НАА КАБИНЕТ ХАКАС ТІЛІ ӰГРЕДИИНЕ НАА ТЫНЫС ПИРЧЕ
21.12.2022
Хабарлар
Ӱгредiг. Ағбандағы 22№ школаның ӱгренҷiлерi хакас тiлiн наа оңдайҷа ӱгренiп пастабыстылар. Андағ оңдайны лингафоннай кабинет асты
ӰГРЕДIГ ОРГАНИЗАЦИЯЗЫНДА ХАКАС ТIЛI КАБИНЕДI, НААҶЫЛАЛЫП, ПУ ЛА КӰННЕРДЕ ТОҒЫНЫП ПАСТАДЫ, АННАҢАР ӰГРЕТЧI ДЕЕ, ОЛҒАННАР ДАА НАА ОБОРУДОВАНИЕНЕҢ АМ ДАА ТАНЫСЧАЛАР. ОЛАРҒА МЫНДА ИНФОРМАТИКА ӰГРЕТЧIЗI ДЕНИС ОЩЕНКОВ ЧАХСЫ ХАБАСЧА. ОЛ НАА ОБОРУДОВАНИЕДЕҢЕР ПIДИ ЧООХТАПЧА:
– Хакас тiлi кабинедiне 15 ноутбук паза наушник алылған. Ағаа хоза станция Wi-Fi таратча, аннаңар хонҷых таа хакас тiлi кабинеттерiнде интернет пар. Компьютердегi программалар ӱгретчее олғанның ноутбугын устирға, андағы алҷаастарны сыныхтирға оңдай пирче. Таныхтирға кирек, пу техника хайдағ даа урокты апарарға оңдай пирче, мобильнай станцияны пасха кабинеттерзер кӧзiр парыбызарға чарир, – искiрче информатика ӱгретчiзi Денис Ощенков.
Лингафоннай кабинет – ол амғы тустағы, кӧп функциялығ, чылдырылчатхан IТ-комплекс, хайзы пасха хан тiллерiн ӱгренерге кӧрiл парған. Мындағ кабинеттi тӧстиріне cубсидия алар ӱчӱн школалар аразында марығ ирткен. Таллағда уғаа кӧп ӱгредiг организациязы араласхан. Ағбандағы 22№ школаа оң полған. Хакас тiлi паза литература ӱгретчiзi Елена Тюкпиекова нааҷылалған кабинедiнде нинҷе-де урок иртiрген. Ол пос тiлiн наа технологиялар пастыра ӱгренерге оңдай пол килгенiне тың ӧрiнче.
– Мындағ кабинетке чидiп алғаныбысха уғаа ӧрiнчебiс. Пiстiң школа азылғаннаң cығара мында хакас тiлi апарылча, 2010 чылда, тiзең, ол городтың поликультурнай ӱгредiг кiнi полыбысхан. Мында улуғ опыттығ ӱгретчiлер, ӱгренҷiлерiбiс тее аймах марығларда чахсы пiлiстер кӧзiтчелер, чиңiске турысчалар. Амды пiстiң ӱгредiг оңдайларыбыс алғыпча. Чазыт нимес, амғы олғаннар кiчiгдең ала гаджеттернең ӧткiн паза хынып айғасчалар. Кабинет нааҷылал парғанда, ӱгренҷiлер дее урокка маңзырапчалар, улам чахсы кӧңнiлiг чӧр сыхтылар. Наа оборудование оларның хайиин тартча. Урокта аймах-пасха кӧнiктiрiглер толдырарға олғаннарға даа, мағаа даа чапсых пiлдiрче. Олар аны-мыны сурастырғлапчалар. Аннаңар наа техниканы пiс прай саринаң iстесчебiс, аймах программаларнаң тузаланарға ӱгренербiс, урок толдыразынаң полар ӱчӱн. Таныхтирға кирек, ноутбуктар, наушниктер паза даа пасха техника уғаа пӧзiк качестволығ. Пiс оларны хайраллирбыс, кiчiглерi ӧсчелерӧк нооза. Олар даа аннаң тузаланзыннар. Наа кабинет хакас тiлi ӱгредиине наа тыныс пирче, – ӧрiнiзiн чазырбинча ӱгретчi Елена Яковлевна.
2020 чылда, Хакас тiлiне чарыдылған чылда, Хакасияның Улуғлар чӧбi, республикада тiл хайраллаҷаң паза тилiтчең ӧнетiн программа тӧстеп саларға кирек тiп, республика правительствозынзар айланыснаң сыххан. Ол программа ирткен чылда алыл парған. Аны хоостыра Хакасияның хакас тiлi кабинеттерiне ӧнетiн оборудование алыл сыххан. Ол республикада пастағы ӱгредiг организациязы, хайзына мындағ оң полды.
– Килчеткен чылда пiс пу тоғысты узарадарбыс. Хакасияның читі школазының мындағ кабинет тӧстелер. Хакас тілі кабинеттеріне наа оборудование аларына субсидия позыдылар. Килчеткен чылға хакас тiлiн хайраллирынҷа программаа ахча хозыл парған. Аймах пӧгiннернi чуртасха кирерiне 20-ҷе миллион салковай кӧрiл парған. Андар чарыдығлығ сӧстiк сығарары, ӱгренҷiлер аразында марығлар иртiрерi, алыптығ нымахтарны электроннай оңдайға кирерi паза даа пасхазы кірче. Таныхтирға кирек, иң пастап хакас тiлiн хайраллирына чарыдылған программаа алты миллион салковай позыдылған, ам нинҷе-де хати ӧс парған. Хакасия правительствозы программаның тузазын сизiнче, аннаңар хабазығны алғытча! Мыннаң мындар пос тiлiн хайраллирынҷа наа кӧстеглер алылар, сағынчам. Анзы уғаа кирек. Хайди кӧзiтче саннар, республикада тӧреен тiлінең ниик чоохтасчатханнарның саны чылнаң хызырылча, аннаңар ӱлгӱ пу ағырсымнығ сурыға хайығ айландырча. Тiл – ол пiстiң пайыбыс нооза.
Пу школада ӱгренчеткен хакас палаҷахтарыбыс, тiзең, нааҷылалған кабинетте пiлiстерiн тыытсыннар. Хыйғаҷах ӧссiннер. Чуртаста кӧп чиңiс ползын паза пiстiң республикаа кӧп чидiг ағылзыннар, сабландырзыннар, – таныхтаан чооғында Хакасия пазының социальнай сурығларҷа орынҷызы Михаил Побызаков.
Ағбандағы 22№ школада 1500-че олған саналча, пос тiлiн 500 азыра хакас пала ӱгренче. Iдӧк тiлнi пасха нациялығ олғаннар ӱгренчелер.
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде