ПӦГІН – ПАЛҒАЛЫСТЫ АЛҒЫДАРҒА
Пресс-конференция. Киҷее Хакасия пазы Валентин Коновалов паза Россия МИД-ының Хызылчардағы представительствозының устағҷызы Артём Захаров Луганск Чон Республиказынзар чорыхнаң чӧргенінеңер хабарҷыларнаң ӱлескеннер
– Чорыхтың ӧӧн пӧгiнi паза Хакасия Россияның наа регионына хайди полыс полар?
– Луганск Чон Республиказынаң пiс сентябрьдох палғалыс тудып пастаабыс. Ол ӱгредiг кӧстеенҷе полған. Чорыхтың ӧӧн пӧгiнi, тiзең, iкi субъект аразындағы палғалысты алғыдары полча. Iди регион устағ-пастаанаң тоғазығда пiс аймах кӧстеглерҷе хада-пiрге тоғынардаңар пір чӧпке килгебiс. Олар – экономика, социальнай кӧстег паза даа пасхазы. Iди, тӱрче полза, ЛНР-зар Хакасияның делегациязы чорыхха сығар. Ол анда промышленностьча, аал хониинҷа, садығҷа, культураҷа хада тоғынарын тыыдардаңар, опытнаң алызардаңар чӧптезiглер идер. Алынҷа хайығ аал хониина салылар. Пу чылларға ЛНР-да аал хонии тилiбеен дее тиирге чарир. Хакасияда, тiзең, мал ӧскірерiнде чидiглер асхынах нимес. Пiс опытнаң ӱлезерге тимдебіс.
Iдӧк Луганск Чон Республиказынзар чорыхнаң чӧргенде, мин ӧнетiн чаа операциязында араласчатхан Хакасия чааҷыларынаң тоғасхам, оларның кирексiнiстерiн истiп алғам паза олғаннар пасхан пiчiктернi читiр пиргем. Чааҷылар республикаа чылығ чолабит читiргеннер, – таныхтаан чооғында Валентин Олегович.
– Луганск Чон Республиказында хорғыстығ чаа полчатханы пiлдірген ме?
– Я, анда уғаа изi чох пiлдiрген. Сағынчам, андағы чуртағҷыларға мындағ оңдайларда уғаа аар чуртирға, тоғынарға... – чооғын узаратхан ол.
– Луганскта Чиит дипломаттар клубы тӧстелген. Аның араласчыларының кӧңнiлерi хайдағдыр?
– Чиит дипломаттар клубы – ол иң пастап профориентация проекті. Кӧзiдiмге, ирткен чылда Катановтың адынаң национальнай гимназияда мындағ клуб азылған. Амды аның нинҷе-де араласчызы квотаҷа МГИМО-да ӱгренче! Олар – таңдағы дипломаттар! Полған на регион андағ чидiгнең махтан полбас. Чӧптезiг хоостыра олар ӱгренген соонаң республиказар айланарға киректер.
Аннаңар Луганск Республиканың ӱгренҷiлерi анда чиит дипломаттар клубы азылғанына iдӧк поғдархапчалар паза ӧрiнчелер. Андар олғаннар пос кӧңнiнең алылғаннар, iдӧк оларның хайди ӱгренчеткенi санға алылған.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |