ОЛИМП ЧЕМПИОННАРЫ ХАКАСИЯДА
Саналығ чарыс. 16 ноябрьда пістің республиказар хазнабыстың саблығ спортсменнері учух килгеннер. Олар Россия кубогында аралазарлар
Ағбандағы аэропортта 16 ноябрьда кізі тол парған. Прайзы саналығ чарысча Россияның піріктірілген командазын сағаан. ӧӧн пӧгін – олимп чемпионнары Александр Большуновты, Наталья Непряеваны, Юлия Ступакты, Денис Спицовты паза Алексей Червоткинні удурлиры.
Спорт школаларының ӱгренҷілері спортсменнернің сомнарын тимнеп салтырлар. Большунов хол сал пиреріне ізеніс пар нооза. Аймах редакцияларның хабарҷылары чемпионнарның піреезі чоох алызар ба тіп чӱрексіпчелер. Аэропорт тоғынҷыларының спорт «чылтыстарын» пос хараанаң кӧріп алар сағыс парох. Сомға хада суурынып алза, уламох чахсы.
Самолет учух килді. Спортсменнер чоғыл. Арса, кӧнізінең Тӧӧ пазынзар парыбыстылар? Чох, терминалға толдыра искіріг: «Саналығ чарысча Россияның піріктірілген командазын удурлапчабыс».
Спортсменнер, залдағы чонны кӧр салып, пастап алаң ас парғаннар. Чолға майых парған улус, Тӧӧ пазынзар чидіп, тынанып аларға сағынчатпас па.
Итседе, Хакасияда оларны чылығ удурлаанына ӧрінчелерӧк. Командадағылар хынып, олғаннарнаң хол сабысханнар, ӧменең сомға суурынғаннар. Пір дее чарханмин сомнарда хол салғаннар. Автограф-сессия соонаң Наталья Непряева, Денис Спицов паза Алексей Червоткин сала маңзыри автобуссар одырарға парыбысханнар. Юлия Ступакты палалар позыдарға хынмааннар. Абахай ипчінің ӧскен сыны 167 сантиметр полтыр, пір дее пӧзік кӧрінминче.
Ағбандағы аэропортта Александр Большуновтың фотосессиязы ирткен тиирге чарир. Тилекейге саблығ олимп чемпионын прайзы чахсы таныпча. Спортсмен кізілернең сомға суурынчатхан аразында Хакасияның физическай культура паза спорт министерствозының пресс-хачызы Валерия Тамбовцева аны хабарҷыларнаң хысхаҷахти чоохтазып аларға чӧптеп алған. Таныхтирға кирек, «ағырчатхан» улус А.А.Большуновты «саналар ханы» солалып салған. Ол иреннер аразында саналығ чарыстың прай алты олимп дисциплиназында медальлар утхан чалғыс спортсмен полча. 25 частығ Александр Большунов спринттер дее, марафоннар даа чӱгӱрерге кӱс. Пӱӱл Олим ойыннарында ол Россияа 5 медаль ағылған: 3 алтын, 1 кӱмӱс паза 1 хола. Хабарҷыларның сурығларына нандырып, саблығ спортсмен теен:
– Хакасиязар ирткен неделядох килерге кирек полғабыс. Че хар чохтаңар ам ла читтiбіс. Тӧӧ пазында илееде тус полбадым. ізенчем, хар читкiҷе полза, тренировкалар чахсы иртерлер.
Александр Большунов пу сезонда марығласхалах. Ол азаан кинет салған. Тӧӧ пазында 19-20 ноябрьда Россия кубогының I чардығы иртер. Анда кӱс сынирға пӧгінче. Пістің спортсменнернең тоғыр хатығластар кирілгенде, чир-суғҷыларыбыс тилекей кубогында, чоннар аразындағы турнирларда аралас полбинчалар. Саналығ чарысха хынчатхан улус Россия марығларын федеральнай каналларда кӧзідерге сурынтыр. Большунов пу сағыснаң чарасча. Анзы тиксі Россияда саналығ чарысты наа синге кӧдірерге ондай пирер.
Cаналығ чарысча Россияның піріктірілген командазының араласчылары Хакасиязар 8 ноябрьда киліп пастааннар. Ол кӱн республиканың спорт министерствозының ӧмезі 13 кізіні, ол санда ӧӧн тренер Олег Перевозчиковты удурлаан. 14 ноябрьда Ағбанзар олимп чемпионнары Татьяна Соринанаң Вероника Степанова читкеннер. Спортсменнер ӧӧрелері Наталья Непряеванаң паза Юлия Ступакнаң хада пӱӱл Пекинде эстафетада чиңіс тутханнар. Андадох кізілер хайиин 21 частығ Вероника тартхан. Олимп ойыннары тузында пістің оол-хыстарнаң тың тартысханнар. Чітіг тілліг Cтепанова, команда ӱчӱн турызып, пірдеезіне маң пирбеен. Хакасиязар килер алнында ол социальнай сетьтердегі страницаларында пас салтыр: «ӧрін, Сибирь, ылға, Европа. Сірер кӧр полбассар пістің галопты». Спорт министерствозы пресс-службазының таниинаң, Тӧӧ пазында марығлазарға аның кӧңніне кірче. Анда спортсменнерге иcтіг оңдайлар тӧcтелген. Амғы спорт сезоны хынығ иртеріне Вероника Степанова ікінҷілебинче.
16 ноябрьда Россияның піріктірілген командазынаң хада ідӧк Россияның саналығ чарысча федерациязының президенті Елена Вяльбе учух килген. Хабарҷылар Елена Валерьевнанаң тоғазарға маңнанмааннар.
Россия кубогынзар айланза, 19 ноябрьда спортсменнер классика спринтінде кӱстерін cынирлар. 20 ноябрьда ипчілер пос оңдайлығ cтильнең 5 километр чӱгӱрерлер, иреннер – 10 километр. Олар Хакасия чуртағҷыларын кӱстіглер мариин кӧріп аларға хығырчалар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |