ЧУРТАС КӰСКӰЗI АЛТЫН ПОЛЗЫН
"Чон кӧглері" ӧме іҷедеңер сарын толдырча
Ӱлӱкӱн. С.П.Кадышевтiң адынаң чон чайаачызының кiнiнде улуғланыбысхан кiзiлерге тимнелген «Чуртас кӱскӱзi алтын ползын» республика фестивальы ирткен
Ол іҷе кӱнiне чарыдылған паза улуғ частығ чуртағҷыларын республикабыстың халых, чайаачы чуртазында ӧткiн аралазаpға хығырар пӧгiннең иртiрiлген. Аның тӧстегҷілерi Хакасияның правительствозы паза культура министерствозы полчалар.
Фестивальда аймах-пасха хынығ тоғыс апарылған. Чон чайаачызы кiнiнде аймах кӧзiдiглер тимнелген, оларның санында Хакасия хоосчыларының тоғыстары, «Сибирьҷе чорых», «Алтын чiбек» кӧзiдiглер. Оларны фестиваль тоозылған соонаң даа кӧрiп аларға чарир. Iдӧк мында аймах мастер-класстар ирткеннер. Фестиваль аалҷыларын Наа чылға ойнаҷахтар идерге, иирген тӱкнең спица паза крючок чох палғирға, чаҷыннаң сiлiг харыҷахтар хыплирға паза алғыстастығ хоос пiчiктер тимнирге ӱгреткеннер. Пiр стол хыринда, тiзең, сырай-холға сӱртклир кремнер, маскалар кӧзiдiге сығар салтырлар, аны тимнеен ипчiлер прай ол нимелернең тузалан кӧрерге хығырчатханнар, чӧптер пирчеткеннер. Мындох татхыннығ, им оттығ чейлер, хой теерiзiнең тiгiлген ибде кисчең ӧдiктер садызып аларға чарир полған.
Паза чон чайаачызының кiнi фестиваль араласчыларының хайиина хакас караоке сарыннарының чыындызын сығарған. Чонға чахсы таныс, саблығ чайаачыларыбыс пасхан, прайзы даа хынчатхан сарыннарны флешкаа кир салтырлар. Анда прай 31 сарын. Караокенi тимнир тоғыснаң Хакасия чайаачыларының саблығ тоғынҷызы, чон артизi, сарынҷы, композитор Герман Танбаев устаан. Чыындыны аларға сағынчатханнарға С.П.Кадышевтiң адынаң чон чайаачызының кiнiнзер айланарға чарир.
Фестивальда кӧп тузалығ тоғазығлар ирткен. Чон чайаачызы кiнiнiң iкiнҷi хадылында республиканың имнег профилактиказы кiнiнiң имҷiзi Лариса Лебедева чыылысханнарға чӱрек ағырығларынаңар, пӧзiк хан кӧдірілізінеңер искiрiг хығырған. Пу ағырығларны хайди тузында ілезіне сығарардаңар, кинетiн ағырыбысса, орта тудынардаңар паза ағырбас ӱчӱн нимее хайығ саларға кирек полчатханынаңар чоохтаан. Ағбандағы имнег туразының реабилитологы Надежда Никифорова хазыхты пиктирге полысчатхан тын гимнастиказынаңар искiрген. Аның таниинаң, кӧбiзi хайди орта тынарға кирек полчатханын пiлбинче. Аннаңар аймах ағырығлар сығыс киледiр. Ол сидiксiнiстернi озарға чарир. Надежда Владимировна кӧрiгҷiлерге оой, прайзына килiсчеткен упражнениелер кӧзiткен. Залда чыылысханнар, ағаа кӧӧгiзiп, орта тынарға ӱгренгеннер. Мындох аймах имнег оборудованиезiнiң кӧзідии ирткен, хынған кiзiлерге специалисттер хан кӧдірілізiн синеп пир турчатханнар.
Хакасия МВД-зының чоннаң палғалыс тутчаң пӧлиинiң устағҷызы Сергей Кузнецов кӱҷӱрлерге хайди алаахтырт салбазынаңар чоохтаан. Аның таниинаң, халғанҷы чылларда кӱҷӱрлер ӧткiн хайынчалар, чонны алаахтырар наадаң наа оңдай тiлепчелер. Оларның холларына кiргеннернiң саны ӧзiп ле одырча. Хомзынысха, алаахтыртханнарның илеедезi улуғ частығ кiзiлер. Аннаңар ол прайзына тӧремiл сизiктiг поларға, телефонға сығдыратчатхан таныс нимес номерлерге нандырбасха чӧптеен.
Чапсых фестиваль пайрамнығ концертнең тоозылған. Мында Хакасияның улуғ частығлар хорлары iҷелерге чарыдылған сарыннар толдырғаннар. Ағбаннаң, Саяногорсктаң, Асхыстаң, Ағбан пилтiрiнең, Солнечнай, Аршаннар ааллардаң килген ӧмелер кӧрiгҷiлер алнынзар сыхханнар. Фестиваль араласчыларын паза аалҷыларын алғыстирға республика пазы Валентин Коновалов паза Хакасияның культура министрi Светлана Окольникова килгеннер.
Валентин Олегович сарын сарнааннарны уғаа чылығ, ӧрiнiстiг, аразында сағысха тӱзiрчеткен концерт ӱчӱн алғыстаан.
Полған на кiзiнiң чуртазында iҷе иң аарлығ кiзi полча теен ол. Прай iҷелернi, ууҷаларны кӱннiң сай итчеткен тоғыстары, сӧбiрелерiне, пархаларына паарсас сыйлапчатханнары ӱчӱн алғызын читiрген. Ол кӧп пала, ӧкiс олғаннарны алып ӧскiрчеткен iҷелерге алынҷа хайығ айландырған.
Хакасия пазы улуғ частығлар, ветераннар хорларының ӧткiн тоғызын, чайаачыларынаң чонны пiрiктiрерiне улуғ хозым итчеткеннерiн таныхтаан. Сiрер чонның худын хайраллапчазар теен ол. Анаң Валентин Олегович ӧмелер устағҷыларына алғыстас пiчiктерiн читiрген. Асхыстағы чон иреннер хорына, С.П.Кадышевтiң адынаң чон чайаачызы кiнiнiң «Вдохновение» ӧмезiне, Саяногорсктағы чаа паза iстенiс ветераннар хорына чайаачыда улуғ чидiглерге читкен ӱчӱн 50 муң салковайға ахчалығ сертификат сыйлалған. Ол сыйыхты ӧмелер наа костюмнар тiгерiне хорадарлар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |