ЧИИТ ТЕЕЛБЕКЧІ МИЛЛИОН САЛКОВАЙ УТТЫ
21.12.2022
Хабарлар
Поғдархас. 15 частығ Анатолий Ворошилов «Синяя птица» марығда чиңіс тутты
Теелбекчі паза спортсмен Анатолий Ворошиловты 2022 чылның матыры адирға чарир. Пӱӱл августта Асхыс аймаандағы Пилтір аалның чуртағҷызы «Азияның олғаннары» чоннар аразындағы ойыннарда ікі медаль утхан. Амды, тізең, наа чидіг. Пістің Толя – «Синяя птица» телевидение марииның чиңісчізі.
2015 чылдаң иртірілчеткен марығда хазнабыстың иң таланттығ олғаннары устарын кӧзітчелер. Андар иртiп аларға оой нимес. Кастингте ле 10 муңҷа кізі араласча. Алында Хакасияның кічіг чайаачылары «Синяя птица» марығда араласпааннар. Пӱӱл піcке оң полды. 9-ҷы класстың ӱгренҷізі Анатолий Ворошилов, теелбектеніп, чарғыҷыларны ла нимес, Россия чуртағҷыларын аптап алған. Тиктең нимес аның ӱчӱн прай Сибирь «ағырған», ӱн пирген.
Марығ тузында Толя ырҷы Юрий Шатуновтың «Розовый вечер» сарыны хоостыра теелбектенген полза, азах меетке ол «Щелкунчик» балеттегі трепакты толдырған. Балетті саблығ композитор Пётр Чайковский чайаан, турғысхан хореограф Мариус Петипа. Ойынның премьеразы 18 декабрьда 1882 чылда ирттір. «Щелкунчик» ӧӧн балет театрларының репертуарына кірче. Толя Ворошилов, трепакты наа оңдайнаң толдырып, кӧрігҷілерге ӧӧн сағызын читір пирген. П.И.Чайковскийнің кӧӧн музыканттар саблығ дирижер Юрий Башметтің устаанынаң толдырғаннар. Теелбекті хореограф Гарик Рудникнең тренер Прокопий Тормозаков турғыстырлар.
«Синяя птица» марығда Анатолий Ворошиловтаң пасха ідӧк ырҷы Мария Панюкова паза иллюзионист Даниил Поточкин чиңіс тутханнар. Полғанына ла пірер миллион салковай пирілген. Ӱгретчілерні таныхтааннарох. Лауреат атха тӧрт кізі турысхан, оларның санында Толяның тренері Прокопий Тормозаков. Режиссер Фёдор Бондарчук оларға 300-ер муң салковайлығ сертификаттар читірген.
Марығның пастағҷызы Дарья Златопольскаяның таниинаң, «Синяя птица» – социальнай проект. Аның ӧӧн пӧгіні – таланттығ палаларға хабазары. Хакасияда чайаачы кӧңніліг, кӱстенҷік палалар кӧп. Ізенчебіс, пазағы чылда олар, Толя Ворошилов чіли, устарын сынап, «Синяя птица» марығда аралазарлар. Толяа наа чидіглер тударға алғапчабыс.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде