ЧИТКЕН ЧИДIГЛЕРДЕ ТОХТАБАСХА
Сыйыхтас. Хакасия пазы Валентин Коновалов тиксi Россия синiндегi чемпионаттарда, олимпиадаларда, марығларда чиңiс тутхан студенттернi паза ӱгретчiлернi алғыстаан паза сыйыхтар читiрген
Студенттернi улуғ марығларға чахсы тимнеп алар ӱчӱн, ортын профессиональнай ӱгредiг организацияларына амғы тусха килiстiре узанҷаң орыннар кирек. Хакасияның техникум-колледжтерiнде пу кӧстегҷе тоғыс хаҷаннаң апарылча паза «Чиит устар» чемпионаттар иртче. Анда араласхан студенттер постарын Россия синiнде турыстыра кӧзiтчелер.
Iди пӱӱл ол чемпионатта иң пӧзiк баллар чыып алған 20 студент Хакасия адын федеральнай синде арачылаан. Анда пiстiң нинҷе-де студентiбiс медальларнаң таныхтатхан. Ол Сергей Сажнев, Софья Метелева (Хакасияның политехническай техникумы), Владислав Базлаев (Саяногорсктағы политехническай техникум), Алёна Василенко (Харатастағы тағ-пӱдiрiг техникумы) паза даа пасхазы.
Хакасияның профессиональнай технологиялар, экономика паза сервис колледжiнiң студентi Михаил Лидер, «Ландшафтнай дизайн» кӧстегҷе кинектер аразында марығда аралазып, Россия синiнде иң артых полыбысхан. Ағаа хоза аның мастерi Ольга Качина, «Мастер года» марығда аралазып, чиңiсчiлер санында полыбысхан.
Iдӧк профессиональнай марығларда Россия синiнде иң артых полыбысханнар Андрей Колоухов (Ағбандағы 1№ школаның англия тiлi ӱгретчiзi), Ирина Лифенко (Ағбандағы «Зоренька» олған садының педагог-психологы). Харах оды уйан олғаннарның школа-интернадының директоры Дмитрий Павленко ӧмезiнең хада «Успешная школа» тиксi Россия мариинда араласхан. Аның Иван оолғыҷаа пуох школада ӱгренче паза марығда араласханох. Хакасияның ӧмезi пiр миллион салковайға грант утып алған!
Пасха даа студенттер паза ӱгретчiлер сыйыхтығ орыннарға турысханнар.
Танығлығ кӱнде чыылығ араласчылары iдӧк тоғыстарына теелчеткен ағырсымнығ сурығлар кӧдiргеннер. Iди ӱгретчi Андрей Колоухин тиксi Россия марығларында чиңiс тутхан ӱретчiлерге аттестацияны ниик оңдайнаң иртiрер чӧпнең сыххан. Анзы iдӧк школа тоғынҷыларының пӧзiк чидiглерге чидер кӧңнiлерiн кӧдiрер тiп таныхтаан ол. Iдӧк Андрей Александрович килчеткен чылда профессиональнай марығларда аралазарға сағынчатхан ӱгретчiлерге хабазарға тимдезiн искiрген.
Федеральнай синде ирткен марығларда чиңiс тутхан cтуденттерге паза ӱгретчiлерге Хакасия пазы Валентин Коновалов алғыстас пiчiктерiн читiрген паза мыннаң мындар улам пӧзiк чидiглерге чидерге алғаан.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |