызылча.
Iдӧк хығыртылғаннар санында капитан Сергей Кильчичаковнаң чоох алызарға оң полған. Сергей Анатольевич, Познанскай тимiр чол бригадазында техника ротазы командирiнiң орынҷызы полып, служба иртчеткен, амды мобилизация хоостыра ӧнетiн чаа операциязында аралазарға ысчалар. Ол позы Ағбанда чуртапча, Асхыс аалда тӧреен-ӧскен. Аның айланарын ибде ипчiзi, iкi палазы сағир. Офицернiң кӧңнi тӱcпинче, «Чир-суубысты арачылирға парчабыс», – тiпче. Хығыртылған прай офицерлернiң сағызы андағ тiп чарытча Сергей.
Оларны иирде, Ағбан – Москва поездке одыртып, Омскка теере апарыбысханнар.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |