Дина Карамчакова - чиңісчі
30.11.2022
Хабарлар
Россияның чоннар культуразының кіні пӱӱл «Вдохновение: художественные образы этно-визуализации» сомнар мариин чарлаан. Пу наада аның салтарлары иділді.
Кічіг хырлас айының 21-ӌi кӱнінде тиксі Россияның чайаачы сомӌылар марииның чарғыӌыларының чыылии ирткен. Марығда аралазарға Россияның 63 регионынаң 2000 азыра сурыныс кірген.
Чарғы чарадиинаң алты сомӌы марығ лауреады полыбысхан: полған на категорияда 3-ер сомӌы паза пір сомӌы Гран-при сыйиина турысхан.
Іди ööн сыйых - Гран-при - Санкт-Петербургтаң Екатерина Кулаковаа пиріл парған. Аның иң артых сомы пу хабарда пирілче.
“Профессионал” категорияда І степень Лауреады Хакас Республикадаң Дина Карамчакова “Хакас чирі” газетаның сомӌызы полыбысхан! ІІ степень Лауреады атха Кемеров облазынаң сомӌы Виктор Ковчин турысхан, ІІІ степень Лауреады атха - Хакас Республикадаң Олег Ковалёв.
“Сомға суурарға хынчатханнар” категорияда І степень Лауреады Ямало-ненецкай автоном облазынаң Валерий Кибенко полыбысхан, ІІ степень Лауреады - Москва городтаң Владимир Иванов, ІІІ степень Лауреады - Челябинск облазынаң Анна Ермакова.
Редакция öмезі хада тоғынчатхан арғызыбысты наа чиңізінең алғыстапча паза мыннаң мындар ідöк узын тыыдарға паза наа чидіглер алғапча.
Чоохтирға кирек, марығ тоғыстарын сом киреенің улуғ устары паалаан: чарғы кнезі Россия правительствозының культура, спорт, туризм паза национальнай политика департаментінің пöлік пастығы Александр Кабанов, нандырығлығ хачы, Пущино городтағы “Вертикаль” Культура кінінің кöзідіг тоғызының пöлік устағӌызы, Россияның сомӌылар пірігізінің нандырығлығ хачызы Евгения Комарова, араласчылары: В.Д.Поленовтың адынаң Россияның хазна чон чайаачызы туразының устағӌызының пастағы орынӌызы, Россияның чоннар культуразы кінінің устағӌызы Мери Русанова, Россияның сомӌылар пірігізінің кнезі, В.Д.Поленовтың адынаң Россияның хазна чон чайаачызы туразының сом искусствозынӌа специализі Дмитрий Иванов паза культурология кандидады, В.Д.Поленовтың адынаң Россияның хазна чон чайаачызы туразының Россия чоннарының культуралары кінінің тӱрк чоннары культуразынӌа эксперті Евгения Такаракова.
Кибір хоостыра иң артых 50 сом кöзідіге кирілер. Ол аннаң андар кöзіріл чöрер. Таллағны ирткен тоғыстарны тимнеен араласчылар В.Д.Поленовтың адынаң Россияның хазна чон чайаачызы туразының Россия чоннарының культуралары кінінің дипломнарынаң таныхталарлар.
Пу марығ Россия чоннарының культура ис-пайы чылына паза Чоннар аразындағы чилегеліг чоннар тілінің он чылына чарыдылған паза культуралар удур-тöдір пайызарына, пірге культура орнын хайраллирына, чоннар хайызығларын чахсыландырарына, Россия чоннарының ынархазын пиктиріне, öсчеткен тöлні чон кибірлері паза аарластары тööй полчатханына ӱгредеріне, Россия чоннарының кибірлерін хайраллирына паза тилідеріне кöстелген.
СОМНАРЫ:
СОМНАРЫ:
Автор :
Тимнеен Наталья Сюптерекова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде