ЧУРТАҒҶЫЛАРНАҢ АЗЫХ ЧООХТАЗЫҒ
Тоғыс чорығы. 16 ноябрьда Таштып аймаанда республика пазы Валентин Коновалов паза аал хонии министрi Сергей Труфанов, культура министрi Светлана Окольникова, ӱгредiг министрінің орынҷызы Юрий Сагалаков, национальнай паза территориальнай политика министрінің орынҷызы Юрий Чертыков пол килгеннер
Таштып аймааның администрациязында Валентин Коновалов республика синiнде хакас тiлi мариинда утып алған пастағы класстарның ӱгренҷiлерiн сыйыхтаан. Олар – Михаил Султреков (Ибiгдегi школа), Никита Кунучаков (Пыдырахтағы школа), Сергей Тенезбаев (Пыдырахтағы школа). Пос тiлiн чахсы пiлчеткен ӧткiн оолахтарға 15 муң салковайға сертификаттар читiрiлген.
Анаң республика пазының тоғыс чорығы Улуғ Сии аалда узарадылған. Мында пӱӱл школаларны пӱкӱлеезiнең нааҷылир «Наа школа» хазна программазынҷа Улуғ Сиидегі школа тыхталған. Пу тоғысха федеральнай бюджеттең 27 миллионҷа салковай пирiлген, 6 миллионҷа – республика бюджедiнең. Школада электропроводка, хыр алыстырылған паза даа пасха алғым тыхтағ тоғыстары апарылған, пис миллионға наа мебель алылған. Пу школада Улуғ Сии, Кiчiг Сии, Чоғархы Сии, Сипчул аалларның палалары ӱгренчелер, прай чӱс азыра ӱгренҷi. Школа директоры Ирина Бутонаева Хакасия пазы Валентин Коноваловты, Таштып аймаа пазы Николай Чебодаевтi паза даа пасха пастыхтарны чарых спортзалҷа, сiлiг кабинеттерҷе, пай школа музейiнҷе ал чӧрген. ӱлгӱ пос хараанаң кӧрiп алған – хайдағ истiг орында аалдағы ӱгретчiлер тоғынчалар, палалар ӱгренчелер.
Анаң пастыхтар Улуғ Сии аалның Культура туразында аал чуртағҷыларынаң тоғасханнар. Чыылған чонға «Хакасия пiстiң кӱннерде» хысхаҷах фильм кӧзiдiлген, анда халғанҷы чылларда республика хайдағ чидiглерге читкеннеңер чоох парған.
Валентин Олегович чоох тутхан соонаң кiзiлер аймах сурығлар пир сыхханнар, хай пiреезiне аал хонии министрi нандырған. Чоох модульнай ветпункт, мал сохчаң цехтаңар, ФАП пӱдiрерiнеңер, специалисттер чидiспинчеткенінеңер, чурт приватизациязынаңар парған. Аал хонии министрі Сергей Труфанов, аал хониинда специалисттер чидiспинчеткенiн таныхтап, чуртағҷыларзар палаларыңны аал хонии специалисттеріне ӱгренерге ызыңар тiп сурыныснаң айланған. Паза сурығлар полған: ноға ағас узурҷаң орыннар аалдаң iди ырах пирiлче, хайди хара тасха пааларны тӱзiрiбiзерге чарир паза пасха даа. Чон алнында одырчатхан ӱлгӱ прай сурығларға тирең нандырығлар пирген, хайда-да аймах пазы, пасхазында аал чӧбiнiң пазы чоохтанған, че ӧӧнiнде республика пазы нандырған.
Улуғ Сии соонаң ӱлгӱнiң тоғыс чорығы Арбыт аал чӧбiнде узарадылған. Кiчiг Арбыт аалда Культура туразында алғым тыхтағ тоғыстары хыызында парча, 1 декабрьға тоос саларға киректер. Ол тыхтағлар «Аалларның тиксі тилізі» хазна программазынҷа апарылча. Тыхтағ тоғызын апарчатхан «Востоксантехмонтаж» ООО-ның устағҷызы Станислав Чучалин, пастыхтарға Культура туразында хайдағ тоғыстар апарылчатханын, ниме идiбiзерге халғанын, чоохтап, прай кӧзiт пирген.
Арбыт аалда, тiзең, Валентин Коновалов Николай Чебодаевнең хада «Казачья усадьба» музейзер кiргеннер, аның директоры Ольга Чанчикова музейнiң потологы изелчеткенiн кӧзiт пирген, тура хыры ӧтiре суғ ахчатханына хоптанған. Республика пазы, 2,5 миллионҷа салковай пирiп, хабас пирербiс теен. Ольга Чанчикова прай кирек пічіктерні азынада тимнеп салған, нимее 2,5 миллион салковай киректелчеткені анда пазылых.
Арбыт аал чӧбi чуртағҷыларынаң тоғазығ Культура туразында ирткен. Чоннаң тоғазар алнында, Валентин Олеговичтің холынаң пастағы класстың ӱгренҷiлері Виктор Сазанаков паза Марианна Сазанакова ахчалығ сертификаттар алғаннар, олар iдӧк хакас тілі мариинда араласханнар. Кiзiлернiң кӧп ағырсымнығ сурығ чыыл парған, оларның пiрсi – имнег туразынзар чидiп алары. Арбыттағыларға Таштыптағы имнег туразынзар чӧрерге килiсче, Абаза, тiзең, чағын на. Iди ырах сын азыра парарға сидiксiнiстiг. Валентин Коновалов ол сурығны хазых хайраллаҷаң министрнең, ӧӧн имҷiнең, чонға чыылығ иртiрiп, чӧптезiп алып, пӧгерге теен. Пасха сурығлар сӧп-сап тарифтерiне, чолларға, почта, аптека, имнег амбулаториязы тоғызына, изелчеткен тураларны хыйа аларына, аал хониина паза пасха даа нимее чарыдылған. Азых чоохтазығда республика пазы, министрлер, аал чӧбi паза аймах пастары кiзiлерге чарыда нандырғаннар.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |