ЧIБЕКНЕҢ ХООСТАЛҒАН РОССИЯ
21.12.2022
Хабарлар
Культура. Конституция кӱнiнде Москвадағы «Орыс сарын» академическай хазна театрында Россияның чiбекнең хоосталған картазын кӧрiгҷiлер алнына сығарғаннар. Мындағ чапсых акцияны Чувашия Республиканың правительствозы паза Россия национальностьтарының киреенҷе федеральнай агентство тӧстееннер. Ол пӱӱл хазнабыста чарлалған Россия чоннарының культура ис-пайы чылына чарыдылып ирткен.
Хакасиядаң пу чӧрiмде С.П.Кадышевтiң адынаң чон чайаачызы кiнiнiң декоративно-прикладной искусство пӧлиинiң устағҷызы, Хакасия культуразының саблығ тоғынҷызы Светлана Патачакова паза ХГУ-ның искусстволар институды директорының орынҷызы, декоративно-прикладной искусство кафедразының доцентi, культурология кандидады Оксана Киштеева араласханнар.
Акция пӱӱл январьда пасталған, андада Чувашиядаң Россияның прай регионнарынзар ӧнетiн кизек ис паза ӱлгӱ ызылған. Апрель айда тимде тоғыстарны почтаҷа Чувашиязар айландырғаннар. Анаң орындағы «Паха тере» фабриканың устары ол ал-алынҷа ӱлгӱлернi пiр улуғ хоосха пiрiктiргеннер.
Акцияда аралазарға хығырчатхан пiчiк Хакасия правительствозынзар килген. Андартын ол чон чайаачызы кiнiнзер ызылған. Аның устағ-пастаа пу чӧрімде хайди даа аралазарға кирек тiп чаратхан, анаң пу тоғысты ит полар усты тiлеп сыххан. Акцияда аралазары пос кӧңнiнең полған, аны толдырған ӱчӱн тӧлег чох полған тiпче Светлана Степановна. Олар ХГУ-зар айланғаннар, студенттернiң пiреезi курсовой тоғысты толдырған чiли аралазарға идер, арса. Че анаң Оксана Вячеславовна мындағ нандырығлығ киректi позы идерге чарадығ алған.
Ол хара ӧңнiг кизек истi алып, анда хакас чонның кибiрлiг оңдайларынҷа чiбекнең хоостаан. Хакасияны картада кӧрзе, ол узуннада сӱӱлiнче, аннаңар ӧскен отха тӧӧй хоос уғаа килiстiре полған. Аның cабы Ағбан суғ ахчатханын таныхтапча, хоосталған чӱрек – республиканың кiнi Ағбан городты. Iдӧк Оксана Киштеева алынҷа панно тимнеен. Аны хоостыра ол Москвада хакас чонның чiбекнең хоостаҷаң кибiрлерiнеңер чоохтаан, прай оңдайларын кӧзiдерге кӱстенген. Паза регионнардаң килген устар чир-суғларынаңар искiрiг тимнееннер. Мындағ оңдайнаң, пу уғаа чапсых, тузалығ проект полған тiп таныхтапчалар араласчылар, полғаны ла позына наа пiлiстер алған. Че тус уғаа табырах ирт парған, пасха чоннар устарынаң танызып, чоохтазып аларға читкiҷе полбаан тiпче Оксана Вячеславовна. Ол iдӧк Чувашия правительствозына мындағ акция сағын таап алған, аны чуртасха кирген ӱчӱн алғызын читiрген.
Чӧрiм салтарларынҷа алынҷа книга чарыхха сығарылған. Анда Россияда чуртапчатхан полған на чонның кибiрлiг хоозын кӧрiп, аннаңар хысхаҷахти хығырып аларға чарир. Аны акцияның прай араласчыларына сыйлааннар. Карта, тiзең, Россияның амғы тустағы искусство музейiнде хайраллалар.
Cветлана Степановна iкi чыл мының алнында тӧӧй арах акция ирткен тiпче, андада Россия картазы хыйындылардаң тiгiлген. Хакасия анда араластырох. «Пӱӱл пу акцияа тимненчеткенде, сағыс тӧреен – ноға Хакасияда андағох карта тимнебiспеске? Чон чайаачызы кiнiнiң директоры Анна Шаламовазар парғам, ол миннең чарасхан. Iди кирексiнiстернi, тимнеп, аймахтарзар ысхабыс. Олар акцияда аралазарға ынааннарында, хоосчы, ус Татьяна Пудова ӱлгӱлер тимнеен. Соонаң устар аймахтарын хоостаан тоғыстарын ыс пиргеннерiнде, Татьяна Михайловна оларны пiрiктiрген. Июньда пастаабыс, сентябрьда Хакасияның чiбекнең хоосталған картазы тимде полған. Городтар постарының гербтерiн алынҷа хоостааннар. Пӱӱл С.П.Кадышевтiң адынаң чон чайаачызының кiнi 85 чылын таныхтапча, мындағ оңдайнаң аймахтар пiске сыйых тимнеп пиргеннер», – чоохтапча Светлана Степановна.
Автор :
Татьяна КЫШТЫМОВА
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде