ХАКАСИЯДА НАА ПОЛК ДЕЖУРСТВАА ТУРЫБЫСТЫ
02.12.2022
Хабарлар
Киҷее Ағбанда Россияның арачыланыс министрінің «2022 чылда Кии-хан тигір кӱстерінде (ВКС) иртірілчеткен тимненіс мероприятиелерінеңер» директивазы паза Россияның Тирігліг кӱстерінің Ӧӧн штабының чахығлары хоостыра, iдӧк Центральнай чаа округындағы войсколар командующайының приказынҷа мобильнай резервтің зенитнай ракеталығ полкы тӧстелген.
Хакасияның ӧӧн городында орныхчатхан наа частьтың плацынзар подразделениелернің командирлері чааҷыларын сығарғаннар. Стройға турыбысхан полктың штабы пастығы чааҷылар иртірілер мероприятиее тимдезінеңер искірген. Полктың командирі «Равняйсь! Смирно!» команда пирген, оркестр марш кӧӧн толдырған соонда «Вольно!» команда пирілген. Пайрамнығ мероприятиее хығыртылған аалҷылар строй алнында турыбысханнар.
Ведущай прайзынзар айланған: «Изеннер, аарлығ офицерлер, прапорщиктер, контрактча паза хығыртығҷа служба апарчатхан чааҷылар, пайрамнығ митингтің аалҷылары! Наа полк тӧстелчеткен кӱнге чарыдылған митинг азылчатханнаңар чарлалча». Россияның гимні толдырылған (таныхтирға кирек, прай чааҷылар аны толдырғаннар).
Пастап сӧс пирілген ВВС-тың паза ПВО-ның 14-ҷі армиязы командующайының тоғызын толдырчатхан полковник Геннадий Шлагка. Ол, чааҷыларны наа полк азылчатханынаң алғыстап, Россияның арачыланыс министрінің директивазынаңар паза Россияның Тирігліг кӱстерінің Ӧӧн штабының чахығларынаңар, Центральнай чаа округындағы войсколар командующайының приказынаңар искірген. Чааҷыларға службаны чахсы апарарға алғаан.
Аның соонда сӧс Хакасия пазы Валентин Коноваловха пирілген.
– Прайзын мындағ танығлығ кӱннең алғыстапчам! Пістің регионда наа чааҷы частьы тӧстелді. Ол пістің амыр тигірні аймах
хорғыстардаң арачылир. Амғы олаңай нимес туста республикада зенитнай ракеталығ полк тӧстелгені уғаа танығлығ полча. Хакасияның правительствозы сірерге чааҷы службазын чахсы апарарға прай саринаң хабазар, чахсы, истіг оңдайлар пирер. Россияның президенті турғысхан пӧгіннерні толдырарбыс. Пістің Тирігліг кӱстерібic хазнаның суверенитеді ӱчӱн, Чир-суубыстың таңдағызы ӱчӱн кӱрезіг апарча. Службаны турыстыра апарыңар, піс сірерге хайди даа полызарбыс. Хакасияда наа полк тӧcтелгенінең прайзын алғыстапчам, – теен республика пазы.
Iдӧк пайрамнығ митингте чоох тутхан Хакасияның Ӧӧркі Чӧп кнезі Владимир Штыгашев:
– Пістің республикада Россияның Тирігліг кӱстерінің наа полкы тӧcтел парды. Амды Украинада ӧнетін чаа операциязы иртірілчеткен туста пістің регионда наа часть азылчатханы уғаа танығлығ полча. Пістің чааҷыларыбыс Украинада нацизмні чох идер операция иртірчелер, ыырҷының чаа тиріглерін чох идерге киректелче. Россияның армиязы прай Западтаң тоғыр кӱресче, США паза Кидеркі Европадағы хазналар пiстің Чир-суубысты чох идерге, кӱзін саңай чох ит саларға кӱстенчелер. Аннаңар сірерге, тимненізіңерні пӧзік синге кӧдіріп, пістің чоныбыс ӱчӱн турызарға тимде поларға кирек. Хакасия сірерге службаны чахсы апарарға прай оңдайлар пирерге хабазар. Пик хазыхтығ полыңар, чааҷы службазын турыстыра апарарға алғапчам!
Наа тӧстелген зенитнай ракеталығ полктың командирі, подполковник Игорь Семёнов ідӧк прайзын танығлығ кӱннең алғыстаан, Хакасияның правительствозына паза Ӧӧркі Чӧбіне постарына чахсы полысчатхан ӱчӱн алғызын читірген. Iдӧк полктың чааҷылары службаны турыстыра апарарға прай кӱстерін саларлар тіп ізендірген.
Митинг тоозылғанда Россияның гимні толдырылған, чааҷылар маршнаң аалҷылар паза командование алнынҷа знамялығ ирткеннер. Полктың командирі Игорь Семёнов аалҷыларға чааҷылар чуртир комнаталарны кӧзіткен. Оларға службаны апарар истіг оңдайлар тӧстелтір. Амды пістің чоныбысха амыр чуртас апарарға ізеніс пар полар.
Автор :
Николай Султреков
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы