Бюджетниктерге индексация иділер
Ахча сурии. Хакасияда бюджет сферазы тоғынҷыларының чал ахчазына индексация идері чарадыға алылған
2023 чылға алылған бюджет хоостыра алынҷа бюджетниктернің чал ахчазы пазағы чылдаң ӧс парар. Іди ветеринар станциялары тоғынҷыларының окладына 20% индексация иділер (1 январьдаң – 10%-ке паза 1 июльдаң – 10%-ке), ӧрт ӱзірҷең служба тоғынҷыларына – 10%-ке. Ӱгредіг, имнег, наука паза культура тоғынҷыларының, хайзыларына президенттің майдағы указтары теелчелер, чал ахчазына 8%-ке индексация иділер. Істеніс ӱчӱн тӧлегнің иң тӧбін сині (МРОТ) 6,3%-ке ӧскірілген.
Бюджет сферазы тоғынҷыларының пасха категорияларына, Хакасияның Ӧӧркі Чӧп депутаттарының пастаа хоостыра, индексация идіп чал ахчазын 7%-ке кӧдірері кӧріл парған (1 январьдаң – 4%-ке паза 1 июньнаң – 3%-ке). Чоох парча специалисттердеңер, хайзылары ӱстӱнде кӧзіділген категориялар санына кірбин парғаннар паза хайзыларының оклады 2020 чыл соонаң кӧдірілбеен. Ол республиканың ведомстволар холындағы учреждениелерінің тоғынҷылары, хазнаның гражданскай служащайлары, хазнани нимес гражданскай служащайлар паза республиканың пасха даа бюджет учреждениелерінің тоғынҷылары. Таныхтирға кирек, пастап республиканың 2023 чылға бюджет проекті хоостыра ол категория тоғынҷыларына индексация идері кӧрілбеен полған.
Россия президенті Владимир Путин пӱӱл ноябрьда Россия правительствозына бюджет сферазы тоғынҷыларының чал ахчазына пазағы чылдаң индексация идерге чахығ пирген, чуртағҷыларның парыстары инфляция синінең пӧзік полар ӱчӱн. Хакасияның Ӧӧркі Чӧп депутаттары хазна пазының пастаана хабасханнар паза республика бюджедінің проектінзер чал ахчазының индексациязына теелчеткен тӱзедіглер киргеннер.
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |